ភ្នំពេញ ៖ បុរសចំនួន៥នាក់ ត្រូវបានសមត្ថកិច្ចនគរបាលខណ្ឌសែនសុខ ចាប់ខ្លួនពីបទលេងល្បែងស៊ីសងខុសច្បាប់ ខណៈសមត្ថកិច្ចបានប្រទះឃើញពួកគេកំពុង តែជួបជុំគ្នាបញ្ជល់មាន់ភ្នាល់ដាក់លុយ នៅតាមផ្លូវក្នុងភូមិបុរីកម្មករ អតីតភូមិត្រពាំឈូក សង្កាត់ទឹកថ្លា ខណ្ឌសែនសុខ កាលពីម៉ោង១២ថ្ងៃត្រង់ នាថ្ងៃទី២២ ខែកញ្ញា ឆ្នាំ២០១៨។
ក្រុមជនដែលត្រូវបានឃាត់ខ្លួនខាងលើ ១.ឈ្មោះ នូ មនោរិទ្ឋ អាយុ២៧ឆ្នាំ មានទីលំនៅនៅម្តុំកំបូល។ ២.ឈ្មោះ ហូ អភិវឌ្ឍ អាយុ២៣ឆ្នាំ មុខរបរររម៉ូតូឌុប មានទីលំនៅ កន្លែងកើតហេតុ។ ៣.អ៊ុក បូរ៉េត អាយុ៣៨ឆ្នាំ គ្មានមុខរបរ មានទីលំនៅភូមិទឹកថ្លា សង្កាត់ទឹកថ្លា ខណ្ឌសែនសុខ។ ៤. ឈ្មោះ អ៊ុន វី អាយុ៤៧ឆ្នាំ គ្មានមុខរបរ មានទីលំនៅស្រុកបារភ្នំ ខេត្តព្រៃវែង។ ៥. ផេង ធា អាយុ៣៦ឆ្នាំគ្មានមុខរបរ មានទីលំនៅក្រុងតាខ្មៅ។
នៅក្នុងការបង្ក្រាបនោះ សមត្ថកិច្ចបានដកហូតបានមាន់គក ចំនួន១ក្បាល និងជញ្ជីងមួយ ព្រមទាំងលុយកាក់មួយចំនួនផងដែរ។
ល្បែងស៊ីសងនៅខណ្ឌសែនសុខ មានការរីកចម្រើនយ៉ាងខ្លាំង ជាពិសេសល្បែងឆ្នោតកន្ទុយលេខយួន តែម្តង ក្រៅពីនោះគឺល្បែងភ្នាល់ចាក់បាល់អន្តរជាតិ ជ្រកក្នុងហាងបើកបំរើសេវាអីនធើណិត។
មានការរិះគន់ថា ល្បែងដែលកើតឡើងព្រោងព្រាតទាំងនោះ សុទ្ធតែមានខ្នងមានខ្សែកាង មិនឲ្យអ្នកណាចាប់ផ្តេសផ្តាសឡើយ ព្រោះមេល្បែងឆ្នោតកន្ទុយលេខទាំងនោះបានផ្តល់ផលប្រយោជន៍ឲ្យអាជ្ញាធរមូលដ្ឋាន៕
Source: Kampuchea Thmey Daily
0 Comments