កំពង់ស្ពឺ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃកម្ពុជាបានធ្វើការបញ្ជាក់ដោយភាពច្បាស់លាស់មួយទៅកាន់អ្នកដែលកំពុងតែដេកស្រមៃថានឹងមានការបោះឆ្នោតជាតិឡើងវិញ នៅពេលខាងមុខថា «សូមកុំរង់ចាំខ្មោចដែលវាងាប់ហើយ ថាវាអាចរស់ឡើងវិញបាននោះ»។ សម្តេចតេជោហ៊ុនសែនបានថ្លែងបែបនេះនៅព្រឹកថ្ងៃទី ១៩ ខែកញ្ញា ឆ្នាំ២០១៨នេះ ក្នុងពិធីជួបសំណេះសំណាលជាមួយ កម្មករ-កម្មការិនី នៅខេត្តកំពង់ស្ពឺ។
សម្តេចតេជោនាយករដ្ឋមន្ត្រីបានលើកឡើងថា កម្ពុជាជារដ្ឋអធិបតេយ្យ ជាអ្នកគ្រប់គ្រងនៅគ្រប់វេទិកាអន្តរជាតិទាំងអស់នៅលើលោកនេះសូមកុំមានការភ័ន្តច្រឡំឲ្យសោះ។ សម្តេចក៏បានបញ្ជាក់ផងដែរថា នឹងរៀបចំធ្វើការបោះឆ្នោតឃុំសង្កាត់នៅឆ្នាំ២០២២និងបោះឆ្នោតជ្រើសតាំងតំណាងរាស្ដ្រនៅឆ្នាំ ២០២៣ ហើយក្រៅពីនេះគឺគ្មានការបោះឆ្នោតអ្វីទាំងអស់។
សម្ដេចតេជោហ៊ុន សែន បានមានប្រសាសន៍ថា «សូមកុំមានការភ័ន្តច្រឡំឲ្យសោះ ហើយខ្ញុំក៏សូមបញ្ជាក់ថា ការបោះឆ្នោតនឹងត្រូវធ្វើ ការបោះឆ្នោតសម្រាប់ឃុំ-សង្កាត់នៅឆ្នាំ ២០២២ និង ធ្វើការបោះឆ្នោតសម្រាប់ជ្រើសតាំងតំណាងរាស្ដ្រនៅឆ្នាំ២០២៣ខុសពីនេះគឺគ្មាន ទេ សូមកុំរង់ចាំខ្មោចដែលវាងាប់ហើយថាវាអាចរស់ឡើងវិញបាននោះ»។
សម្តេចតេជោនាយករដ្ឋមន្ត្រីបានទៀតបន្តថា សុំមើលឲ្យច្បាស់នាយករដ្ឋមន្ត្រីកម្ពុជាទៅថ្លែងក្នុងឋានៈជាមេដឹកនាំរដ្ឋនៅមហាសន្និបាតអង្គការសហប្រជាជាតិ ហើយក៏ត្រូវជួបមេដឹកនាំប្រទេសផ្សេងៗនៅក្នុងស្នាក់ការអង្គការសហប្រជាជាតិនិងជួបជាមួយអគ្គលេខាធិការអង្គការសហប្រជាជាតិនៅទីនោះ។ ពេល ទៅហ្សឺណែវ ក៏មានកិច្ចប្រជុំនៅក្នុងក្របខ័ណ្ឌអង្គការសហប្រជាជាតិស្តីពីពាណិជ្ជកម្មផងដែរ។
សម្តេចតេជោ ហ៊ុន សែន បានបន្តថា មានការឃោសនាអកុសលថា អង្គការសហប្រជាជាតិនឹងព្យួរអាសនៈរបស់កម្ពុជា។ សម្ដេចតេជោ ហ៊ុន សែន បានលើកជាសំណួរថា «តើអ្នកណាក្បាលធំ អ្នកណាថ្លើមធំនៅលើលោកនេះ ហ៊ានដកអាសនៈកម្ពុជា សូមកុំភ័ន្ដច្រឡំ»។
សម្តេចបន្តថា សម្តេចចេះតែឆ្ងល់ថាបើអាមេវាពូកែភូត ហើយអាកូនចៅរបស់វានោះរឹតតែពូកែភូតទៅទៀត។ សម្តេចក៏បានបង្ហាញឈ្មោះរបស់ជនដែលពូកែភូតថា វាមានឈ្មោះ អា ចាន់ ថុង នៅខេត្តព្រៃវែង ពូកែខាងវិភាគនយោបាយ និង ភូតប្រជាជន។
សម្តេចតេជោនាយករដ្ឋមន្ត្រីបានបន្តថា ដូចជា ករណីសុវត្ថិភាពពិរុទ្ធជន យើងត្រូវយកចិត្តទុកដាក់។ គេបែរជាលើកឡើងថា ដោយសារតែការកៀបសង្កត់របស់បរទេស។ សម្តេចបន្តថាបើចង់ដឹងថា អន្តរជាតិកៀបសង្កត់តុលាការចេញដីកាឃុំខ្លួននៅខេត្តព្រះវិហារមើល អហ្នឹងវាជាសិទ្ធិរបស់តុលាការ គេគ្រាន់តែយកមកដាក់ក្នុងដែនដីមួយដែលមានសុវត្ថិភាព។
