កាលពីថ្ងៃពុធ ប្រធានាធិបតីអាមេរិកលោក Donald Trump បានដកហូតលទ្ធភាពទទួលបានព័ត៌មានរបស់អតីតនាយកទីភ្នាក់ងារចារកម្មកណ្តាលលោក John Brennan ហើយបានព្រមានអ្នករិះគន់សំខាន់ៗជាច្រើនទៀតថា ពួកគេក៏មានហានិភ័យក្នុងការចុះបញ្ជីខ្មៅផងដែរ។
នៅក្នុងបទបញ្ជាដែលមិនធម្មតាមួយ, លោក Trump បានអះអាងថា លោក Brennan បានក្លាយទៅជា “មនុស្សខុសប្រក្រតី”។
លោក Brennan គឺជាអ្នករិះគន់លោក Trump ជាញឹកញាប់។ ត្រឹមតែប៉ុន្មានម៉ោងប៉ុណ្ណោះមុនពេលលោក Trump ចេញបទបញ្ជា, អតីតប្រធាន CIA រូបនេះបានចោទប្រកាន់មេដឹកនាំគណបក្សសាធារណរដ្ឋថាបានបរាជ័យក្នុងការរស់នៅតាមស្តង់ដាអប្បបរមានៃច្បាប់។
ហើយបន្ទាប់ពីការសម្រេចចិត្តដ៏គួរឲ្យភ្ញាក់ផ្អើលរបស់លោក Trump ត្រូវបានបង្ហាញជាសាធារណៈនៅឯសេតវិមាន, លោក Brennan បានវាយបកទៅវិញយ៉ាងឆាប់រហ័សដោយចោទប្រកាន់គាត់ថាព្យាយាមរារាំងសេរីភាពនៃការបញ្ចេញមតិនៅក្នុងសកម្មភាព “ដែលមានហេតុផលនយោបាយ” ដែលលោកនិយាយថា “គួរព្រួយបារម្ភយ៉ាងខ្លាំងដល់ជនជាតិអាមេរិកទាំងអស់”។
នៅក្នុងសេចក្តីថ្លែងរបស់គាត់ លោក Trump បានស្នើឲ្យអតីតប្រធានចារកម្មរូបនេះលុបចោលការចោទប្រកាន់មិនមានហេតុផលនិងមិនច្បាស់លាស់ទាំងអស់អំពីរដ្ឋបាលរបស់លោក។
ឥឡូវនេះ លោក Brennan អាចបាត់បង់សិទ្ធិទទួលបានព័ត៌មានសម្ងាត់ដែលនេះជាការគួរសមជាទូទៅដែលត្រូវបានផ្តល់ឲ្យអតីតមន្ត្រីជាន់ខ្ពស់។
សេតវិមានត្រូវបានញាំញីដោយរឿងអាស្រូវមួយពាក់ព័ន្ធនឹងសៀវភៅរៀបរាប់លម្អិតរបស់អតីតជំនួយការម្នាក់ក្នុងរយៈពេលប៉ុន្មានថ្ងៃថ្មីៗនេះហើយតែងតែព្យាយាមបន្ធូរបន្ថយវិបត្តិ។
សេតវិមានបាននិយាយថា មន្ត្រីចំនួន៨នាក់ផ្សេងទៀតក៏អាចបាត់បង់សិទ្ធិរបស់ខ្លួនផងដែររួមទាំងអតីតប្រធានស៊ើបអង្កេតជាតិលោក James Clapper, អតីតអ្នកដឹកនាំ CIA និងជាអគ្គមេបញ្ជាការផ្កាយបួនលោក Michael Hayden ព្រមទាំងលោក James Comey ដែលជាអតីតប្រធាន FBI ផងដែរ។
បុគ្គលទាំងនេះត្រូវបានចោទប្រកាន់ដោយគ្មានព័ត៌មានលម្អិតអំពីរឿងនយោបាយនិងការរកប្រាក់ពីសេវាសាធារណៈនិងទទួលបានព័ត៌មានសម្ងាត់៕ AFP
Source: Kampuchea Thmey Daily
0 Comments