ភ្នំពេញ ៖ ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច ដឹកនាំបញ្ជាផ្ទាល់ដោយ ឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាន ក្រោយពីបានធ្វើការស្រាវជ្រាវស៊ើបអង្កេតកម្លាំងជំនាញនាយកដ្ឋាន បានសហការជាមួយមន្ត្រីកាំកុងត្រូល និងអាជ្ញាធរមូលដ្ឋាន ក្រោមការសម្របសម្រួលនីតិវិធីពីលោក ខាំ សុផារី ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានចុះបង្ក្រាបទីតាំងវេចខ្ចប់ប៊ីចេងក្លែងក្លាយមួយកន្លែងរកឃើញប៊ីចេងម៉ាកផ្សេងៗគ្នាចំនួន១៧តោនហើយកម្លាំងសមត្ថកិច្ចបានឃាត់ខ្លួនស្ត្រីជាម្ចាស់ផ្ទះម្នាក់យកទៅនាយកដ្ឋានដើម្បីចាត់ការតាមនីតិវិធី។
ប្រតិបត្តិការនេះ ធ្វើឡើងនៅថ្ងៃទី២៧ ខែសីហា ឆ្នាំ២០១៨ វេលាម៉ោង ១០ និង ៣០នាទីព្រឹកនៅផ្ទះ លេខAB4-5 ផ្លូវ56R សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ។
សមត្ថកិច្ចបានឲ្យដឹងថា ម្ចាស់ទីតាំងផលិតដែលឃាត់ខ្លួនឈ្មោះសុខ វួចលីន អាយុ ៤១ឆ្នាំ ជនជាតិខ្មែរ មានលំនៅៗទីតាំងខាងលើ ។
ប្រភពបន្តថា នៅក្នុងប្រតិបត្តិការនេះ សមត្ថកិច្ចរកឃើញទីតាំងខាងលើនេះ បានវេចខ្ចប់ប៊ីចេងក្លែងក្លាយ និងភស្តុតាងរួមមាន ប៊ីចេងបាវសចំនួន ៣៥២បាវ ប៊ីចេងបាវគគីរចំនួន ១២៥បាវ ប៊ីចេងរាយម៉ាកWin winចំនួន ១៤០បាវ ប៊ីចេងច្រករួច(500g)ចំនួន ៣២បាវ ប៊ីចេងច្រករួចម៉ាកGold Cupចំនួន ៤៧កេស ប៊ីចេងរូបវែក(250g) ម៉ាស៊ីនដេរម៉ាត់បាវ ០២គ្រឿង ម៉ាស៊ីនអ៊ុតម៉ាត់ថង់ ០១គ្រឿង ម៉ាស៊ីនរំុខ្សែ និងកាត់ខ្សែចំនួន ០២គ្រឿង ជញ្ជីងថ្លឹង ០២គ្រឿង បាវរូបវែក ៩៣បាវ និងប៊ីចេងរាយមិនទាន់វេចខ្ចប់មួយចំនួនទៀតសរុបទំងន់ទាំងអស់ប្រមាណ ១៧តោន។
បន្ទាប់ពីធ្វើការត្រួតពិនិត្យ និងតាមការសម្រេចរបស់លោកព្រះរាជអាជ្ញារង សមត្ថកិច្ចបានសម្រេចដកហូតវត្ថុតាងប៊ីចេង១៧តោននិងរក្សាទុកក្លុំបេបិទទីតាំងខាងលើ ហើយបាននាំខ្លួនម្ចាស់ទីតាំងលោកស្រី សុខ វួចលីន មកសាកសួរបំភ្លឺនៅនាយកដ្ឋាននគរបាលប្រឆាំងបទល្មើសសេដ្ឋកិច្ច ដើម្បីបន្តនីតិវិធី៕
Source: Kampuchea Thmey Daily
0 Comments