បាត់ដំបង ៖ មួយរយៈកន្លងទៅនេះ ទឹកទន្លេបានជោរជន់ ព្រមទាំងបានវាយប្រហារទៅលើលំនៅឋានជាច្រើនខ្នង រួមជាមួយនឹងសាលារៀនមួយកន្លែងផងដែរ ដែលក្នុងនោះហេដ្ឋារចនាសម្ព័ន្ធមួយចំនួន ដូចជាផ្លូវមួយខ្សែដែលសម្រាប់ការធ្វើដំណើររបស់ប្រជាពលរដ្ឋរួមជាមួយនឹងស្រូវរាប់ពាន់ហិកតា ក៏ត្រូវទឹកជំនន់បំផ្លិចបំផ្លាញដែរ។
គួរបញ្ជាក់ដែរថា បើទោះបីជាតំបន់មួយចំនួន ដែលបានរងនូវការបំផ្លិចបំផ្លាញពីសំណាក់ទឹកជំនន់ បាននិងកំពុងស្រកផុតទៅហើយក៏ដោយ ក៏នៅមានតំបន់ខ្លះកំពុងប្រឈមយ៉ាងធ្ងន់ធ្ងរជាមួយនឹងទឹកជំនន់នេះនៅឡើយ ដោយសារតែតំបន់នេះ ជាតំបន់ទំនាប និងនៅមិនឆ្ងាយពីមាត់ព្រៃរនាម។
បើតាមការរៀបរាប់ពីលោក ក្រួច ណារ៉ុង មេប៉ុស្តិ៍ នគរបាលរដ្ឋបាល អន្លង់វិល ដែលលោកកំពុងធ្វើការណែនាំដល់បណ្តាម្ចាស់កាណូតស្មាច់ទាំងអស់ ដែលកំពុងប្រកបមុខរបរដឹកមនុស្សម្នាដើរលេងកម្សាន្តនៅលើផ្ទៃទឹកដែលកំពុងជន់ជោរ ដើម្បីអោយមានការប្រុងប្រយ័ត្នក្នុងការបើកបរ និងត្រូវមានអាវពោងសម្រាប់ការពារពេលមានអាសន្ននៅលើផ្ទៃទឹកគឺលោកបានបង្ហើបថា តំបន់ខាងលើនេះគឺស្ថិតនៅចំណុច អណ្តូង២ ឬចំណុចខ្សោយក្នុងភូមិដំបូកបុណ្យ ឃុំអន្លង់វិល ស្រុកសង្កែ ខេត្តបាត់ដំបង ដែលមានចម្ងាយពីទីរួម ស្រុកសង្កែ ប្រមាណ ២០ គីឡូម៉ែត្រ។
លោកបានបន្ថែថា បច្ចុប្បន្នគេសង្កេតឃើញ មាន ផ្ទះប្រជាពលរដ្ឋប្រមាណ ជាង ៤០ ខ្នងត្រូវបានទឹកជន់លិចដល់ក្រោមផ្ទះ ក្នុងនោះក៏មានសាលាបឋមសិក្សា « អណ្តូង ២ »ផងដែរ ដែលត្រូវទឹកលិចដល់របងសាលា ចំណែកផ្លូវមួយខ្សែដែលសម្រាប់អោយប្រជាពលរដ្ឋក្នុងភូមិ ធ្វើដំណើរក៏ត្រូវលិចទាំងស្រុង មិនត្រឹមតែប៉ុណ្ណោះទេ វាលស្រែដ៏ល្វឹងល្វើយប្រមាណជាង ៥០០០ ហិកតា ក៏ត្រូវរលួយអស់ដែរ នៅក្រោមកម្ពស់ទឹកជាង ២ ម៉ែត្រ។
បច្ចុប្បន្នតំបន់ខាងលើ ដែលមើលទៅឃើញតែផ្ទៃទឹកខៀវស្រងាត់នោះ បានក្លាយទៅជា តំបន់កម្សាន្តរបស់ក្រុមយុវវ័យ និងមនុស្សគ្រប់ស្រទាប់វណ្ណៈទៅវិញ ដោយសារតែទីតាំងនេះ មានផ្លូវអាចធ្វើចរាចរណ៍ដល់តែម្តងតាមរយៈលើខ្នងទំនប់ ព្រមទាំងមានចំណីអាហារចម្រុះសម្រាប់អ្នកដើរកំសាន្តផងដែរ៕
Source: Kampuchea Thmey Daily
0 Comments