កណ្តាល ៖ ឈ្មួញគ្រឿងញៀន២នាក់ ត្រូវបានកម្លាំងនគរបាលស្រុកស្អាងចាប់ខ្លួនជាមួយវត្ថុតាងថ្នាំញៀនចំនួន២២កញ្ចប់នៅថ្ងៃទី ២១ ខែ កញ្ញា ឆ្នាំ២០១៨ វេលាម៉ោង ១៥និង០០នាទី ចំណុច រោងស្នាក់នៅរបស់ឈ្មោះ ម៉េង វិចិត្ត ស្ថិតក្នុងភូមិ ពោធិ៍កណ្តាល ឃុំ ត្រើយស្លា ស្រុកស្អាង ខេត្តកណ្តាល។
លោកវរសេនីយ៍ឯក សេង សុជាតិ អធិការនគរបាលស្រុកស្អាងបានឲ្យដឹងថា ជនសង្ស័យ ចំនួន០២នាក់ (ឃាត់ខ្លួន) ១ / ឈ្មោះ ម៉េង វិចិត្ត ភេទប្រុស អាយុ២៣ឆ្នាំ ជនជាតិខ្មែរ មុខរបរកម្មករបេះស្វាយ ទីលំនៅបច្ចុប្បន្នភូមិ ពោធិ៍កណ្តាល ឃុំត្រើយស្លា ស្រុកស្អាង ខេត្តកណ្តាល។
២ / ឈ្មោះ អ៊ ណារ៉ា ហៅ ម៉ាយ ភេទប្រុស អាយុ២២ឆ្នាំ ជនជាតិខ្មែរ មុខរបរកសិករ ទីលំនៅបច្ចុប្បន្នភូមិព្រែកប៉ាន ឃុំត្រើយស្លា ស្រុកស្អាង ខេត្តកណ្តាល។ វត្ថុតាងចាប់យករួមមាន១ / ម្សៅក្រាមពណ៌សថ្លាសង្ស័យថា ជាសារធាតុញៀន(ម៉ាទឹកកក) ចំនួន២២កញ្ចប់ ក្នុងនោះ ធំ ០១កញ្ចប់ , មធ្យម ០៣កញ្ចប់ និង១៨កញ្ចប់តូច។ ២ / ឧបករណ៍សំរាប់ប្រើប្រាស់មួយចំនួន។
លោកអធិការបញ្ជាក់ថា នៅថ្ងៃទីខែឆ្នាំវេលាម៉ោងកើតហេតុ ក្រោយទទួលបានព័ត៌មានពីប្រជាពលរដ្ឋល្អថា មានករណីជួញដូរគ្រឿងញៀន នៅចំណុចខាងលើ។ ភ្លាមនោះកម្លាំងផ្នែកប្រឆាំងបទល្មើសគ្រឿងញៀន សហការជាមួយកម្លាំងប៉ុស្តិ៍នគរបាលត្រើយស្លា បានចុះដល់ចំណុចកើតហេតុ។
ដោយមានការចូលរួមពីលោកមេភូមិពោធិ៍កណ្តាល សមត្ថកិច្ចនគរបាល បានធ្វើការត្រួតពិនិត្យ រោងស្នាក់នៅរបស់ឈ្មោះ ម៉េង វិចិត្ត រកឃើញម្សៅក្រាម ពណ៌សថ្លាសង្ស័យជាសារធាតុញៀន(ម៉ាទឹកកក)ចំនួន ០៧កញ្ចប់តូច នៅក្នុងរោង រួចឃាត់ខ្លួនជនសង្ស័យ រួមនឹងវត្ថុតាង បញ្ជូនមកប៉ុស្តិ៍នគរបាលរដ្ឋបាលត្រើយស្លា ដើម្បីសាកសួរ។
នៅចំពោះមុខសមត្ថកិច្ចនគរបាល ឈ្មោះ ម៉េង វិចិត្ត បានសារភាពថា ខ្លួនបានទិញគ្រឿងញៀន(ម៉ាទឹកកក)ចំនួន ០១កញ្ចប់ធំ តម្លៃ ១០០,០០០៛ (ដប់ម៉ឺនរៀល) ពីឈ្មោះ អ៊ ណារ៉ា ហៅ ម៉ាយ នៅភូមិព្រែកប៉ាន ឃុំត្រើយស្លា ស្រុកស្អាង ខេត្តកណ្តាល ដើម្បីយកមកវេចខ្ចប់លក់បន្ត។
នៅវេលាម៉ោង១៦និង០០នាទី ថ្ងៃខែឆ្នាំដដែល ដោយទទួលបានការឯកភាពពីលោក លាវ ស្រេង ព្រះរាជអាជ្ញាសាលាដំបូងខេត្តកណ្តាល អនុញ្ញាតឲ្យសមត្ថកិច្ចនគរបាលស្រុកស្អាង បន្តទៅឃាត់ខ្លួនឈ្មោះ អ៊ ណារ៉ា ហៅ ម៉ាយ នៅភូមិ ព្រែកប៉ាន ឃុំត្រើយស្លា ស្រុកស្អាង ខេត្តកណ្តាល និងត្រួតពិនិត្យឆែកឆេរលំនៅឋានរបស់ឈ្មោះ អ៊ ណារ៉ា រកឃើញម្សៅក្រាមពណ៌សថ្លាសង្ស័យជាសារធាតុញៀន(ម៉ាទឹកកក)ចំនួន ១៥កញ្ចប់ ក្នុងនោះ ធំ ០១កញ្ចប់ , មធ្យម ០៣កញ្ចប់ និង តូច ១១កញ្ចប់។
នៅចំពោះមុខសមត្ថកិច្ចនគរបាល ឈ្មោះ អ៊ ណារ៉ា ហៅ ម៉ាយ បានសារភាពថា ខ្លួនបានទៅទិញគ្រឿងញៀន(ម៉ាទឹកកក)ចំនួន ០១កញ្ចប់ធំ តម្លៃ ៣,២០០,០០០៛ (បីលានពីរសែនរៀល) ពីឈ្មោះ ស្រួច ភេទប្រុស អាយុ៣៥ឆ្នាំ នៅចំណុចវត្តព្រែកដូង ឃុំកំពង់ស្វាយ ស្រុកកៀនស្វាយ ខេត្តកណ្តាល ដើម្បីយកមកវេចខ្ចប់លក់បន្ត ហើយឈ្មោះ អ៊ ណារ៉ា បានសារភាពបន្ថែមទៀតថា ខ្លួនពិតជាបានលក់គ្រឿងញៀន(ម៉ាទឹកកក)ចំនួន ០១កញ្ចប់ធំ តម្លៃ ១៥០,០០០៛ ទៅកាន់ឈ្មោះ ម៉េង វិចិត្ត ពិតប្រាកដមែន។
បច្ចុប្បន្នជនសង្ស័យទាំងពីរនាក់ បានឃាត់ខ្លួននៅអធិការដ្ឋាននគរបាលស្រុកស្អាងដើម្បីបន្ដអនុវត្ដតាមនីតិវីធី៕
Source: Kampuchea Thmey Daily
0 Comments