ភ្នំពេញ ៖ សាលារាជធានីភ្នំពេញ បានសម្រេចអនុញ្ញាតឲ្យគណបក្សខ្មែរក្រោកធ្វើយុទ្ធនាការប្រមូលស្នាមមេដៃ នៅទីស្នាក់ការរបស់ខ្លួន ដែលស្ថិតនៅផ្ទះលេខ១១ ផ្លូវលេខ៣៥៣ សង្កាត់បឹងកក់១ ខណ្ឌទួលគោក រាជធានីភ្នំពេញ ដើម្បីសើរើដែនអធិបតេយ្យភាពរបស់ជាតិលើការទាមទារកោះត្រល់ ប៉ុន្តែមិនត្រូវបានអនុញ្ញាតឲ្យធ្វើនៅតាមទីសាធារណៈនោះទេ ជៀសវាងប៉ះពាល់ដល់សណ្តាប់ធ្នាប់សាធារណៈ។
ការអនុញ្ញាតនេះ បានធ្វើឡើងដោយយោងទៅលើកិច្ចប្រជុំ កាលពីថ្ងៃទី១៦ ខែសីហា ឆ្នាំ២០១៨ របស់រដ្ឋបាលរាជធានីភ្នំពេញ។
យោងតាមលិខិតរបស់លោក ឃួង ស្រេង អភិបាលរាជធានីភ្នំពេញ ដែលជម្រាបទៅលោក សុខ សុវណ្ណវឌ្ឍនាសាប៊ុង ប្រធានគណបក្សខ្មែរក្រោក កាលពីថ្ងៃទី១៧ ខែសីហា ឆ្នាំ២០១៨ បានឲ្យដឹងថា ចំពោះសំណើសុំប្រមូលស្នាមមេដៃប្រជាពលរដ្ឋក្នុងការដាក់ញត្តិប្តឹងទៅក្រុមប្រឹក្សាធម្មនុញ្ញសើរើដែនអធិបតេយ្យភាពរបស់ជាតិលើការទាមទារកោះត្រល់ ចាប់ពីថ្ងៃទី១៨ ខែសីហា ឆ្នាំ២០១៨ នៅទីស្នាក់ការកណ្តាលគណបក្សនោះ រដ្ឋបាលរាជធានីភ្នំពេញ សូមធ្វើការណែនាំអនុវត្តដូចតទៅ ទី១. មិនអនុញ្ញាតឲ្យធ្វើសកម្មភាពប្រមូលស្នាមមេដៃរបស់ប្រជាពលរដ្ឋនៅតាមទីសាធារណៈ ទី២. មិនអនុញ្ញាតឲ្យប្រើប្រាស់ឧបករណ៍បំពងសម្លេងផ្សព្វផ្សាយដល់ប្រជាពលរដ្ឋនៅតាមទីសាធារណៈ ទី៣. ក្នុងករណីមានការបង្កភាពចលាចល ដែលនាំឲ្យប៉ះពាល់ដល់អសន្តិសុខជាតិ បាត់បង់សន្តិសុខ សណ្តាប់ធ្នាប់ និងរបៀបរៀបរយសាធារណៈ អាជ្ញាធរមានសិទ្ធិបញ្ឈប់រាល់សកម្មភាពទាំងនោះភ្លាម។
លិខិតលោកអភិបាលរាជធានីភ្នំពេញបានបញ្ជាក់ថា ដើម្បីជៀសវាងប៉ះពាល់ដល់សុវត្ថិភាពសណ្តាប់ធ្នាប់ និងរបៀបរៀបរយសាធារណៈ រដ្ឋបាលរាជធានីភ្នំពេញ ស្នើសហការឲ្យបានល្អជាមួយអាជ្ញាធរមូលដ្ឋាន និងអនុវត្តឲ្យបានម៉ឺងម៉ាត់តាមស្មារតីអង្គប្រជុំកាលពីថ្ងៃទី១៦ ខែសីហា ឆ្នាំ២០១៨ នៅសាលារាជធានីភ្នំពេញ។
