តុលាការ​ម៉ាឡេស៊ី​សម្រេច​ថា ការ​កាត់ទោស​ករណី​ឃាតកម្ម​លោក គីម ជុង​ណា​ម អាច​បន្ត​ទៅមុខ​បាន

តុលាការ​ម៉ាឡេស៊ី​បានសម្រេច​នៅ​ថ្ងៃ​ព្រហស្បតិ៍​ថា ការ​កាត់ទោស​ករណី​ឃាតកម្ម​របស់​ស្ត្រី​ពីរ​នាក់​ដែល​ត្រូវ​បាន​គេ​ចោទប្រកាន់​ពី​បទ​ធ្វើឃាត​បងប្រុស​ម្តាយ​ទីទៃ​របស់​មេដឹកនាំ​កូរ៉េខាងជើង​គឺ​អាច​បន្តទៅ​បាន​ដែល​នេះ​ជា​បញ្ហា​ប្រឈម​ដ៏​ធំ​មួយ​ដល់​ក្រុម​គ្រួសារ​របស់​ពួកគេ​ដែល​បាន​អះអាងថា ស្ត្រី​ទាំងពីរ​នាក់​នេះ​ត្រូវបាន​គេ​បោក​បញ្ឆោត​ឲ្យ​លេងល្បែង​ពញ្ញាក់​អារម្មណ៍។

បន្ទាប់ពី​សវនាការ ចៅក្រម Azmi Ariffin បាន​និយាយថា មាន​ភស្តុតាង​គ្រប់គ្រាន់​ដើម្បី​គាំទ្រ​ការចោទប្រកាន់​ករណី​ឃាតកម្ម​ប្រឆាំងនឹង​នាង Siti Aisyah មកពី​ប្រទេស​ឥណ្ឌូនេស៊ី​និង​នាង Doan Thi Huong មកពី​ប្រទេស​វៀតណាម​ដែល​ត្រូវគេ​ចោទប្រកាន់​ពីបទ​សម្លាប់​លោក​គីម​ជុង​ណា​ម​ជាមួយ​ភ្នាក់ងារ​បំផ្លាញ​សរសៃប្រសាទ VX នៅ​ព្រលានយន្តហោះ​ក្រុង​គូ​ឡា​ឡាំ​ពួរ​។​

ចៅក្រម​បាន​និយាយ​នៅក្នុង​សេចក្តីសម្រេច​របស់គាត់​ទៅកាន់​តុលាការ​ជាន់ខ្ពស់ Shah Alam នៅ​ខាងក្រៅ​ទីក្រុង​គួ​ឡា​ឡាំ​ពួរ​ថា “​ដូច្នេះ​ខ្ញុំ​ត្រូវតែ​អំពាវនាវ​ឲ្យ​ពួកគេ​ចូលមក​ការពារ​ក្តី​របស់​ពួកគេ​តាម​ការចោទប្រកាន់​រប​ស់​ពួកគេ​នីមួយៗ​”​។​

ស្ត្រី​ទាំងពីរ​មើលទៅ​ដូចជា​តក់ស្លុត​និង​បាន​សម្រក់​ទឹកភ្នែក​នៅពេល​សេចក្តីសម្រេច​ធ្វើឡើង​។​
​ប្រសិនបើ​ចៅក្រម​សម្រេច​ថា ភស្តុតាង​មិនមាន​គ្រប់គ្រាន់​ទេនោះ គាត់​អាច​ជ្រើស​រើសយក​ការដោះលែង​ស្ត្រី​ទាំងពីរ​នាក់​នេះ​។​

មេធាវី​របស់​នាង Aisyah លោក Gooi Soon Seng បាន​ប្រាប់​ក្រុមអ្នកកាសែត​ថា “​យើង​ខកចិត្ត​យ៉ាងខ្លាំង​ចំពោះ​សេចក្តីសម្រេច​។ យើង​នឹងធ្វើ​ឲ្យ​បានល្អ​បំផុត​នៅក្នុង​ដំណាក់កាល​ការពារ​”​។​

ក្រុមគ្រួសារ​របស់​ពួកគេ​បាន​ទទូចថា ស្ត្រី​ទាំងពីរ​ត្រូវបាន​គេ​បោក​បញ្ឆោត​ឲ្យ​ធ្វើការ​សម្លាប់​តាមបែប​សង្គ្រាមត្រជាក់​ហើយ​ស​ង្ឈឹ​ម​ថា ពួកគេ​នឹង​ត្រូវបាន​ដោះលែង​បើទោះបីជា​ព្រះរាជអាជ្ញា​រដ្ឋ​បាន​ទទូចថា ពួកគេ​មាន​ករណី​ធ្ងន់ធ្ងរ​ក៏ដោយ​។​

ស្ត្រី​ទាំងពីរ​ត្រូវបាន​គេ​ចោទប្រកាន់​ពីបទ​សម្លាប់​លោក​គីម​ជុង​ណា​ម​ដោយ​ការ​ប៉ាត​សារធាតុ VX ពុល​នៅលើ​មុខ​របស់គាត់​កាលពី​ខែកុម្ភៈ​ឆ្នាំមុន​ខណៈពេលដែល​គាត់​កំពុង​រង់ចាំ​ជិះ​យន្តហោះ​ទៅ​ទីក្រុង​ម៉ា​កាវ​។​
អ្នក​ទាំងពីរ​ត្រូវ​ប្រឈមមុខ​នឹង​ការប្រហារជីវិត​ដោយ​ព្យួរ​.​ក​ប្រសិនបើ​រកឃើញថា​មាន​កំហុស​។ ពួកគេ​បាន​អះអាងថា ពួកគេ​បាន​ធ្លាក់ខ្លួន​ក្លាយទៅជា​ជនរងគ្រោះ​ក្នុង​គម្រោង​ឃុបឃិត​មួយ​ដែល​រៀបចំ​ដោយ​ភ្នាក់ងារ​កូរ៉េខាងជើង​ហើយ​ពួកគេ​ជឿថា ពួកគេ​បាន​ចូលរួម​ក្នុង​កម្មវិធី​ពញ្ញាក់​អារម្មណ៍​តាម​ទូរទស្សន៍​មួយ​នៅពេល​ពួកគេ​វាយប្រហារ​លោក​គីម​ដោយសារ​ធាតុគីមី​ដែល​ត្រូវបាន​គេ​ចាត់ថ្នាក់​ថា​ជា​អាវុធ​ដ៏​សាហាវ​៕ AFP



​

Source: Kampuchea Thmey Daily