អគ្គមេបញ្ជាការនៃកងយោធពលខេមរភូមិន្ទ បានដឹកនាំគណៈប្រតិភូកម្ពុជាទៅបំពេញទស្សនកិច្ចផ្លូវការនៅសាធារណរដ្ឋប្រជាធិបតេយ្យប្រជាមានិតឡាវ

ដើម្បីពង្រឹង និងពង្រីកទំនាក់ទំនង កិច្ចសហប្រតិបត្តិការល្អរវាងកងទ័ពនៃប្រទេសទាំងពីរ ឯកឧត្តម នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ និងឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក បានដឹកនាំគណ:ប្រតិភូនៃកងយោធពលខេមរភូមិន្ទទៅបំពេញទស្សនកិច្ចជាផ្លូវការនៅសាធារណរដ្ឋប្រជាធិបតេយ្យប្រជាមានិតឡាវ ដោយគណៈប្រតិភូបានជួបសំដែងការគួរសមជាមួយនាយករដ្ឋមន្ត្រី រដ្ឋមន្ត្រីក្រសួងការពារប្រទេសឡាវ ប្រធានអគ្គសេនាធិការនៃកងទ័ពប្រជាជនឡាវ និងថ្នាក់ដឹកនាំក្រសួងការពារប្រទេសនៃសាធារណរដ្ឋប្រជាធិបតេយ្យប្រជាមានិតឡាវ.

ឯកឧត្តម នាយឧត្តមសេនីយ៍ វង្ស ពិសេន បានជម្រាបជូនឯកឧត្តម នាយករដ្ឋមន្ត្រីនៃប្រទេសឡាវ ឯកឧត្តម រដ្ឋមន្ត្រីក្រសួងការពារប្រទេស និងប្រធានអគ្គសេនាធិការកងទ័ពប្រជាជនឡាវ ពីគោលបំណងក្នុងការបន្តរក្សាទំនាក់ទំនងល្អជាប្រពៃណី និងសហប្រតិបត្តិការល្អនៃប្រទេសទាំងពីរ ការរួមគ្នាទប់ស្កាត់បទល្មើសតាមព្រំដែន និងឧក្រិដ្ឋកម្មឆ្លងដែនដូចជាបញ្ហាជួញដូរគ្រឿងញៀន បទល្មើសផ្សេងៗ និងការជួយគ្នាទៅវិញទៅមកក្នុងការសង្គ្រោះគ្រោះមហន្តរាយដែលកើតមានតាមបណ្ដាព្រំដែនជាដើម។ ជាពិសេស បន្តអនុវត្តតាមអនុសាសន៍ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង ឯកឧត្តម ថុងឡូង ស៊ីសូលីត នាយករដ្ឋមន្ត្រីសាធារណរដ្ឋប្រជាមានិតឡាវ ដែលបានថ្លែងរួមគ្នានៅក្នុងជំនួបថ្នាក់ដឹកនាំនៃប្រទេសទាំងពីរក្នុងប្រទេសវៀតណាមចាប់ពីថ្ងៃទី១៣ ខែកញ្ញា ឆ្នាំ២០១៨។

ភាគីមិត្តបានសំដែងការអបអរសាទរនិងថ្លែងអំណរគុណចំពោះថ្នាក់ដឹកនាំអគ្គបញ្ជាការដ្ឋាននៃកងយោធពលខេមរភូមិន្ទ និងបញ្ជាការដ្ឋានកងទ័ពជើងគោកដែលបានជ្រើសរើសប្រទេសឡាវជាប្រទេសទី១ក្នុងការធ្វើដំណើរទស្សនកិច្ច។ ភាគីមិត្តឡាវ បានប្ដេជ្ញារក្សាទំនាក់ទំនងនិងកិច្ចសហការល្អលើការងារការពារជាតិ ជាពិសេសអនុវត្តនូវប្រសាសន៍ដ៏ខ្ពង់ខ្ពស់របស់នាយករដ្ឋមន្ត្រីនៃប្រទេសទាំងពីរ។ ភាគីឡាវ ក៏បានថ្លែងអំណរគុណចំពោះប្រមុខរាជរដ្ឋាភិបាលកម្ពុជា ដែលបានផ្ដល់សម្ភារៈ និងស្មារតីក្នុងការជួយសង្គ្រោះប្រជាជនឡាវនូវគ្រោះទឹកជំនន់នាពេលថ្មីៗនេះ៕

សូមបញ្ជាក់ថា ថ្នាក់ដឹកនាំអគ្គបញ្ជាការនៃកងយោធពលខេមរភូមិន្ទបានដឹកនាំគណៈប្រតិភូបំពេញទស្សនកិច្ចផ្លូវការនៅក្នុងប្រទេសឡាវរយៈពេល៣ថ្ងែ ចាប់ពីថ្ងៃទី១៨ ដល់ថ្ងៃទី២១ ខែកញ្ញា ឆ្នាំ២០១៨ ដែលនៅក្នុងនោះគណប្រតិភូបានចូលជួបសំដែងការគួរសមជាមួយឯកឧត្តម ថុងឡូង ស៊ីសូលីត នាយករដ្ឋមន្ត្រីសាធារណរដ្ឋប្រជាមានិតឡាវ ឯកឧត្តមឧត្តម សេនីយ៍ឯក ចន្ទ សាម៉ូន ចន្ទយ៉ាឡាក់ រដ្ឋមន្ត្រីក្រសួងការពារប្រទេស និងឯកឧត្តមឧត្តមសេនីយ៍ឯក ស៊ុវ៉ន លឿនប៊ុនមី អនុរដ្ឋមន្ត្រីក្រសួងការពារប្រទេសនិងប្រធានអគ្គសេនាធិការកងទ័ពប្រជាជនឡាវ៕