អ៊ីរ៉ង់​ ចង្អុល​ដាក់​សម្ព័ន្ធមិត្ត​របស់​អាមេរិក​ពាក់ព័ន្ធ​ការ​វាយប្រហារ​ដ៏​សាហាវ

ប្រធានាធិបតី​អ៊ីរ៉ង់​លោក Hassan Rouhani កាលពី​ថ្ងៃអាទិត្យ​ បាន​ស្តីបន្ទោស​ទៅលើ​ក្រុម​បំបែក​ខ្លួន​អារ៉ាប់​ចំពោះ​ការវាយប្រហារ​យ៉ាង​ឃោរឃៅ​ទៅលើ​ក្បួនព្យុហយាត្រា​យោធា​មួយ ​ហើយ​បាន​ចោទប្រកាន់​រដ្ឋ​ឈូង​សមុទ្រ​ ដែល​គាំទ្រ​ដោយ​សហរដ្ឋអាមេរិក​មួ​យ​ថា​បាន​គាំទ្រ​ពួកគេ។

ក្រុង​តេ​រ៉ង់​ក៏បាន​កោះហៅ​អ្នកការទូត​មកពី​ប្រទេស​ដា​ណឺ​ម៉ាក ហូ​ឡង់​និង​ចក្រភព​អង់គ្លេស​ផងដែរ​ដោយ​សង្ស័យថា​បាន​ទទួលយក​សមាជិក​នៃ​ក្រុម​សង្ស័យ​ពាក់ព័ន្ធ​នឹង​ការវាយប្រហារ​កាលពី​ថ្ងៃ​សៅរ៍​ដែល​បានសម្លាប់​មនុស្ស​ចំនួន​២៤​នាក់​។​

សកម្មប្រយុទ្ធ​ចំនួន​៤​នាក់​បាន​វាយប្រហារ​ក្បួនព្យុហយាត្រា​មួយ​ដែល​រំលឹក​ដល់​ការចាប់ផ្តើម​នៃ​សង្គ្រាម​អ៊ីរ៉ាក់​-​អ៊ីរ៉ង់​ឆ្នាំ​១៩៨០-១៩៨៨​នៅ​ទីក្រុង Ahvaz ភាគខាងត្បូង​។​

ក្រុមមន្ត្រី​និង​សាក្សីផ្ទាល់ភ្នែក​ម្នាក់​បាន​និយាយថា ខ្មាន់កាំភ្លើង​បាន​ស្លៀកពាក់​ឯកសណ្ឋាន​កងទ័ព​អ៊ីរ៉ង់​ហើយ​បាន​បាញ់រះ​ទៅលើ​ហ្វូងមនុស្ស​ដោយ​ប្រើ​អាវុធ​ដែល​ពួកគេ​បាន​លាក់ទុក​នៅក្នុង​សួន​ក្បែរ​នោះ​។​

ក្រុម​ជី​ហាដ​និយម​រដ្ឋ​ឥស្លាម (IS) បានប្រកាស​ទទួលខុស​ត្រូវ​ចំពោះ​ការវាយប្រហារ​ដ៏​កម្រ​នេះ​។ ប៉ុន្តែ​អាជ្ញាធរ​អ៊ីរ៉ង់​យល់ឃើញថា ចលនា​បំបែក​ខ្លួន​អារ៉ាប់​គឺ​រណសិរ្ស Ahwazi Democratic Popular Front (ADPF) ឬ Al-Ahwazi គឺជា​ជនសង្ស័យ​ដ៏​សំខាន់​។​

លោក​ប្រធានាធិបតី Rouhani បាន​និយាយថា “​ប្រទេសមួយ​ក្នុងចំណោម​បណ្តា​ប្រទេស​នៅ​ភាគខាងត្បូង​នៃ​ឈូង​សមុទ្រ​ពែ​រ្ស​គឺ​បាន​យកចិត្តទុកដាក់​ចំពោះ​តម្រូវការ​ផ្នែក​ហិរញ្ញវត្ថុ អាវុធ​និង​នយោបាយ​របស់​ពួកគេ​។ ប្រទេស​ទាំងអស់នេះ​ដែល​យើង​ឃើញ​នៅក្នុង​តំបន់​នេះ​គឺ​ត្រូវបាន​គាំទ្រ​ដោយ​សហរដ្ឋអាមេរិក​។ វា​គឺជា​ជនជាតិ​អាមេរិក​ដែល​ញុះញង់​ពួកគេ​”​។​

ទោះបីជា​យ៉ាងណាក៏ដោយ សហរដ្ឋអាមេរិក​បាន​ថ្កោលទោស​ចំពោះ​ការវាយប្រហារ​នេះ​ដោយ​បេសកជន​របស់​អង្គការសហប្រជាជាតិ​បាន​និយាយថា វា​បាន​កើតឡើង​ដោយសារតែ​លោក Rouhani បាន​ជិះជាន់​ប្រជាជន​របស់លោក​អស់​រយៈពេល​ជា​យូរ​មកហើយ​។​

ក្រសួងការបរទេស​អ៊ីរ៉ង់​បាន​កោះហៅ​អ្នកការទូត​មកពី​ប្រទេស​ដា​ណឺ​ម៉ាក ហូ​ឡង់​និង​អង់គ្លេស​ដើម្បី​តវ៉ា​ពួកគេ​អំពី​ការទទួលយក​សមាជិក​មួយចំនួន​នៃ​ក្រុម​ភេរវកម្ម​និង​បទដ្ឋាន​ទ្វេ​រដង​ក្នុងការ​ប្រយុទ្ធ​ប្រឆាំងនឹង​អំពើ​ភេរវកម្ម​។​

ប្រទេស​អ៊ីរ៉ង់​ក៏បាន​ព្រមាន​អារ៉ាប់​រួម​ផងដែរ​អំពី “​សុន្ទរកថា​ប្រមាថមើលងាយ​” បន្ទាប់ពី​ការវាយប្រហារ​។​

ប្រទេស​អូ​ម៉​ង់ គុយ​វ៉ែត​និង​កាតា​បានចេញ​សេចក្តីថ្លែងការណ៍​ថ្កោលទោស​ការវាយប្រហារ​ខ​ណៈ​អារ៉ាប៊ីសាអ៊ូឌីត​និង​បា​រ៉ែ​ន​មិនទាន់​បញ្ចេញ​ប្រតិកម្ម​នៅឡើយ​ទេ​៕ AFP

​

Source: Kampuchea Thmey Daily