រតនគិរី ៖ ប្រជាពលរដ្ឋ ក្នុងភូមិតាស៊ុយ ត្រូវបានចោរចូលលួចយកទ្រព្យសម្បត្តិជាបន្តបន្ទាប់ដូចជា: មាន់ ទា អាគុយ និងទូរស័ព្ទដៃ។ល។
ជាក់ស្តែងនៅយប់ថ្ងៃទី១៨ ខែកញ្ញា ឆ្នាំ២០១៨ ផ្ទះមួយកន្លែង ត្រូវបានចោរចូលលួចយកលុយអស់ចំនួន៤ លានរៀល (មួយពាន់ដុល្លា) ដែលម្ចាស់ផ្ទះបានទុកនៅក្នុងកាបូបយួរមួយ ហើយបានដាក់នៅរនាបផ្ទះចោល។
ម្ចាស់ផ្ទះឈ្មោះអុន វុធ ភេទប្រុស អាយុ៣៦ឆ្នាំ ជនជាតិខ្មែរ និងប្រពន្ធឈ្មោះ ម៉ែ ចន្ធា អាយុ២៧ឆ្នាំ មានមុខរបរលក់អីវ៉ាន់ចាប់ហួយ បានរៀបរាប់ប្រាប់អ្នកសារព័ត៌មានឲ្យដឹងថា នៅមុនពេលកើតហេតុ រូបគាត់បានទុកលុយនៅរនាបផ្ទះក្បែរជញ្ជាំងនោះ ហើយបាននាំប្ដីប្រពន្ធទៅដេកនៅលើគ្រែក្នុងផ្ទះទល់ភ្លឺ ព្រឹកឡើងនៅម៉ោង៦ ថ្ងៃទី១៩ ខែកញ្ញា ឆ្នាំ២០១៨ ទើបមានការភ្ញាក់ផ្អើលឡើងនាំគ្នាដើររកកាបូបលុយ។
លោកបន្តថា ក្រោយពី បានបាត់លុយមក នាំប្រពន្ធដើររកក៏ប្រទះឃើញដានជើងជាប់នឹងដីខ្សាច់មួយ ហើយមានតុ និងកៅអី មានខ្វែវមួយនៅខាងក្រោយផ្ទះ ដែលចោរបានធ្វើសកម្មភាពឡើងយកលុយនៅតាមបង្អួចផ្ទះនោះ គាត់មិនដឹងថាចោរចូលលួចយកលុយនោះនៅម៉ោងប៉ុន្មាននោះទេ ទើបព្រឹកឡើងមានការឆោឡោ គាត់សង្ស័យថា ដានជើងនេះមានតែចោរទេ កន្លងមកគេបានបាត់មាន់ទា ក៏បានឃើញដានជើងនេះដែរ លុយនេះគាត់បានលក់ជ្រូកបានថ្មីៗនេះ។
លោក សួន សាវុធ នាយប៉ុស្តិ៍កាចាញបានឲ្យដឹងថា ចោរ ដែលបានធ្វើសកម្មភាពកន្លងមកនេះ លោកបានដៅជាមុខសញ្ញាបានខ្លះហើយ ប៉ុន្តែសូមឲ្យប្រជាការពារភូមិនោះត្រូវជួយសហការគ្នាដើម្បីស្វែងរកចាប់មុខសញ្ញាឲ្យបានច្បាស់យកមកផ្ដន្ទាទោសទៅតាមផ្លូវច្បាប់៕
Source: Kampuchea Thmey Daily
0 Comments