អាជ្ញាធរខេត្ត ប្រកាសឱ្យប្រជាពលរដ្ឋលើកកម្ពស់សុវត្ថិភាព ពេលដែលទឹកទន្លេមេគង្គឡើងជិតដល់កម្ពស់១១ម៉ែត្រ

ស្ទឹងត្រែង ៖ ទឹកទន្លេមេគង្គខេត្តស្ទឹងត្រែង បានឡើងជាលើកទី២នៅថ្ងៃទី២៩ ខែសីហា ឆ្នាំ២០១៨នេះ ១០,៩៨ម៉ែត្រ លើសកម្រិត ប្រកាសអាសន្នត្រឹម១០,៧០។ កម្ពស់ទឹកនេះ បានលិចមូលដ្ឋានរស់នៅរបស់ប្រជាពលរដ្ឋមួយចំនួន នៅក្រុងស្ទឹងត្រែង និងនៅតាមមូលដ្ឋានផ្សេងៗ ហើយអាជ្ញាធរនៅតាមឃុំសង្កាត់ត្រូវឱ្យប្រជាពលរដ្ឋប្រុងប្រយ័ត្នជម្លៀសឡើងទៅទីទួលសុវត្ថិភាពក្នុងករណីចាំបាច់។

លោកម៉ុម សារឿន អភិបាលខេត្តស្ទឹងត្រែងបានបញ្ជាក់ថា ៖ កម្ពស់ទឹកនេះ ប្រជាពលរដ្ឋយើងត្រូវប្រុងប្រយ័ត្នរៀងៗខ្លួន ព្រោះអាជ្ញាធរ បានធ្វើសេចក្តីប្រកាសរួចមកហើយ ឱ្យអាជ្ញាធរភូមិឃុំនីមួយៗ ប្រកាសឱ្យប្រជាពលរដ្ឋ មើលថែកូនចៅ-បរិភោគទឹកស្អាត -ចំណីអាហារមានអនាម័យ -និងប្រុងប្រយ័ត្នចំពោះសត្វមានពិស ទិចឬខាំ។

លោកអភិបាលខេត្ត បានស្នើឱ្យអាជ្ញាធរឃុំសង្កាត់ ក៏ដូចជាភូមិឃុំផងដែរ ចាត់ចែងកម្លាំងប្រជាការពារប្រចាំការ នៅតាមទីទួលសុវត្ថិភាព និងតំបន់គោលដៅ បើមានបញ្ហាប្រឈម ត្រូវផ្តល់ព័ត៌មានឱ្យបានឆាប់ជូនអាជ្ញាធរ ដែលនៅជិតដើម្បីយើងរួមគ្នាជួយប្រជាពលរដ្ឋយើងឱ្យទាន់ពេលវេលា ក្នុងពេលដែលទឹកមានកម្ពស់ជិត១១ម៉ែត្រ។

លោកដែង ភារម្យ ចៅសង្កាត់ស្រះឫស្សីក្រុងស្ទឹងត្រែងបានបញ្ជាក់ថា ៖ ផលប៉ះពាល់ពីទឹកជំនន់នេះអាជ្ញាធរ បានប្រកាសឱ្យប្រុងប្រយ័ត្នជាញឹកញាប់ ហើយបើតាមការពិនិត្យសន្ទុះទឹក ដែលកំពុងជំរុញឡើងនេះ គួរឱ្យមានការព្រួយបារម្ភ ព្រោះមេឃមានភ្លៀងច្រើនក្នុងរយៈពេល២ថ្ងៃនេះ។

លោកចៅសង្កាត់បញ្ជាក់ថា ៖ តាមសន្ទុះទឹកបានហូរចូលក្រុងហើយ នៅសង្កាត់សាមគ្គីប្រជាពលរដ្ឋនៅតាមជួរមាត់ទន្លេមួយចំនួនត្រូវបានទៅរកទីទួលសុវត្ថិភាពជាពិសេសនៅតាមតំបន់ទំនាប ចំណែកនៅក្នុងក្រុងអាចប៉ះពាល់ប្រជាពលរដ្ឋ រួមមាន-ភូមិព្រែក- ភូមិកណ្ដាល-និងភូមិស្ពានថ្ម ក្នុង សង្កាត់ស្ទឹងត្រែង - ភូមិថ្មលាត ភូមិស្រែពោធិ ភូមិលើក្នុងសង្កាត់ស្រះឬស្សី- ភូមិខាំផាន់ ភូមិកោះខនឌិន ភូមិហាងខូបាន ភូមិហាងខូសួន ភូមិថ្មី ក្នុងសង្កាត់សាមគ្គី។

លោកប៉ាងប៉េងប្រធានមន្ទីរធនធានទឹកបានបញ្ជាក់ថា ៖ ទឹកទន្លេមេគង្គអាចនឹងឡើងដល់កម្រិតជាង១១ម៉ែត្រនៅថ្ងៃទី២៩សីហានេះ ដូចនេះចូរ បងប្អូនប្រុងប្រយ័ត្ន និងអាចជម្លៀសទ្រព្យសម្បត្តិ សត្វចិញ្ចឹមផ្សេងៗទៅរកទីទួលសុវត្ថិភាព។

សូមបញ្ជាក់ថា ៖ ក្នុងកម្រិតកម្ពស់ទឹក១០.៩៨ម៉ែត្រនេះ ភូមិទាំងចំនួន៨១នៅតាមដងទន្លេមេគង្គនឹងត្រូវលិច ផ្លូវធ្វើដំណើរមួយចំនួន ក៏ត្រូវកាត់ផ្តាច់ ក្នុងពេលដែលផលដំណាំបានលិចលង់ត្រូវខូចខាតទៅហើយព្រោះថានេះជាលើកទី២នៃជំនន់ទឹកមេគង្គក្នុងខែសីហានេះ៕