ទាក់ទងបញ្ហានេះ លោក សុខសុវណ្ណ វឌ្ឍនាសាប៊ុង បានថ្លែងប្រាប់កម្ពុជាថ្មីកាលពីរសៀលថ្ងៃទី២០ ខែសីហា ឆ្នាំ២០១៨ថា មកដល់ថ្ងៃនេះ យុទ្ធនាការប្រមូលស្នាមមេដៃ ដើម្បីសើរើកោះត្រល់ទទួលបានជាង៣០០០នាក់ហើយ ។ លោកបញ្ជាក់ថា “គ្រាន់តែបើកភ្លាមក្រុមការងារយើងរវល់ណាស់ ស្ទើរតែរកពេលសំរាកគ្មាន ហើយយុទ្ធនាការប្រមូលស្នាមមេដៃធ្វើតែនៅទីស្នាក់ការប៉ុណ្ណោះ ដោយយើងឯកភាពទៅតាមកិច្ចប្រជុំជាមួយសាលាក្រុង។ ជាមួយគ្នានោះយើងសង្ឃឹមថា នឹងទទួលបានស្នាមមេដៃគ្រប់ចំនួន ពីព្រោះយុទ្ធនាការនេះ អត់កំណត់ពេលវេលាទេ យើងប្រមូលរហូតគ្រប់៥ម៉ឺននាក់”។
ចំពោះករណីនេះ អាជ្ញាធររាជធានីភ្នំពេញ និងក្រសួងមហាផ្ទៃ ធ្លាប់បានព្រមានចាត់វិធានការ ទៅតាមច្បាប់ លើយុទ្ធនាការប្រមូលស្នាមមេដៃ របស់គណបក្សខ្មែរក្រោកនេះផងដែរ ប្រសិនបើធ្វើឡើងដោយគ្មានច្បាប់អនុញ្ញាត។
គួររំលឹកថា កាលពីថ្ងៃទី៣១ ខែកក្កដា ឆ្នាំ២០១៨ លោក សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោក បានប្រកាសថា នឹងបើកយុទ្ធនាការមួយឈ្មោះថា “ស្នាមមេដៃមួយដើម្បីកោះត្រល់” ដែលចាប់ផ្ដើមនៅថ្ងៃទី៨ ខែសីហា ឆ្នាំ២០១៨ ហើយនៅថ្ងៃទី០២ ខែសីហា ឆ្នាំ២០១៨ លោក សុខសុវណ្ណ វឌ្ឍនាសាប៊ុង បានដាក់លិខិតមួយទៅសម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ ដើម្បីសុំធ្វើសកម្មភាពប្រមូលស្នាមមេដៃប្រជាពលរដ្ឋដាក់ប្តឹងទៅក្រុមប្រឹក្សាធម្មនុញ្ញ ដើម្បីមោឃភាពសន្ធិសញ្ញា ឆ្នាំ២០០៥។
លោក សុខសុវណ្ណ វឌ្ឍនាសាប៊ុង បញ្ជាក់ថា បញ្ហាកោះត្រល់នេះ ជាបញ្ហារបស់យើងទាំងអស់គ្នា។ លោកអះអាងថា កោះត្រល់ដែលមានទំហំប៉ុនប្រទេសសឹង្ហបូរី គឺជាទ្រព្យសម្បត្តិជាតិ និងជាទ្រព្យសម្បត្តិរួម មិនគួរឲ្យគេរំលោភស្រួលៗនោះឡើយ ដូច្នេះសូមចូលរួមទាំងអស់គ្នា ដោយមិនប្រកាន់និន្នាការនយោបាយឡើយ។
តាមលោក សុខសុវណ្ណ វឌ្ឍនាសាប៊ុង ”ប្រសិនជាកើតមកមិនបានពង្រីកទឹកដីទេ សូមមេត្តាកុំអោបដៃឈរមើលទឹកដី ដែលបាត់បង់ឲ្យសោះ កោះត្រល់ធំណាស់ ស្នាមមេដៃមួយមិនមានអ្វីគួរឲ្យខ្លាចទាល់តែសោះ ព្រោះដូនតាយើងលះបង់សាច់ស្រស់ឈាមស្រស់កសាងទឹកដីនេះឲ្យយើងរស់នៅ ដោយចម្បាំងរាំងជល់លោកមិនដែលខ្លាចផង៕
Source: Kampuchea Thmey Daily
0 Comments