ភ្នំពេញ ៖ នេះអាចចាត់ទុកជារឿងស៊យថ្មីមួយទៀតសម្រាប់តារាសម្តែង និងជាពិធីការិនីកញ្ញា ឌួង ហ្សូរីដា ខណៈកាលពីរំលងអធ្រាត្រឈានចូលថ្ងៃទី២៨ ខែសីហា ឆ្នាំ២០១៨កន្លងមកនេះ រថយន្តរបស់នាង ដែលដាក់បញ្ឈរចោលនៅមុខផ្ទះត្រូវបានលោកចោរដៃឆៅលួចកាច់យកស្លាកលេខទៅបាត់ទាំងផ្នែកខាងមុខនិងពីក្រោយ។
តារាសម្តែងកញ្ញា ឌួង សូរីដា បានលើកឡើងថា អស់សំណើច និងហួសចិត្តទាំងព្រឹក នឹងលោកចោរ...!កញ្ចក់ឡានអ្វីមិនលួច មកលួចដោះស្លាកឡានទាំងមុខ និងក្រោយយកទៅបាត់ធ្វើព្រងើយអាសូរតែស្លាកលេខឡានខ្ញុំនឹងលេខការ៉េ លេខហុងស៊ុយ លេខថ្លៃៗអីទៅមិនថាទេ លោកព្រះអើយនិយាយពីលេខអោយធម្មតាអោយសុទ្ធគ្រាន់តែជាលេខរ៉ឺកុម្មងដេ ដែលជាតួលេខនៃភាពចងចាំរបស់ខ្ញុំតើ។
កញ្ញា ឌួង ហ្សូរីដា បញ្ជាក់ថា មើលមិនឃើញថាហេតុអ្វីគាត់ត្រូវមកលួច ហើយជំនាញខ្លាំងមែនទែន មើលតែក្នុងវីដេអូកាមេរ៉ាឃើញច្បាស់ហើយ។ សូមបងប្អូនប្រុងប្រយ័ត្នទាំងអស់គ្នា ស្លាកលេខឡាននាងខ្ញូំ 2AM-2113ត្រូវបានចោរលួចយប់មិញវេលាម៉ោង២និង១៥នាទីទៀបភ្លឺនេះ ដោយបុរសម្នាក់ពាក់ខោសខ្លី និងអាវសជិះម៉ូតូរ៉ឺម៉កឥណ្ឌាកង់បីដូចក្នុងរូបនេះ។
ពិធីការិនីដែលលេចធ្លោលើអាជីសិល្បៈកញ្ញា ឌួង ហ្សូរីដា និយាយបន្តទៀតថា បើមានករណីឡានផ្សេងពាក់ស្លាកនេះ(2AM-2113)មិនមែនជាឡាន MG-GS2.0 ពណ៌ខ្មៅរបស់នាងខ្ញុំទេ។ យកទៅបង្កបញ្ហាណាមួយប៉ះពាល់ដល់អ្នកដទៃ នាងខ្ញុំមិនទទួលខុសត្រូវឡើយចាំមើលលោកពូប៉ូលិសក្នុងសង្កាត់ទឹកល្អក់៣យើងនេះលោកអាចធ្វើការងារស្វែងរកជនដៃដល់ឃើញអត់ ?។
កញ្ញា ឌួង ហ្សូរីដា បានបន្ថែមទៀតថា ចំណុចផ្លូវទេពផននេះ និយាយពីរឿងចោរឆក់ ចោរលួចវិញ ដូចជាល្បីខ្លាំងគួរសមដែរ តាំងពីមកបើកហាងបានជាង៣ឆ្នាំនៅទឹកដីនេះ ហើយក៏ធ្លាប់ជួយសង្គ្រោះជនរងគ្រោះច្រើនករណីហើយ ដោយសារចោរឆក់តាមផ្លូវ និងអ្នកជិតខាងមកសុំអោយបើកកាមេរ៉ាមើលករណីបាត់ម៉ូតូជាដើម៕
Source: Kampuchea Thmey Daily
0 Comments