សម្តេចតេជោ ហ៊ុន សែន បានលើកឡើងថា ដើម្បីឲ្យអ្នកទាំងឡាយភ្លឺភ្នែក ថ្ងៃមុនសម្ដេចក្រឡាហោម ស ខេង បាននិយាយម្ដងហើយ ប៉ុន្ដែថ្ងៃនេះខ្ញុំគ្រាន់តែបញ្ជាក់ អត់ទាន់រួចទោសទាំងអស់ គ្រាន់តែដូរទីតាំងឃុំឃាំងតែប៉ុណ្ណឹងទេ ក្រែងលោវាងាប់ក្នុងគុក វាបង្កើតរឿងដល់រាជរដ្ឋាភិបាល ចឹងក្នុងគោលដៅមនុស្សធម៌ និងរក្សាសុវត្ថិភាពពិរុទ្ធជន»។
សម្តេចតេជោនាយករដ្ឋមន្ត្រីបន្តថា «នៅក្នុងប្រទេសកម្ពុជាមិនទាន់មានច្បាប់ឃុំខ្លួននៅក្នុងផ្ទះនោះទេ ដូច្នេះតុលាការគ្រាន់តែកំណត់តំបន់មួយឲ្យអ្នកដែលត្រូវជាប់ឃុំនោះស្នាក់នៅ ហើយតុលាការអាចកំណត់ឲ្យនៅក្នុងផ្ទះតែម្ដង។ អាច នឹងមានការពិចារណាក្នុងទិដ្ឋភាពច្បាប់រៀបចំឲ្យមានការឃុំខ្លួនពិរុទ្ធជននៅក្នុងផ្ទះព្រោះកន្លែងនេះអាចជាការខ្វះចន្លោះទៅលើផ្នែកច្បាប់»។
នៅក្នុងឱកាសនោះដែរ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជាបានអះអាងថា លោក កឹម សុខា មិនទាន់រួចទោស ណាមួយទាំងអស់ពោលគ្រាន់តែប្ដូរកន្លែងឃុំខ្លួនប៉ុណ្ណោះដោយក្នុងហេតុផលមនុស្សធម៌។ បើតាមការលើកឡើងរបស់សម្ដេចតេជោ ហ៊ុន សែន ការនាំលោក កឹម សុខា មកឃុំនៅក្នុងផ្ទះជាការសម្រេចរបស់តុលាការដើម្បីបន្ធូរបន្ថយបន្តិចមិនមានសម្ពាធណាមួយនោះឡើយ សូមមហាជនកុំភ័ន្ដច្រឡំ។
សូមបញ្ជាក់ថា កាលពីថ្ងៃទី១៧ កញ្ញា សម្តេចក្រឡាហោម ស ខេង ឧបនាយករដ្ឋមន្ត្រី និង ជារដ្ឋមន្ត្រីក្រសួងមហាផ្ទៃបាន អះអាងថា លោកគឺជាអ្នករៀបចំផ្ទេរការឃុំខ្លួនមេដឹកនាំអតីតគណបក្សប្រឆាំងលោក កឹម សុខា ពីពន្ធនាគារត្រពាំងផ្លុងមកឃុំខ្លួននៅក្នុងផ្ទះ។ នេះ ក៏ដោយសារតែច្បាប់ព្រហ្មទណ្ឌកម្ពុជាមិនបានចែងនៅត្រង់ចំណុចនេះ (ការឃុំខ្លួនពិរុទ្ធជននៅក្នុងផ្ទះ)។
សម្តេចក្រឡាហោម បានសង្កត់ធ្ងន់ថា ការផ្ទេរ លោក កឹម សុខា មកឃុំខ្លួននៅក្នុងផ្ទះធ្វើឡើងក្នុងគោលបំណងមនុស្សធម៌ដើម្បីសុវត្ថិភាព និង ស្ថានភាពជំងឺ លោក កឹម សុខា គឺមិនមែនដោយសារសម្ពាធអន្តរជាតិឡើយ។
សកម្មភាពប្រចាំថ្ងៃរបស់ លោក កឹម សុខា ត្រូវតែអនុវត្តទៅតាមដីកាកំណត់បើពុំដូច្នោះទេតុលាការមានសិទ្ធិយកលោក កឹម សុខា ទៅ ឃុំឃាំងនៅកន្លែងណាក៏បានអាស្រ័យលើឆន្ទានុសិទិ្ធរបស់តុលាការ។ នេះជាការបញ្ជាក់របស់សម្តេចតេជោ ហ៊ុន សែន នាយករដ្ឋមន្ត្រី កម្ពុជា។
សម្តេចតេជោនាយករដ្ឋមន្ត្រីក៏បានផ្តាំទៅក្រុមអ្នកវិភាគនយោបាយទាំងអស់ថា សុំកុំឲ្យហួសហេតុពេល និង មានការភ័ន្តច្រឡំណាមួយ ចំពោះបញ្ហាណាមួយការភ័ន្តច្រឡំនោះនាំឲ្យខ្លួនឯងគ្រោះថ្នាក់ទៅវិញទេ។
គួរបញ្ជាក់ថា គណបក្សសង្គ្រោះជាតិត្រូវបានតុលាការកំពូលកាត់ទោសរំលាយចោលនៅថ្ងៃទី ១៦ ខែ វិច្ឆិកា ឆ្នាំ ២០១៧ បន្ទាប់ពីរក ឃើញថាគណបក្សមួយនេះមានការឃុបឃិតគ្នាជាប្រព័ន្ធជាមួយបរទេសដើម្បីផ្តួលរំលំរាជរដ្ឋាភិបាលស្របច្បាប់របស់កម្ពុជា។ ជាមួយ គ្នានេះតុលាការក៏បានហាមឃាត់មេដឹកនាំបក្សនេះចំនួន ១១៨ នាក់ មិនឲ្យធ្វើនយោបាយរយៈពេល៥ឆ្នាំផងដែរ៕
Source: Kampuchea Thmey Daily
0 Comments