ភ្នំពេញ ៖ ប្អូនប្រុសម្នាក់ថ្វីត្បិតជាកូនកំព្រាឪពុកម្តាយ និងជាជនពិការដៃជើងទៀតសោត ប៉ុន្តែប្អូនប្រុសមិនលើកដៃសំពះសុំទានគេទេ។
ជាក់ស្តែងនៅព្រឹកថ្ងៃទី២៩ខែសីហានេះ ភ្នាក់ងារកម្ពុជាថ្មីបានជួបសម្ភាសន៍ជាមួយប្អូនប្រុសឈ្មោះ ប្រុស រ័ត្ន អាយុ៣៣ឆ្នាំ ដែលមានស្រុកកំណើតក្នុងភូមិព្រែកប៉ាន ឃុំត្រើយស្លា ស្រុកស្អាងខេត្តកណ្តាល ខណៈពេលដែលប្អូនកំពុងអង្គុយលើរ៉ឺម៉កម៉ូតូដែលមានព្យួរនំគ្រប់មុខសម្រាប់លក់ថាសព្វថ្ងៃប្អូនប្រុសជាកូនកំព្រាឪពុកម្តាយ ហើយជាជនពិការស្វិតដៃជើងតាំងពីកំណើតមកម្ល៉េះ។ ប្អូនបានបញ្ជាក់ក្នុងទឹកមុខស្រពាប់ស្រពោនថា ថ្វីត្បិតតែប្អូនជាជនពិការពិតមែនគឺប្អូនពុំបានដើរលើកដៃសំពះសុំទានគេឡើយ។
ប្អូនបានចាកចេញពីស្រុកកំណើតមកសុំព្រះសង្ឃវត្តសំពោងផលអណ្តែតស្នាក់នៅដើម្បីកាត់បន្ថយការចំណាយទៅលើការជួលបន្ទប់ស្នាក់នៅ ហើយក្នុងនោះព្រះសង្ឃក៏បានអនុញាតឲ្យស្នាក់នៅព្រមទាំងផ្តល់អាហារហូបចុក ខណៈដែលព្រះសង្ឃសល់ចង្ហាន់។
ប្អូនប្រុសមករស់នៅក្នុងវត្តក៏ពិតមែន ប៉ុន្តែប្អូនបានសន្សំប្រាក់ទិញម៉ូតូសណ្តោងរ៉ឺម៉កដើម្បីដឹកនំលក់ជារៀងរាល់ថ្ងៃគ្រាន់ចិញ្ចឹមជីវិតតទៅមុខ ព្រោះប្អូនមិនអាចទៅទីពឹងអ្នកណាបាននោះឡើយ។ ប្រុស រ័ត្ន បន្តទៀតថា ប្អូនត្រូវបានសប្បុរសជន ជួយទិញនំរបស់ប្អូនដែលទទួលទិញពីគេយកមកលក់ដើម្បីទទួលបានប្រាក់ចំណេញគ្រាន់ដោះស្រាយជីវភាពប្រចាំថ្ងៃ។ ប្អូនប្រុសសន្យាថាមិនលើកដៃសុំទានគេទេដរាបណានៅមានអ្នកអាណិតអាសូរជួយទិញនំរបស់ប្អូន៕
Source: Kampuchea Thmey Daily
0 Comments