ក្រុមជើងឯកឆ្នាំចាស់បឹងកេតអែហ្វស៊ី បានថ្លែងសុំទោសដល់អ្នកគាំទ្ររបស់ខ្លួនក្រោយក្រុមអស់ឱកាសដណ្តើមពានរង្វាន់លីគកំពូលកម្ពុជា (Metfone Cambodian League 2018) ឆ្នាំ២០១៨នេះ ពោលគឺត្រឹមឈរកៅអីជើងឯករង ខណៈតំណែងជើងឯកបានទៅក្រុមណាហ្គាវើល ទោះបីជានៅសល់១ប្រកួតក្នុងដៃរៀងៗខ្លួនក៏ដោយ។
លោក បែ មករា អ្នកចាត់ការទូទៅរបស់ក្រុមបឹងកេត បានលើកឡើងថា «អស់រយៈពេលពេញមួយរដូវកាល ដែលពួកយើងបានខិតខំប្រឹងប្រែងយ៉ាងខ្លាំងក្លា ដោយឆ្លងកាត់បញ្ហាលំបាក និងឧបសគ្គជាច្រើន ដើម្បីការពារតំណែងជើងឯករបស់ពួកយើង ប៉ុន្តែគួរឲ្យសោកស្តាយ ដែលពួកយើងមិនអាចធ្វើបាន។ ក្នុងនាមជាអ្នកដឹកនាំខ្ញុំសូមអភ័យទោសចំពោះអ្នកគាំទ្រយើងទាំងអស់គ្នា ដែលមិនអាចការពារតំណែងជើងឯកបានម្តងទៀត ពួកយើងសូមសន្យាថា នឹងព្យាយាមធ្វើឲ្យបានល្អនៅរដូវកាលក្រោយ»។
ថ្នាក់ដឹកនាំក្លិបរូបនេះបានបន្តទៀតថា «ខ្ញុំសូមអរគុណ សម្រាប់ការគាំទ្រ និងនៅជាមួយពួកយើងគ្រប់ពេលវេលា និងទីកន្លែង ទោះជិតក្តី ឆ្ងាយក្តី ហើយសង្ឃឹមថាអ្នកគាំទ្រទាំងអស់នឹងចូលរួមគាំទ្រការប្រកួតបិទរដូវកាលទល់នឹងភ្នំពេញក្រោន ឲ្យបានច្រើនកុះករ។ ចុងក្រោយសូមសម្តែងនូវការអបអរសាទរជាមួយក្លិបណាហ្កា ដែលទទួលបានជើងឯកលីគឆ្នាំ២០១៨»។
ទន្ទឹមនឹងគ្នានេះដែរលោកស្រី ពុទ្ធ ធីតា ប្រធានក្លិបបឹងកេត បានអំពាវនាវដល់អ្នកគាំទ្ររបស់ខ្លួនថា «យើងនៅសល់ការប្រកួតដ៏សំខាន់មួយប្រកួតទៀតតែប៉ុណ្ណោះ ក្នុងនាមខ្ញុំជាថ្នាក់ដឹកនាំក្លិបម្នាក់សំណូមពរសុំឲ្យអ្នកគាំទ្ររបស់ក្លិបយើងព្រមទាំងបងប្អូនដែលគាំទ្រវិស័យកីឡាបាល់ទាត់ទាំងអស់មកគាំទ្រដោយផ្ទាល់នៅពហុកីឡដ្ឋានជាតិ។ ទោះបីជាក្លិបយើងបានត្រឹមជើងឯករងឬអ្វីក៏ដោយ។ ដរាបណាកីឡាករយើងងើបមុខមកខាងលើឃើញអវត្តមានអ្នកគាំទ្រនៅក្នុងទីលានគឺជាការផ្តល់កម្លាំងចិត្តដ៏មហិមា ជាកម្លាំងចិត្តនិងជាអ្វីៗគ្រប់យ៉ាងធ្វើឲ្យពួកយើងគ្រប់គ្នាតស៊ូមិនរាថយ។ មិនថា លទ្ធផលយ៉ាងណាយើងនឹងធ្វើដំណើរជាមួយគ្នា»។
ពានរង្វាន់លីគកំពូលកម្ពុជា នៅសល់១ប្រកួតទៀតនឹងបញ្ចប់រដូវកាលរបស់ខ្លួនហើយ ខណៈក្រុមណាហ្គាវើល ជាម្ចាស់ជើងឯក ក្រោយមាន៥៣ពិន្ទុច្រើនជាងក្រុមលេខ២បឹងកេត៤៩ពិន្ទុ ពោលគឺមានគម្លាតគ្នារហូតដល់ទៅ៤ពិន្ទុ។ ចំណែកប្រកួតដែលនៅសល់របស់បឹងកេត វិញគឺត្រូវជួបអតីតក្រុមជើងឯក៦សម័យកាលភ្នំពេញក្រោន នៅល្ងាចថ្ងៃអាទិត្យ ទី៣០ ខែកញ្ញាចុងសប្ដាហ៍នេះ នៅលើទីលានពហុកីឡដ្ឋានជាតិ៕
Source: Kampuchea Thmey Daily
0 Comments