រតនគីរី ៖ ក្មេងប្រុសម្នាក់ បានលង់ទឹកអូរស្លាប់បាត់បង់ជីវិត ខណៈឪពុករវល់ទៅបត់ជើងធំ ពេលត្រឡប់មកវិញ ក៏បាត់កូនតែម្តង។
ហេតុការណ៍ភ្ញាក់ផ្អើលបានកើតឡើងកាលពីវេលាម៉ោង៥និង៣០នាទីល្ងាច ថ្ងៃទី១៨ ខែសីហា ឆ្នាំ២០១៨កន្លងទៅ នៅចំណុចអូរកោះពាក្យ ស្ថិតនៅក្នុងភូមិកោះពាក្យ ឃុំកោះពាក្យ ស្រុកវើនសៃ។
សមត្ថកិច្ចមូលដ្ឋានបានឲ្យអ្នកសារព័ត៌មានយើងដឹងថា ក្មេងប្រុសរងគ្រោះឈ្មោះ លឹក អម អាយុ ៧ឆ្នាំ ជាសិស្សថ្នាក់បឋមសិក្សាភូមិកោះពាក្យ ឪពុកដែលនាំកូនទៅមុជទឹកឈ្មោះ លឹក ជនជាតិកាចក់ មុខរបរកសិករ រស់នៅភូមិឃុំខាងកើតហេតុខាងលើ។
សមត្ថកិច្ចបានបញ្ជាក់ថា បើតាមការរៀបរាប់ពីបុរសជាឪពុកប្រាប់សមត្ថកិច្ចថា នៅមុនពេលកើតហេតុ នៅវេលាម៉ោងប្រមាណ ៥ល្ងាច គាត់និងកូនប្រុស បាននាំគ្នាទៅអូរខាងក្រោយផ្ទះចម្ងាយ២០០ម៉ែត្រប៉ុណ្ណោះ ហើយនាំកូនទៅមុជទឹក។ នៅពេលទៅដល់អូរគាត់បានទុកកូនចោលនៅក្បែរមាត់អូរ រួចប្រាប់កូនថា ចាំមួយភ្លែតគាត់ទៅបត់ជើងក្នុងព្រៃឃ្លាតឆ្ងាយពីកូនប្រហែល១០ម៉ែត្របានតែកន្លះម៉ោង ឪពុកក៏ត្រឡប់មកកន្លែងកូនអង្គុយចាំវិញ ស្រាប់តែមកដល់ក៏បាត់កូនអត់ឃើញ។ ក្រោយមកបុរសជាឪពុកស្មានតែកូនដើរទៅផ្ទះមុន គាត់ក៏ត្រឡប់មកផ្ទះ ភ្លាមៗដែរដើម្បីសួរប្រពន្ធនិងកូនក្មួយជុំវិញផ្ទះគាត់ ពេលសួរនាំគ្រប់គ្នារួចប្រពន្ធនិងសាច់ញាតិឆ្លើយថាអត់ឃើញនោះទេ ទើបមានការឆោឡោកើតឡើងតែម្តង។
សមត្ថកិច្ចមូលដ្ឋានបានបន្ថែមទៀតថា ក្មេងប្រុសលង់ទឹកអូរតាំងពីថ្ងៃទី១៨ រហូតដល់ព្រឹកថ្ងៃទី១៩ វេលាម៉ោង៧និង៣០នាទី រកសាកសពមិនទាន់ឃើញនោះទេ ហើយតាមការត្រួតពិនិត្យរបស់សមត្ថកិច្ចក្នុងស្ថានភាពជាក់ស្តែងកន្លែងអូរក្មេងលង់ទឹកនោះជម្រៅទឹកអូរ២-៣ម៉ែត្រ និងទឹកបានហូរតិចៗឆ្ពោះទៅទន្លេសេសាន។
នៅព្រឹកថ្ងៃ១៩ ខែសីហា ឆ្នាំ២០១៨ បងប្អូន សាច់ញាតិនិងសមត្ថកិច្ចកំពុងតែបន្តរាវរកសាកសពក្មេងយ៉ាងសកម្មរហូតដល់ម៉ោង ១០និង៣០នាទីព្រឹកថ្ងៃទី១៩ ខែសីហានេះ ទើបរកឃើញសាកសពក្មេងម្នាក់នោះ និងយកទៅធ្វើបុណ្យតាមប្រពៃណី ហើយក៏គួរឲ្យសោកស្តាយមួយដែរ ដែលឪពុកមានការធ្វេសប្រហែសចំពោះកូនតូចបែបនេះ៕
Source: Kampuchea Thmey Daily
0 Comments