បាត់ដំបង ៖ ជនសង្ស័យម្នាក់ ដែលជាប់ពាក់ព័ន្ធនឹងករណីដឹកជញ្ជូន និងជួញដូរសត្វព្រៃខុសច្បាប់ ត្រូវបានកម្លាំងកងរាជអាវុធហត្ថ ប្រចាំស្នាក់ការលេខ ៥០៨ ធ្វើការឃាត់ខ្លួនបញ្ជូនទៅអោយកម្លាំងជំនាញខេត្ត ដោយនៅក្នុងនោះក៏មានមន្ត្រីឆ្នើម របស់ប៉េអឹមម្នាក់បានធ្វើការសម្របសម្រួល ក្នុងគោលបំណងបិទសំណុំរឿងដែរ ប៉ុន្តែត្រូវបានបែកធ្លាយវិញ បន្ទាប់ពីទឹកប្រាក់ដែលចរចាគ្នានោះវាមានកម្រិតខ្ពស់ស្មើពពក។
យោងតាមរបាយការណ៍របស់សមត្ថកិច្ច ដែលកម្ពុជាថ្មីទទួលបាន គឺកិច្ចប្រតិបត្តិការនោះ បានធ្វើឡើង កាលពីវេលាម៉ោង ៣ និង ២២ នាទី រសៀល ថ្ងៃទី ២៨ ខែសីហា ឆ្នាំ២០១៨ នៅ ភូមិព្រែកចាស់ ឃុំកោះជីវាំង ស្រុកឯកភ្នំ ខេត្តបាត់ដំបង ដោយកម្លាំងស្នាក់ការ ៥០៨ ប្រចាំតំបន់បឹងទន្លេសាប ដឹកនាំដោយលោក ប្រធានស្នាក់ការពៅ ស៊ុំ។
នៅក្នុងកិច្ចប្រតិបត្តិការនេះដែរ ក៏មានការចូលរួមពីមន្ត្រីប៉េអឹមដ៏ឆ្នើមម្នាក់ ដែលល្បីថា ពូកែរកលុយ គឺឈ្មោះ ទ្រី តិចសែ ផងដែរ រហូតឈានដល់ការឃាត់ខ្លួនមុខសញ្ញាម្នាក់ឈ្មោះ តី តុលា ភេទប្រុស អាយុ២៩ឆ្នាំ មុខរបរនេសាទ រស់នៅភូមិថ្វាង ឃុំកោះជីវាំង ស្រុកឯកភ្នំ ខេត្តបាត់ដំបង រួមជាមួយនឹងកាណូតស្មាច់១គ្រឿង។
បើយោងតាមប្រភពពីសាច់ញាតិរបស់ជនសង្ស័យបានលើកឡើងថា ក្រោយពីការឃាត់ខ្លួនរួចមក កម្លាំងប៉េអឹមមិនទាន់ធ្វើការបញ្ជូនទៅណាទេ ដោយឈ្មោះ ទ្រី តិចសែ ជាអ្នកចរចាសម្របសម្រួល រហូតអូសបន្លាយពេលដល់យប់ងងឹត ទើបគេបានផ្លាស់ប្តូរទីតាំងដោយយកទាំងកាណូតស្មាច់ទៅដល់ចំណុច មេជ្រៃ ដែលស្ថិតនៅក្នុងភូមិសាស្ត្រ ស្រុកពួកខេត្តសៀមរាប។
ក្រុមគ្រួសារ សាច់ញាតិដែលមានឈ្មោះ រស្មី ជាអ្នករត់ការចេញមុខដើម្បីដោះស្រាយបានរៀបរាប់បន្តថា នៅទីនោះ គឺម៉ោងប្រមាណ ជាង៩ យប់ មន្ត្រីឆ្នើមរបស់ប៉េអឹម បានប្រើភាសាថា ត្រូវបង់លុយចំនួន ២០ លានរៀល ជាថ្នូរមិនបញ្ជូនទៅដាក់គុក បើមិនបានទេជនសង្ស័យអាចប្រឈមនិងការជាប់គុករយៈពេល ៧ ខែ។
ការចរចារនៅតែបន្តរហូតដល់ម៉ោង១០ យប់ ទើបឪពុករបស់ជនសង្ស័យ ស្វះស្វែងរកប្រាក់បានមិនដល់ ១០ លានរៀលនោះទេ ដោយប្រគល់ទៅអោយឈ្មោះ រស្មី ជាអ្នកដោះស្រាយ ប៉ុន្តែត្រូវបានខាងអស់លោកប៉េអឹមដែលជំនាញរកលុយ ធ្វើការបដិសេធស្របពេលជាមួយគ្នានោះដែរ រឿងនេះក៏ត្រូវបានបែកធ្លាយ ទើបកម្លាំងប៉េអឹមស្រុកពួក ចុះទៅកាន់ចំណុចមេជ្រៃនេះ ព្រមទាំងបានចោទសួរថា ហេតុអ្វីបានជាមកយកបទល្មើសឆ្លងដែនបែបនេះ គឺនៅពេលនោះខាងប៉េអឹមស្រុកពួក សឹងតែចង់ប្រទាញប្រទង់យកជនល្មើសទៅកាន់ខេត្តសៀមរាបវិញ ប៉ុន្តែក្រោយមកក៏ព្រមអោយនាំខ្លួនមកកាន់ ទីបញ្ជាការដ្ឋាន កងរាជអាវុធហត្ថខេត្តបាត់ដំបង ទាំងយប់ ដោយសារតែការចរចាមិនត្រូវគ្នា។
លុះព្រឹកថ្ងៃទី ២៩ ខែ ឆ្នាំ ដដែល ទើបសមត្ថកិច្ចបានធ្វើការប្រគល់នូវវត្ថុតាង ដែលក្នុងនោះមាន ពស់វែកចំនួន ១២ ក្បាល ទម្ងន់ ២២ គីឡូក្រាម ពស់ថ្លាន់ចំនួន ២ ក្បាល ទម្ងន់ ២៥ គីឡូក្រាម សំពោចចំនួន ៦ ក្បាល ទម្ងន់ ៨ គីឡូក្រាម ស្បែកពស់ថ្លាន់ ទម្ងន់៣គីឡូក្រាម កាណូតស្មាច់ ១ គ្រឿង និងទូរស័ព្ទដៃ ១ គ្រឿង រួមជាមួយនឹងជនសង្ស័យទៅខណ្ឌរដ្ឋបាលព្រៃឈើបាត់ដំបង ក្នុងការចាត់ការបន្តតាមនីតិវិធី ហើយនៅព្រឹកនោះដែរសត្វព្រៃទាំងអស់ ត្រូវបានកម្លាំងជំនាញនាំយកទៅលែងនៅក្នុងកសិន្ធុ ខាងមុខប្រសាទបាណន់ទាំងអស់ហើយ ដើម្បីអោយវាមានសេរីភាពក្នុងការរស់នៅ៕
Source: Kampuchea Thmey Daily
0 Comments