អូស្ត្រាលី​សម្លាប់​ត្រី​ឆ្លាម​៤​ក្បាល​បន្ទាប់ពី​វាយប្រហារ​អ្នកទេសចរ

ត្រី​ឆ្លាម​ចំនួន​បួន​ក្បាល​ត្រូវបាន​សម្លាប់​នៅក្នុង​ប្រទេស​អូស្ត្រាលី​បន្ទាប់ពី​ស្ត្រី​ម្នាក់​និង​ក្មេងស្រី​អាយុ​១២​ឆ្នាំ​ម្នាក់​ត្រូវបាន​វាយប្រហារ​នៅ​កន្លែង​ទេសចរណ៍ Great Barrier Reef ដ៏​មាន​ប្រជាប្រិយ​។​

អ្នក​ទាំងពីរ​នៅតែ​ស្ថិតក្នុង​មន្ទីរពេទ្យ​កាលពី​ថ្ងៃអាទិត្យ​បន្ទាប់ពី​រង​ការវាយប្រហារ​នៅក្នុង​ឧប្បត្តិហេតុ​ដាច់ដោយឡែក​ពីគ្នា​ត្រឹមតែ​មួយថ្ងៃ​ប៉ុណ្ណោះ​កាលពី​សប្ដាហ៍​មុន​នៅ​កោះ Whitsunday ។​

អ្នកនាំពាក្យ​នាយកដ្ឋាន​ជលផល​រដ្ឋ Queensland បាន​និយាយ​កាលពី​ថ្ងៃអាទិត្យ​ថា Drum lines ដែល​ប្រើ​នុយ​ដើម្បី​ចាប់​ត្រី​បាន​ប្រមាញ់​ត្រី​ឆ្លាម​ខ្លា​ចំនួន​៤​ក្បាល​ដែល​មួយ​ក្បាលមាន​ប្រវែង​៣.៧​ម៉ែត្រ​និង​ផ្សេងៗ​ទៀត​មាន​ប្រវែង​ពី​២​ទៅ​៣​ម៉ែត្រ​។​
​លោក​បាន​និយាយថា “​ខណៈដែល​ត្រី​ឆ្លាម​មាន​ទំហំ​ប៉ុន​នេះ​អាច​បង្ក​គ្រោះថ្នាក់​ខ្លាំង​ដល់​មនុស្ស​នោះ វា​មិន​ច្បាស់​ទេ​ថា​តើ​ពួកគេ​ទទួលខុសត្រូវ​ចំពោះ​ការរង​របួស​ដល់​អ្នក​ហែល​ទឹក​ទាំងពីរ​នាក់​ដែល​ឬក៏​អត់​”​។​

អ្នកនាំពាក្យ​រូបនេះ​បាន​និយាយថា វា​ច្បាស់​ណាស់​ថា​មាន​ត្រី​ឆ្លាម​សកម្ម​ក្នុង​ចំនួន​ដ៏​ច្រើន​នៅក្នុង​ទឹក​នៃ​តំបន់​នេះហើយ​ប្រជាជន​ត្រូវបាន​ជំរុញ​កុំ​ឲ្យ​ហែល​ទឹក​។​
Drumline នឹង​បន្ត​ដាក់​រហូតដល់​សប្តាហ៍​ក្រោយ​។​

ការវាយប្រហារ​ដោយ​ត្រី​ឆ្លាម​គឺជា​រឿង​ដ៏​កម្រ​នៅ​ប្រជុំ​កោះ Whitsunday ដោយ​ការវាយប្រហារ​ចុងក្រោយ​បំផុត​ត្រូវបាន​គេ​រាយការណ៍​កាលពី​៨​ឆ្នាំមុន​។ នេះ​បើ​យោងតាម​ការ​ឲ្យ​ដឹង​ពី​សារព័ត៌មាន​ជាតិ ABC ។​

ការវាយប្រហារ​នេះ​បានធ្វើ​ឲ្យ​មានការ​ជជែក​វែកញែក​ជាថ្មី​អំពី​របៀប​ដែល​ល្អ​បំផុត​ដើម្បី​កាត់បន្ថយ​ហានិភ័យ​នៃ​ការជួបគ្នា​រវាង​ត្រី​ឆ្លាម​និង​ការកើនឡើង​នៃ​ចំនួន​មនុស្ស​ដែល​ប្រើប្រាស់​មហាសមុទ្រ​ដើម្បី​កម្សាន្ត​។​

ក្រុម​អ្នក​អភិរក្ស​និង​អ្នកវិទ្យាសាស្ត្រ​សមុទ្រ​បាន​ជំទាស់​ចំពោះ​ការសម្លាប់​ត្រី​ឆ្លាម​ហើយ​ទទូចថា drum line គឺជា​ឧបករណ៍​រិល​ព្រោះ​ពួកគេ​ជា​ញឹកញាប់​ចាប់បាន​សត្វ​ផ្សេងៗ​៕ AFP

​

Source: Kampuchea Thmey Daily