ក្រសួង​សុខាភិបាល​ ព្រមាន​ផ្លូវច្បាប់​ចំពោះ​អ្នកលក់​តាម​ហ្វេ​ស​ប៊ុ​ក​ ដែល​ផ្សព្វផ្សាយ​ផលិតផល​បោកប្រាស់

ភ្នំពេញ​ ៖ ​ក្រសួងសុខាភិបាល បាន​ព្រមាន​តាមផ្លូវ​ច្បាប់​ចំពោះ​ម្ចាស់​គណនី​ចំនួន​៦០ ដែល​ផ្សព្វផ្សាយ​ផលិតផល ​បោកប្រាស់ ​បំផ្លើសការពិត​ពិសេស​ផ្សព្វផ្សាយ​ផលិតផល​គ្រឿងសម្អាង «Firmax 3 Cream»​ ដោយសារ​ផលិតផល​នេះ មិន​មាន​ចុះ​បញ្ជិកា​នៅ​ក្រសួងសុខាភិបាល។

ក្រសួង​បាន​ណែនាំ​ដល់​ម្ចាស់​គណនី​ហ្វេ​ប៊ុ​ក​ទាំងនោះ ​ត្រូវ​បញ្ឈប់​សកម្មភាព​ចែកចាយ និង​នាំចូល ​ផលិតផល​គ្រឿងសម្អាង ​«Firmax 3 Cream»​ជាបន្ទាន់​ដោយសារតែ​គ​ណ​នី​ទាំងនោះ បាន​នាំចូល​ផលិតផល ក្លែងបន្លំ ដែល​គ្មាន​ការអនុញ្ញាត​នាំចូល​ពី​ក្រុមហ៊ុន​ត្រឹមត្រូវ​នោះ​ឡើយ។

យោងតាម​តាម​សេចក្តីប្រកាស​របស់​ក្រសួងសុខាភិបាល ដែល​បានចេញ​ផ្សាយ​កាលពី​ថ្ងៃទី​១៤ ខែសីហា ឆ្នាំ​២០១៨​បាន​ឲ្យ​ដឹងថា ​គណនី​ចំនួន​៦០ កំពុងតែ​ផ្សព្វផ្សាយ ផលិតផល​គ្រឿងសម្អាង «Firmax 3 Cream»​ផលិត​នៅ​ប្រទេស​ម៉ាឡេស៊ី ដែល​ពុំមែន​ជា​ការ​នាំចូល​ពី ក្រុមហ៊ុន អ​អេ​ហ្វ​៣ វើ​ល​(​ខេ​ម​បូ​ឌា​) ឯ​.​ក ពិតប្រាកដ​ឡើយ។

​ក្រសួងសុខាភិបាល បានបញ្ជាក់​ទៀតថា ផលិតផល​ទាំងនោះ គ្មាន​គុណភាព​បង្ការ និង​ព្យាបាល​ដូចដែល​បានចេញ​ផ្សាយ​ឡើយ​។

ដើម្បី​ជៀសវាង​ការខាតបង់​ប្រាក់កាស និង​ប៉ះពាល់​ដល់​សុខភាព ដល់​ពលរដ្ឋ ក្រសួង​ប្រាប់​ឱ្យ​គណនី​ទាំងនោះ បញ្ឈប់​សកម្មភាព​ចែកចាយ ផ្សព្វផ្សាយ​អួតអាង ភូតកុហក បោកប្រាស់ ទៅកាន់​ពលរដ្ឋ ដែលនាំឱ្យ​ប៉ះពាល់​សុខភាព និង​អាយុជីវិត នោះ​ជាបន្ទាន់​។​
​
ក្នុងករណី​ប្រសិនបើ​ឃើញ​មាន​គណនី​ទាំងនោះ​នៅតែ​បន្ត​ការផ្សព្វផ្សាយ​ផលិតផល «Firmax 3 Cream» នេះ​ទៀត​នោះ ក្រសួងសុខាភិបាល នឹងមាន​វិធានការ​តឹងរ៉ឹង​ទៅតាម​ផ្លូវច្បាប់​។​

