ព្រឹកនេះ សម្តេចតេជោ ហ៊ុនសែន បន្តជួបសំណេះសំណាលជាមួយកម្មករ និយោជិតជាង១ម៉ឺននាក់ នៅតំបន់ផ្លូវវ៉េងស្រេង ក្នុងសង្កាត់ចោមចៅ

ភ្នំពេញ ៖ ដូច ដែលបានសន្យានៅមុនការបោះឆ្នោត សម្តេចតេជោ ហ៊ុនសែន បានបន្តជួបសំណេះសំណាលជាមួយបងប្អូនកម្មករ និយោជិត ជាង ១ ម៉ឺននាក់ នៅវេលាម៉ោង៧ ព្រឹកថ្ងៃទី២ ខែសីហា នេះនៅតំបន់ផ្លូវវ៉េងស្រេង ដែលមកពីរោងចក្រ សហគ្រាសនានានៅក្នុងសង្កាត់ចោមចៅ ខណ្ឌពោធិ៍សែនជ័យ។ សម្តេចតេជោបានផ្អាកការចុះជួបកម្មករនិយោជិត នៅមុនពេលយុទ្ធនាការបោះឆ្នោតចាប់តាំងពីថ្ងៃទី៥ ខែកក្កដា និងបានសន្យាថា ក្រោយបោះឆ្នោតរួចនឹងបន្តចុះជួបបន្តទៀត។

ប្រភពពីក្រសួងការងារបានឲ្យដឹងថា កម្មករ និយោជិត ដែលនឹងអញ្ជើញជួបសំណេះសំណាលជាមួយសម្តេចតេជោ ហ៊ុន សែន នៅថ្ងៃនេះមានចំនួន ១៤.៦៩៧នាក់ មកពីរោងចក្រសហគ្រាសចំនួន២៤ នៅក្នុងខណ្ឌពោធិ៍សែនជ័យ។ រោងចក្រ សហគ្រាសទាំង២៤ ដែលអនុញ្ញាតឲ្យកម្មករ និយោជិតជួបសំណេះសំណាលជាមួយសម្តេចតេជោ ហ៊ុន សែន នៅថ្ងៃពុធនេះ មានថៅកែជាជនជាតិចិនចំនួន១៩, កូរ៉េចំនួន២, សិង្ហបុរីចំនួន១ និងខ្មែរចំនួន១។

ក្នុងនោះ រោងចក្រកាត់ដេរសម្លៀកបំពាក់ចំនួន២១, ផលិតស្បែកជើងចំនួន២ និងបោកគក់ចំនួន១។ ផលិតផលទាំងអស់ត្រូវបាននាំចេញទៅកាន់ទីផ្សារអន្តរជាតិនិងផ្គត់ផ្គង់ទីផ្សារក្នុងប្រទេស។ រោងចក្រសហគ្រាសនៅក្នុងខណ្ឌពោធិ៍សែនជ័យ បានបង្កើតនូវមុខរបរនិងការងារបន្ថែមជាច្រើនងាយស្រួលដល់យុវជនក្នុងការរកការងារធ្វើក្នុងមូលដ្ឋានរបស់ខ្លួន ដូចជារបរជួលផ្ទះ លក់ម្ហូបអាហារ ការដឹកជញ្ជូន និងសេវាកម្មផ្សេងៗទៀត រួមចំណែកក្នុងការអភិវឌ្ឍសេដ្ឋកិច្ច និងជីវភាពរបស់ប្រជាជនក្នុងមូលដ្ឋាន។

បច្ចុប្បន្ន រាជធានីភ្នំពេញ មានរោងចក្រ សហគ្រាស គ្រឹះស្ថានសរុបចំនួន៤,៤៥៣ មានកម្មករនិយោជិតចំនួន៧៧២,៨៣៦នាក់ ដែលមានប្រាក់ឈ្នួលសរុបជាង១,៨៥៥ លានដុល្លារក្នុងមួយឆ្នាំ។ ក្នុងនោះរោងចក្រកាត់ដេរសម្លៀកបំពាក់ និងផលិតស្បែកជើងមានចំនួន៦៨៨ មានកម្មករ និយោជិតចំនួន ៤០៨,២៣៤នាក់ ដែលមានប្រាក់ឈ្នួលសរុបជាង ៩៧៩លានដុល្លារក្នុងមួយឆ្នាំ។

សូមបញ្ជាក់ថា សម្តេចតេជោ ហ៊ុន សែន បានចាប់ផ្តើមចុះបើកវេទិកាសំណេះសំណាលជាមួយកម្មករ កម្មការិនីមកពីតាមរោងចក្រ សហគ្រាស និងគ្រឹះស្ថាននានាតាំងពីថ្ងៃទី២០ ខែសីហា ឆ្នាំ២០១៧ មកម្ល៉េះ។ មកដល់ពេលពេលបច្ចុប្បន្ន សម្តេចតេជោ ហ៊ុន សែន បានអញ្ជើញចុះជួបសំណេះសំណាលជាមួយកម្មករ កម្មការិនីសរុប ៥១លើក ដោយមានកម្មករ កម្មការិនីចូលរួមសរុប ៧០០.២០២នាក់។

សម្តេចតេជោ ហ៊ុន សែន បានថ្លែងថា ការអញ្ជើញចុះជួបសំណេះសំណាលជាមួយកម្មករ កម្មការិនីនេះ ក្នុងបំណងស្វែងយល់ពីទុក្ខលំបាករបស់កម្មករ កម្មការិនី និងដោះស្រាយបញ្ហាប្រឈមរបស់ពួកគេ។ ជាពិសេសដើម្បីជំរុញគោលនយោបាយអភិវឌ្ឍន៍ឧស្សាហកម្ម ឆ្នាំ ២០១៥-២០២៥ ឲ្យបានកាន់ប្រសើរថែមទៀត។

តាមរយៈដំណើរចុះជួបសំណេះសំណាលជាបន្តបន្ទាប់នោះ សម្តេចតេជោ ហ៊ុន សែន បានផ្តល់អត្ថប្រយោជន៍ជាច្រើនដល់កម្មករ កម្មការិនី ហើយក៏ធ្វើឲ្យមានសុខដុមនៅក្នុងវិស័យឧស្សាហកម្មកាត់ដេរ សម្លៀកបំពាក់ និងស្បែកជើងផងដែរ៕