ភ្នំពេញ ៖ ចិនគ្រោងនឹងបង្កើតសាលាបណ្តុះបណ្តាលតាមប្រព័ន្ធអនឡាញជាលើកដំបូងនៅកម្ពុជា ដើម្បីបង្កើនសមត្ថភាពដល់សិស្សនិងបុគ្គលិកជំនាញឲ្យកាន់តែប្រសើរឡើងថែមទៀតឆ្លើយតបទៅតាមតម្រូវការទីផ្សារការងារនាពេលបច្ចុប្បន្ន។
លោក ឡៅ ហ៊ឹម ប្រតិភូរាជរដ្ឋាភិបាលទទួលបន្ទុកជាអគ្គនាយកអប់រំ បណ្តុះបណ្តាលបច្ចេកទេស និងវិជ្ជាជីវៈបានមានប្រសសាសន៍ថា ភាគីចិននឹងបង្កើតវិទ្យាស្ថានអាស៊ានអនឡាញ ថ្មីដោយបំពាក់នូវឧប ករណ៍និងសម្ភារៈទំនើបៗ រៀបចំកម្មវិធីសិក្សាទាន់សម័យដោយផ្តោតទៅលើផ្នែកព័ត៌មានវិទ្យា ទេសចរណ៍ ពាណិជ្ជកម្ម គណនេយ្យនិងជំនាញផ្សេងៗទៀតដើម្បីចូលរួមអភិវឌ្ឍន៍ប្រទេសកម្ពុជាឲ្យក្លាយទៅជាប្រទេសដែលមានប្រាក់ចំណូលមធ្យមកំរិតខ្ពស់នាឆ្នាំ២០៣០ខាងមុខ។
ថ្លែងក្រោយជំនួបរវាងលោកបណ្ឌិត អ៊ិតសំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈជាមួយលោក ជាង ហាវ អគ្គនាយកក្រុមហ៊ុនJOIN CAPITAL INVESTMENT&MANAGEMENT កាលពីព្រឹក ថ្ងៃទី២៦ ខែកញ្ញា ឆ្នាំ២០១៨ នៅទីស្តីការក្រសួង លោក ឡៅ ហ៊ឹម បានបន្តថា ការសិក្សាតាមប្រព័ន្ធអនឡាញនេះ គឺមិនតម្រូវឲ្យសិស្សរៀននៅក្នុងថ្នាក់គ្រប់ពេលវេលានោះទេ គឺគ្រូធ្វើបទបង្ហាញមេរៀនផ្សេងៗដល់សិស្សតាមរយៈវីដេអូខុនហ្វឺរិនដែលអាចជួយឲ្យសិស្សនិស្សិតរៀនឆាប់ចេះឆាប់ចាំតាមរយៈការបង្ហាត់បង្រៀនពីគ្រូនិងសាស្ត្រាចារ្យដែលមានជំនាញនិងបទពិសោធន៍ខ្ពស់ មកពីប្រទេសចិន។
លោកបានបន្ថែមថា «ខ្ញុំគិតថាការដែលមានសាលានេះជាការល្អមួយដើម្បីជួយសម្រួលដល់យុវជនក៏ដូចជាអ្នកដែលកំពុងមានការងារធ្វើអាចឆ្លៀតពេលវេលាសិក្សាបន្ថែមដើម្បីបន្ថែមចំណេះដឹងក៏ដូចជាអ្នកមិនទាន់មានការងារអាចសិក្សាផ្តល់នូវជម្រើសច្រើនសម្រាប់យុវជនខ្មែរយើងដើម្បីឲ្យគាត់សិក្សាបាន»។
នៅក្នុងជំនួយនោះ លោកបណ្ឌិត រដ្ឋមន្ត្រីបានស្នើឲ្យភាគីចិនត្រូវរៀបចំកម្មវិធីសិក្សាធ្វើយ៉ាងឲ្យស្របទៅនឹងគោលការណ៍របស់វិស័យអប់រំកម្ពុជាដើម្បីឲ្យសិស្សពេលរៀនចប់អាចមានលទ្ធភាពបន្តការសិក្សានៅតាមសាលាផ្សេងៗក្នុងស្រុកបានឬអាចទៅបន្តការសិក្សានៅប្រទេសចិន។
លោក ឡៅ ហ៊ឹម សង្ឃឹមថាសាលានេះនឹងអាចដំណើរការនាពេលឆាប់ៗខាងមុខនេះដើម្បីឲ្យសិស្សនិស្សិតឬអ្នកមានការងារធ្វើបានសិក្សាមុខជំនាញបន្ថែមបង្កើនសមត្ថភាពរបស់ខ្លួនឲ្យកាន់តែប្រសើរឡើងថែមទៀត។
លោក ជាង ហាវ បានមានប្រសាសន៍ថា ការសម្រេចចិត្តបង្កើតសាលាសិក្សាតាមអនឡាញនៅប្រទេសកម្ពុជានេះ គឺដើម្បីចូលរួមអភិវឌ្ឍន៍ធនធានមនុស្សនៅប្រទេសកម្ពុជាឲ្យបានកាន់តែប្រសើរឡើងថែមទៀតឆ្លើយតបទៅនឹងការរីកចម្រើនរបស់ពិភពលោក។
លោកបានសន្យាថានឹងខិតខំបង្កើតសាលាសិក្សាតាមអនឡាញនេះឲ្យបានឆាប់បំផុតដើម្បីឲ្យសិស្សនិស្សិតនិងប្រជាពលរដ្ឋកម្ពុជាអាចសិក្សានូវជំនាញផ្សេងៗបានពិសេសជំនាញដែលអាចឆ្លើយតបទៅនឹងតម្រូវការទីផ្សារបច្ចុប្បន្ន។
គួរបញ្ជាក់ថា បច្ចុប្បន្ននេះមានសាលាបណ្តុះបណ្តាលវិជ្ជាជីវៈចំនួន៣៩ស្ថិតក្រោមឱវាទរបស់ក្រសួងការងារនិងបណ្តុះបណ្តាលវិជ្ជាជីវៈក្នុងនោះមានសាលាចំនួន១៧ត្រូវបានទទួលស្គាល់ជាលក្ខណៈអន្តរជាតិ៕
Source: Kampuchea Thmey Daily
0 Comments