លោកស្រី​វេជ្ជបណ្ឌិត ឱ វណ្ណ ឌី​ន អគ្គនាយក​បច្ចេកទេស​សុខាភិបាល និង​ជា​អ្នកនាំពាក្យ​ក្រសួងសុខាភិបាល​បាន​មានប្រសាសន៍ថា ​ការដែល​ក្រសួងសុខាភិបាល​ណែនាំ​មិន​ឲ្យ​ប្រជាពលរដ្ឋ​ប្រើប្រាស់​ផលិតផល​គ្រឿងសំអាង​ដាក់​លក់​នៅតាម​អន​ឡាញ​នេះ ​ដោយសារតែ​ផលិតផល​ទាំងនោះ​ភាគច្រើន​អាច​បង្ក​ផលប៉ះពាល់​ដល់​សុខភាព​និង​អាច​ឈាន​ទៅដល់​គ្រោះថ្នាក់​ដល់​អាយុជីវិត​អ្នកប្រើប្រាស់​ទៀតផង​។​
​លោកស្រី​វេជ្ជបណ្ឌិត​បាន​បន្តថា​ផលិតផល​គ្រឿងសំអាង​ដាក់លក់​នៅតាម​អន​ឡាញ​ភាគច្រើន​មិនមាន​ការត្រួតពិនិត្យ​ឲ្យ​បាន​ត្រឹមត្រូវ​និង​គ្មាន​ការទទួលស្គាល់​ពី​ក្រសួងសុខាភិបាល​ឡើយ​ដែល​ធ្វើ​ឲ្យ​អ្នកប្រើប្រាស់​ត្រូវ​ប្រឈម​នឹង​បញ្ហា​សុខភាព​ដូចជា​អា​ឡាក​ស៊ី​ស្បែក ចេញ​រមាស់ ហើម ខូច​ភ្នែក មហារីក​ស្បែក​ព្រោះថា​នៅពេល​លាប​លើ​ស្បែ​កបាន​ជ្រាប​ចូលទៅ​ពេញ​សរីរាង្គ​តែម្តង​បើ​កុមារ​ជ្រាប​លឿន​ជាង​មនុស្ស​ចាស់​ទៅទៀត​ហើយ​អាច​ប្រឈម​នឹង​គ្រោះថ្នាក់​ដល់​អាយុជីវិត​ថែមទៀត​។​
​
លោកស្រី​វេជ្ជបណ្ឌិត​បាន​បន្ថែមថា ​បច្ចុប្បន្ននេះ​មាន​ប្រជាពលរដ្ឋ​មួយចំនួន​ចង់​ឲ្យ​រូបរាងកាយ​ស្រស់ស្អាត​និង​ទាក់ទាញ​ចំណាប់អារម្មណ៍​ពី​អ្នក​នៅ​ជុំវិញខ្លួន​បាន​ប្រើប្រាស់​ផលិតផល​ថែរក្សា​សម្ផស្ស​ឬ​កែ​សម្ផស្ស​ហើយ​មាន​ប្រជាពលរដ្ឋ​ខ្លះ​បាន​ទិញ​ផលិតផល​ដែល​មិនមាន​គុណភាព​ពិសេស​ផលិតផល​ដែល​ផ្សព្វផ្សាយ​តាម​ប្រព័ន្ធ​អន​ឡាញ​មួយចំនួន​យកមកប្រើ​ធ្វើ​ឲ្យ​ប៉ះពាល់​ដល់​សុខភាព​។​
​
លោកស្រី​អ្នកនាំពាក្យ​រូប​នោះបាន​ណែនាំ​ថា​មុននឹង​ទិញ​មកប្រើប្រាស់​ប្រជាពលរដ្ឋ​ត្រូវ​មើល​និង​ពិនិត្យ​ឲ្យ​បានច្បាស់លាស់​នូវ​លេខ​បញ្ជិកា​ដែល​ចុះ​ដោយ​ក្រសួងសុខាភិបាល ដែល​បិទ​នៅលើ​ប្រអប់​និង​ពិនិត្យមើល​ថ្ងៃខែ​ប្រើប្រាស់​ឲ្យ​បានច្បាស់លាស់​បើ​ហួសការ​កំណត់​ហើយ​មិនត្រូវ​ទិញ​ទេ​។​ជាងនេះទៀត​ត្រូវ​មក​ពិគ្រោះ​យោបល់​ជាមួយ​គ្រូពេទ្យ​ជំនាញ​ផ្នែក​សើរ​ស្បែក​ជាមុនសិន​មុននឹង​ទិញ​ផលិតផល​ណាមួយ​យកទៅ​ប្រើប្រាស់​។​

លោកស្រី​វេជ្ជបណ្ឌិត​បាន​ឲ្យ​ដឹង​ទៀតថា​ក្រៅពី​មើល​ប្រអប់​ហើយ​ត្រូវ​មើល​ថ្នាំ​នៅក្នុង​ប្រអប់​ទៀត​ព្រោះថា​មាន​ក្រុមហ៊ុន​មួយចំនួន​តូច​បាន​បិទ​លត​ប​ត្រ​ទទួលស្គាល់​ពី​ក្រសួងសុខាភិបាល​តែ​បន្លំ​ដាក់​ផលិតផល​ហួសការ​ប្រើប្រាស់​ឬ​ក្លែងក្លាយ​ក្នុង​ប្រអប់ ។​
​
តែ​យ៉ាងណាក៏ដោយ​លោកស្រី​វេជ្ជបណ្ឌិត​ក៏បាន​ណែនាំ​ឲ្យ​ដល់​ប្រជាពលរដ្ឋ​គួរតែ​ប្រើប្រាស់​ផលិតផល​តាមបែប​ធម្ម​ជាតិ​វិញ​ព្រោះថា​នៅលើ​ពិភពលោក​បាន​ងាក​មកប្រើប្រាស់​ការ​កែសម្ផស្ស​តាមបែប​ធម្មជាតិ​ដូចជា​ប្រើ​ត្រសក់ ល្ហុង ក្រូចសើច​កក់សក់​ធ្វើ​ឲ្យ​ទន់​សក់​ល្អ​និង​ចិញ្ចឹម​សក់​បានល្អ​៕​

​

Source: Kampuchea Thmey Daily