បាត់ដំបង ៖ យុវជនម្នាក់ បានស្លាប់ភ្លាមៗយ៉ាងអាណោចអាធ័ម នៅក្នុងទឹកអណ្តូង ខណៈដែលគេបានដាក់ម៉ូទ័រជ្រមុជទឹកចុះទៅបាតអណ្តូង ដើម្បីបូមទឹកដាក់ពាង ដែលគេសង្ស័យថា ជនរងគ្រោះអាចចុះទៅលើកម៉ូទ័រអោយផុតពីភក់បាតអណ្តូងទាំងមិនបានដកខ្សែចរន្តចេញ ទើបបណ្តាលអោយឆក់តែម្តង។
ហេតុការណ៍ ដែលធ្វើអោយមានការភ្ញាក់ផ្អើលនេះ បានកើតឡើងកាលពីថ្ងៃទី ១៩ ខែសីហា ឆ្នាំ២០១៨ វេលាម៉ោង ១២ ថ្ងៃត្រង់ នៅចំណុចអូរផ្តៅទឹក ក្នុងភូមិតាហែន១ ឃុំរកា ស្រុកសង្កែ ខេត្តបាត់ដំបង ដោយសារតែមានករណីឆក់ខ្សែភ្លើងស្លាប់ ពេលដែលជនរងគ្រោះបូមទឹកដាក់ពាងសម្រាប់ប្រើប្រាស់។
បើតាមក្រុមគ្រួសារបានបញ្ជាក់ថា នៅមុនពេលកើតហេតុគឺជនរងគ្រោះឈ្មោះ យ៉ាន់ មករា ភេទប្រុស អាយុ២៤ឆ្នាំ រស់នៅត្រង់ចំណុចកើតហេតុខាងលើ បានយកម៉ូទ័រដែលជាប្រភេទម៉ូទ័រជ្រមុជទឹក ( អាចត្រាំក្នុងទឹកបាន ) ទៅដាក់ក្នុងអណ្តូងដែលគេបានជីកនៅបាតអូរដើម្បីបូមទឹកដាក់ពាង។
នៅពេលម៉ូទ័រកំពុងដំណើរការ ដោយមានការភ្ជាប់ចរន្តទៅហើយនោះ គេក៏បានចុះទៅលើកម៉ូទ័រអោយផុតពីបាតអណ្តូងដើម្បីកុំអោយបូមដោយភក់ខ្លាំងពេក ហើយជនរងគ្រោះមិនបានដកខ្សែភ្លើងចេញនោះឡើយ ក៏ស្រាប់តែត្រូវភ្លើងឆក់នៅក្នុងអណ្តូងនោះស្លាប់តែម្តង ទើបមានការឆោឡោ ព្រមទាំងបានដកខ្សែភ្លើងចេញដើម្បីស្រង់យកមនុស្សបញ្ជូនទៅកាន់គ្លីនិកឯកជន វិសាលសុខ ប៉ុន្តែអ្វីៗត្រូវបានហួសពេលអស់ទៅហើយ ដោយសារតែគ្រូពេទ្យជំនាញបានប្រាប់ថា គេបានស្លាប់ទៅហើយ ទើបក្រុមគ្រួសារដឹកសពត្រឡប់មកផ្ទះវិញដើម្បីរៀបចំធ្វើបុណ្យ ដោយសមត្ថកិច្ចជំនាញបានលើកឡើងថានេះគឺជាការធ្វេសប្រហែសរបស់ជនរងគ្រោះ ដែលគេគិតថាវាមិនអី៕
Source: Kampuchea Thmey Daily
0 Comments