កំពង់ស្ពឺ ៖ នៅថ្ងៃពុធ ទី១៩ ខែកញ្ញា សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានបង្ហាញសុទិដ្ឋិនិយមថា នៅក្នុងអាណត្តិរដ្ឋាភិបាលនីតិ កាលទី ៦ នេះប្រាក់ចំណូលប្រចាំឆ្នាំសម្រាប់ប្រជាពលរដ្ឋកម្ពុជាម្នាក់ៗនឹងកើនដល់ជាង ២.០០ ០ ដុល្លារ។ ខណៈពេលបច្ចុប្បន្នប្រាក់ ចំណូលរបស់ប្រជាពលរដ្ឋកម្ពុជាប្រចាំឆ្នាំមានប្រមាណ ១.៥៦០ ដុល្លារ។
សម្តេចតេជោនាយករដ្ឋមន្ត្រីបានបង្ហាញក្តីរំពឹងនេះដោយបានធ្វើការវាយតម្លៃទៅលើស្ថានភាពសេដ្ឋកិច្ចកម្ពុជានិងស្ថេរភាពម៉ាក្រូសេដ្ឋកិច្ចរបស់ប្រទេសដែលមានកំណើនសេដ្ឋកិច្ចប្រមាណជាង ៧ ភាគរយក្នុង១ឆ្នាំ និង អត្រាអតិផរណានៃម៉ាក្រូសេដ្ឋកិច្ចស្ថិតក្នុងរង្វង់ជាង ៣ ភាគរយ។
សម្តេចតេជោ ហ៊ុន សែន បានលើកឡើងថា តាមការវាយតម្លៃរបស់អង្គភាពអាស៊ានបូកបីដែលជាយន្តការមួយក្នុងការវាយតម្លៃមិនអន់ ជាងសមត្ថភាពរបស់ធនាគារពិភពលោកនិងរូបិយវត្ថុអន្តរជាតិនោះ បានធ្វើការវាយតម្លៃសេដ្ឋកិច្ចកម្ពុជានៅក្នុងពេលរៀបចំរាជរដ្ឋាភិបាលថ្មីថា សេដ្ឋកិច្ចកម្ពុជានៅឆ្នាំនេះ នឹងមានការកើនឡើង ៧,២ ភាគរយ។ នៅក្នុងច្បាប់ថវិកាឆ្នាំ ២០១៨នេះយើងកំណត់ក្របខ័ណ្ឌ ម៉ាក្រូសេដ្ឋកិច្ចរបស់យើងត្រឹមតែ ៧ ភាគរយប៉ុណ្ណោះ និង អត្រាអតិផរណាក្រោម ៣,៥ ភាគរយ។ ក៏ប៉ុន្តែអង្គភាពអាស៊ានបូកបីនេះ បានវាយតម្លៃថា សេដ្ឋកិច្ចកម្ពុជានៅឆ្នាំ ២០១៨ មានកំណើន ៧,២ ភាគរយជាមួយនឹងអត្រាអតិផរណាត្រឹម ៣,១ ភាគរយប៉ុណ្ណោះ។
សម្តេចតេជោ ហ៊ុន សែន បានចាត់ទុកស្ថានភាពនេះជាស្ថានភាពដ៏ល្អប្រសើរមួយសម្រាប់សេដ្ឋកិច្ចកម្ពុជា។ សម្តេចមានប្រសាសន៍ថា យើងត្រូវតែប្រឹងនៅក្នុងដំណាក់កាលនេះដែលយើងបន្តការខិតខំពីអាណត្តិមួយទៅអាណត្តិមួយ ពីមួយឆ្នាំទៅមួយឆ្នាំ ត្រូវធ្វើយ៉ាងណាឲ្យកំណើនសេដ្ឋកិច្ចរបស់យើងកើនខ្ពស់ ដោយខ្ញុំរំពឹងថា ចប់អាណត្តិទី ៦ នេះប្រាក់ចំណូលរបស់ប្រជាជន កម្ពុជានឹងកើនជាង ២ ពាន់ដុល្លារអាមេរិកក្នុងមួយឆ្នាំសម្រាប់ប្រជាជនម្នាក់ៗ។ បច្ចុប្បន្ននេះប្រាក់ចំណូលប្រជាជនម្នាក់ ៗមានចំនួន ១.៥៦០ ដុល្លារក្នុងមួយឆ្នាំ។
សម្តេចតេជោបានបន្តថា ២០០០ ដុល្លារវាមិនទាន់ទៅដល់ឋានៈជាប្រទេសចំណូលមធ្យមកម្រិត ខ្ពស់នៅឡើយទេដែលយើងបានដាក់គោលដៅថាឆ្នាំ២០៣០កម្ពុជានឹងក្លាយជាប្រទេសដែលមានចំណូល មធ្យមកំរិតខ្ពស់ និង នៅឆ្នាំ ២០៥០ ជាប្រទេសដែលមានចំណូលខ្ពស់។ ដូចនេះយើងត្រូវខិតខំសម្រេច ឲ្យបាន។
សម្តេចតេជោនាយករដ្ឋមន្ត្រីបានបន្តថា កម្ពុជាបានទទួលជោគជ័យ ទៅលើយុទ្ធសាស្ត្រពង្រាយរោងចក្រទៅតាមបណ្តាខេត្តដែលធ្វើឲ្យប្រាក់ចំណូលរបស់ពលរដ្ឋរបស់យើងមានការកើនឡើង។ ការកើនឡើងនៃវិស័យកាត់ដែរបានរួមចំណែកធ្វើទំនើបកម្មវិស័យកសិកម្មផងដែរ។ ភាពរីកលូតលាស់របស់កម្ពុជាមិនអាចពឹងតែទៅលើវិស័យណាមួយនោះទេត្រូវធ្វើការអភិវឌ្ឍពហុវិស័យដើម្បីជៀសវាងហានិភ័យផ្សេងៗ ត្រូវទប់ទល់នឹងភាព ធន់នឹងវិបត្តិពីខាងក្រៅ។
សម្តេចតេជោបានលើកឡើងថា ដូចជាប្រទេសវេណេស៊ូអេឡា ដែលជាប្រទេសអ្នកមានមួយពឹងផ្អែកតែទៅលើប្រេង ក្លាយទៅប្រទេសដែលមានអតិផរណា មួយលានភាគរយ។
សម្តេចតេជោនាយករដ្ឋមន្ត្រីបានបន្តថា ការគ្រប់គ្រង់ម៉ាក្រូសេដ្ឋកិច្ចគឺជាបញ្ហាសំខាន់ណាស់ ហេតុដូច្នេះហើយបានជាយើងខិតខំជាមួយការរក្សាស្ថិរភាពនយោបាយហើយយើងខិតខំថែរក្សាស្ថិរភាព ម៉ាក្រូសេដ្ឋកិច្ចទៀត។ គោលដៅនៃការរក្សាស្ថិរភាពម៉ាក្រូសេដ្ឋកិច្ចគឺទប់ស្កាត់អតិផរណា និង រក្សាកម្លាំងទិញនៃប្រាក់រៀល។ គ្រាប់បែកផ្ទុះវាសម្លាប់មនុស្សតែមួយក្រុមតែប៉ុណ្ណោះ ក៏ប៉ុន្តែបើគ្រាប់បែកសេដ្ឋកិច្ចផ្ទុះវិញនោះគឺងាប់មនុស្សម៉ាប្រទេសតែម្តង ។ នេះជាបញ្ហាដែលរាជរដ្ឋាភិបាលត្រូវមានការប្រុងប្រយ័ត្ន៕
Source: Kampuchea Thmey Daily
0 Comments