លោក​អភិបាលខណ្ឌ​មានជ័យ​ផ្តល់​រង្វាន់​លើកទឹកចិត្ត​ដល់​សិស្ស​ដែល​ប្រឡង​ជាប់​សញ្ញាបត្រ​មធ្យមសិក្សា​ទុតិយភូមិ​និទ្ទេស A B C​និង​D

ភ្នំ​ពេ​ញ ៖ លោក​ពេជ្រ កែវ​មុនី អភិបាល​នៃ​គ​ណៈ​អភិបាលខណ្ឌ​មានជ័យ​និង​ភរិយា បាន​នាំ​យក​រង្វាន់​លើកទឹកចិត្ត​ដល់​សិស្សានុសិស្ស​ដែល​បាន​ប្រឡង​ជាប់​សញ្ញាបត្រ​មធ្យមសិក្សា​ទុតិយភូមិ​និទ្ទេស A B C​និង​D​។

ពិធី​ប្រគល់​រង្វាន់​នេះ​ បាន​ប្រព្រឹត្តិ​ធ្វើឡើង​នៅ​ព្រឹក​ថ្ងៃទី​២២​ ខែកញ្ញា ​នៅក្នុង​បរិវេណ​វិទ្យាល័យ​សម្តេច​តេ​ជោ ហ៊ុន សែន ចាក់​អង្រែ​ក្រោម​ ខណ្ឌមានជ័យ​ រាជធានី​ភ្នំពេញ​។​ រង្វាន់​លើកទឹកចិត្ត​ដល់​សិស្ស​ដែល​ប្រឡង​ជាប់​គឺ​និទេ្ទស​A​ចំនួន​២​នាក់ ​ក្នុង​ម្នាក់ៗ ​ទទួល​បាន​ម៉ូតូ​មួយ​គ្រឿង​ម៉ា​កវេ​វ​ស៊េរី​២០១៨​។



និទ្ទេស​B​ចំនួន​៧​នាក់ ​ទទួល​បាន​កុំព្យូទ័រ​ម្នាក់​១​គ្រឿង​។ ​និទ្ទេស​C​ចំនួន​២២​នាក់​ក្នុង​ម្នាក់ៗ​ទទួលបាន​ថវិកា​ចំនួន​១០០​ដុល្លារ​។​ និទ្ទេស​D​ចំនួន​៣៨​នាក់​ក្នុង​ម្នាក់ៗ​ទទួលបាន​៥០​ដុល្លារ​។

ក្នុង​ពិធី​ប្រគល់​រង្វាន់​ដល់​សិស្ស​ជាប់​សញ្ញាបត្រ​មធ្យមសិក្សា​ទុតិយភូមិ​ខាងលើ​នេះ​ លោក​ពេជ្រ កែវ​មុនី បាន​មានប្រសាសន៍​ទៅកាន់​ប្អូនៗ​យុវ​សិស្ស​ដែល​ទទួលបាន​រង្វាន់​ថា រង្វាន់​លើកទឹកចិត្ត​ខាងលើ​គឺជា​ថវិកា​ផ្ទាល់​របស់​លោក​អភិបាល​ និង ​ភរិយា ​ខ​ណៈ​ដែល​លោក​បានឃើញ​ការសិក្សា​របស់​ប្អូន​មាន​និទ្ទេស​ល្អ​ណាស់​ហើយ​ចាំបាច់​និង​ត្រូវ​ទទួល​បាន​រង្វាន់​ពី​លោក​ផ្ទាល់​។

និទ្ទេស​ដ៏​ល្អ​បែបនេះ​ គឺ​ដោយសារតែ​ប្អូនៗ​ខិតខំ​រៀនសូត្រ​ទើប​ទទួល​បាន​និទ្ទេស​ល្អ​ហើយ​ប្អូនៗ​ដែល​ប្រឡង​ធ្លាក់​គឺ​ត្រូវ​ខិតខំ​រៀនសូត្រ​បន្តទៅ​ទៀត​ កុំ​បាក់​ទឹកចិត្ត​ឲ្យ​សោះ​។​ លោកអភិបាលខណ្ឌ​បាន​ធ្វើ​ការ​កោតសរសើរ​ដល់​ប្អូនៗ​ដែល​ខិតខំ​រៀនសូត្រ​រហូតដល់​ប្រឡង​ជាប់​សញ្ញាបត្រ​មធ្យមសិក្សា​ទុតិយភូមិ ​ដែល​ទទួល​បាន​និទ្ទេស​ល្អ​ពិសេស​ប្អូនៗ​សុទ្ធ​តែ​ជា​កូន​ល្អ​សិស្ស​ល្អ​ហើយ​គេច​ផុត​ពី​ការ​សេព​គ្រឿងញៀន​ទៀតផង​។​ ការ​ខិតខំ​សិក្សា​របស់​ប្អូនៗ​ធ្វើ​ឲ្យ​ឪពុក​ម្តាយ​លោក​ពេញចិត្ត​ ព្រោះ​បានកូន​គោរព​តាម​ដំបូន្មាន​បាន​ល្អ ​ទើប​ក្លាយជា​សិស្ស​ពូកែ​បែបនេះ​៕

Source: Kampuchea Thmey Daily