ខ្សែការពារ រស់ សំអឿន របស់​ក្រុម​វិសាខា ចេញទៅ​វះ​កាត់​របួស​សរ​សៃ​ពួរ​ជង្គង់​នៅ​ប្រទេស​វៀតណាម

​ខ្សែការពារ រស់ សំអឿន ដែលជា​សមាជិក​ក្នុង​ក្រុម​វិសាខា ដែលជា​បេក្ខភាព​កំពុង​ប្រជែង​ពានរង្វាន់​លី​គ​កំពូល​កម្ពុជា (Metfone Cambodian League 2018) រដូវ​កាល​នេះ បានធ្វើ​ដំណើរ​ចេញទៅ​វះកាត់​របួស​សរសៃ​ពួរ​ជង្គង់​នៅ​ប្រទេស​វៀតណាម កាលពីពេល​ថ្មីៗ ខណៈ​របួស​នេះ​បាន​ញាំញី​រូបគេ​តាំងពី​ជាង​១​ខែ​មកហើយ​។



​យោងតាម​ប្រភព​មកពី​ក្លិប​បាល់ទាត់​វិសាខា បានលើកឡើង​ថា ​របួស​នេះ​បាន​កើត​ឡើងទៅ​លើ​កីឡាករ រស់ សំអឿន តាំងពីដើម​ជើង​ទី​២​មក​ម្ល៉េះ ហើយ​ស្ថានភាព​របួស​នេះ​គឺ​វា​ប៉ះពាល់​ដល់​ទម្រង់​លេង​របស់​ក្រុម​ក្នុងការ​ប្រជែង​ទាំង​ក្នុង​ពានរង្វាន់​លី​គ​កំពូល​កម្ពុជា និង​ពានរង្វាន់​សម្តេច​តេ​ជោ ហ៊ុន សែន ផងដែរ​។ របួស​នេះ​តម្រូវ​ឲ្យ​កីឡាករ រស់ សំអឿន សម្រាក​ព្យាបាល​រហូតដល់​ចប់​រដូវ​កាល​ផងដែរ​។ រស់ សំអឿន បានធ្វើ​ដំណើរ​ទៅ​វៈ​កាត់​របួស​របស់ខ្លួន​នៅ​ព្រឹក​ថ្ងៃអាទិត្យ ចុង​សប្ដាហ៍​កន្លងទៅ​។

កីឡាករ រស់ សំអឿន បានសម្រេច​មិន​បន្ត​កិច្ចសន្យា​ជាមួយ​ក្រុម​បឹងកេត ក្រោយ​ផុត​សុពលភាព​នៃ​កិច្ចសន្យា​រយៈពេល​១​ឆ្នាំ កាល​ពី​ដើមឆ្នាំ​២០១៨ កន្លងទៅ​។ រូបគេ​ជា​កីឡាករ​ឆ្នើម​មួយរូប​ក្នុងចំណោម​កីឡាករ​ឆ្នើម​ជាច្រើន​រូប​ដែល​ក្លិប​វិសាខា ចុះកិច្ចសន្យា​បានសម្រេច​បូក​ទាំង​កីឡាករ កែវ សុខ​ផេង​, ទិ​ត្យ ឌី​ណា និង​កីឡាករ​កូរ៉េខាងជើង​៥​នាក់​ផ្សេងទៀត​ជាដើម​។



សូម​បញ្ជាក់​កីឡាករ រស់ សំអឿន បាន​ចាប់​អាជីព​បាល់ទាត់​ដំបូង​ជាមួយ​ក្លិប​ឆ្លាម​សមុទ្រ (​រំសាយ​) នៅ​ឆ្នាំ​២០១៣ ខណៈ​ចាប់ពី​ឆ្នាំ​២០១៣ ដល់​២០១៧ បាន​រួមរស់​ជាមួយ​បឹងកេត​អែ​ហ្វ​ស៊ី (​ចំការកៅស៊ូ​បឹងកេត​) និង​ឆ្នាំ​២០១៨ នេះ​ចូល​វិសាខា​។ ចំណែក​ក្នុង​ជម្រើសជាតិ​កម្ពុជា វិញ​កីឡាករ​មកពី​ខេត្តកណ្ដាល រូបនេះ​បានជា​ប់​ក្នុង​បញ្ជី​ជម្រើសជាតិ U23 ជម្រើសជាតិ​កម្ពុជា ពី​ឆ្នាំ​២០១៣ ដល់​២០១៥ និង​ចន្លោះ​ពី​ឆ្នាំ​២០១៣ ដល់​បច្ចុប្បន្ន​រូបគេ​ក៏​ជាប់​ក្នុង​ជម្រើសជាតិ​ឈុត​ធំ​ផងដែរ​។

​ក្រោយ​ឆ្លាម​សមុទ្រ ធ្លាក់​ចេញទៅ​ក្របខ័ណ្ឌ​ក​១ នៅ​ជំនាន់​នោះ រស់ សំអឿន បាន​ចេញ​មក​បឹងកេត ដោយ​ធ្លាប់​ជោគជ័យ​ជាច្រើន​ជាមួយ​ក្លិប​នេះ​ក្នុងនោះ​ជើងឯក​ពានរង្វាន់​លី​គ​កំពូល​កម្ពុជា នៅ​ឆ្នាំ​២០១៦ និង​២០១៧ ពានរង្វាន់​បើក​រដូវ​កាល CNCC Cup 2017 និង​ជា​ក្រុម​ជើងឯក​រង​ពានរង្វាន់​ក្លិប​អាជីព​តាម​ដង​ទន្លេមេគង្គ Toyota Mekong Club Championship នៅ​ឆ្នាំ​២០១៥ ផងដែរ៕

Source: Kampuchea Thmey Daily