ពានរង្វាន់បាល់ទាត់សម្តេចអគ្គមហាសេនាបតីតេជោ ហ៊ុន សែន ឆ្នាំទី១២ (Hun Sen Cup 2018)ក្រោមការរៀបចំពីសំណាក់គណៈកម្មការប្រកួតបាល់ទាត់ជាតិ(CNCC) សេនាធិការរបស់សហព័ន្ធកីឡាបាល់ទាត់កម្ពុជា នឹងបន្តប្រកួតជើងទី២នៃវគ្គ៨ក្រុមចុងក្រោយ នៅរសៀលថ្ងៃពុធ ទី៨ ខែសីហា ឆ្នាំ២០១៨ នេះ។
សម្រាប់កម្មវិធីប្រកួតជើងទី២ នេះមានសាលាបាល់ទាត់ជាតិ១៨ឆ្នាំត្រូវប៉ះក្រុមអគ្គស្នងការដ្ឋាននគរបាលជាតិ នៅវេលាម៉ោង៣និង៣០នាទីរសៀល លើទីលានសាលាបាល់ទាត់ជាតិបាទី ហើយក្រុមភ្នំពេញក្រោន ប៉ះអង្គរថាយហ្គឺរ នៅវេលាម៉ោង៦និង៣០នាទីល្ងាច លើទីលានកីឡដ្ឋាន RSN Stadium ហើយក្រុមបឹងកេត ប៉ះក្រុមណាហ្គាវើល នៅវេលាម៉ោង៦និង៣០នាទីល្ងាចលើទីលានពហុកីឡដ្ឋានជាតិ និងក្រុមព្រះខ័នរាជស្វាយរៀង ទទួលក្រុមក្រសួងការពារជាតិ នៅវេលាម៉ោង៦និង៣០នាទីល្ងាច លើទីលានកីឡដ្ឋានខេត្តស្វាយរៀង។
សូមរំលឹកថា កាលពីជើងទី១ នៃវគ្គ៨ក្រុមចុងក្រោយនេះឃើញថាក្រុមអង្គរថាយហ្គឺរ ចាញ់ក្រុមភ្នំពេញក្រោន ៣ទល់០ ហើយក្រុមអគ្គស្នងការដ្ឋាននគរបាលជាតិ ឈ្នះក្រុមយុវជនសាលាបាល់ទាត់ជាតិអាយុ១៨ឆ្នាំ ស្របពេលក្រុមណាហ្គាវើល ឈ្នះក្រុមបឹងកេត ២ទល់០ និងក្រុមក្រសួងការពារជាតិ ចាញ់ព្រះខ័នរាជស្វាយរៀង ២ទល់១។ក្រុមដែលឈ្នះទាំង២ជើងមានកៅអីឡើងទៅវគ្គពាក់កណ្ដាលផ្តាច់ព្រ័ត្រ។
គណៈកម្មការប្រកួតបាល់ទាត់ជាតិកម្ពុជា (CNCC) ធ្លាប់បានបញ្ជាក់ថា ពានរង្វាន់សម្តេចតេជោឆ្នាំនេះរៀបចំចំនួន២វគ្គដោយវគ្គទី១ ហៅថាវគ្គជម្រុះថ្នាក់ខេត្ត និងវគ្គទី២ហៅថាវគ្គជម្រុះថ្នាក់ជាតិ ដែលការប្រកួតចាប់ដំណើរការពីថ្ងៃទី៧ ខែមីនា រហូតដល់ថ្ងៃទី៦ខែតុលា ឆ្នាំ២០១៨។ ចំពោះវគ្គជម្រុះតាមថ្នាក់ខេត្តបែងចែក ការប្រកួតជា២វគ្គខុសគ្នាទៀតគឺវគ្គជម្រុះតាមពូល (វគ្គជម្រុះបឋម) និងជម្រុះចុងក្រោយ។ ជាលទ្ធផលក្រុមយុវជនសាលាបាល់ទាត់ជាតិបាទី ជាម្ចាស់ជើងឯក ហើយក្រុមគីរីវង់សុខសែនជ័យ ជាក្រុមជើងឯករង សម្រាប់ការប្រកួតជើងឯកថ្នាក់ជាតិវិញមានក្រុមចំនួន១២ជាសមាជិកពានរង្វាន់លីគកំពូលកម្ពុជា បូកជាមួយក្រុមចំនួន៤ខ្លាំងជាងគេមកពីការប្រកួតជម្រុះជើងឯកថ្នាក់ខេត្ត មានដូចជាក្រុមសាលាបាល់ទាត់ជាតិ គីរីវង់អែហ្វស៊ី កំពត និងកោះកុង។
ក្រុមទាំងអស់ចំនួន១៦ ដោយចាប់ឆ្នោតរើសគូប្រកួតប្តូរទឹកដីគ្នា (ចំនួន២លើក) បន្តស្វែងរកក្រុមឡើងទៅវគ្គ៨ក្រុមចុងក្រោយរហូតដល់វគ្គផ្ដាច់ព្រ័ត្រតែម្តង៕
Source: Kampuchea Thmey Daily
0 Comments