ប្រធាន​ក្រុម​ជម្រើសជាតិ​នារី​របស់​កម្ពុជា កំពុង​ទទួល​បានការ​កោតសរសើរ​នៅ​សាលា​មួយ​ក្នុង​សហរដ្ឋអាមេរិក

​កីឡាការិនី​បាល់ទាត់ ហួត គឹមហុង សមាជិក​ក្នុង​ក្រុមបាល់ទាត់​នារី​របស់​ក្លិប​ភ្នំពេញ​ក្រោ​ន និង​ជា​ប្រធាន​ក្រុម​ប្រចាំ​ជម្រើសជាតិ​បាល់ទាត់​នារី​កម្ពុជា បាន​ចាក​ចេញពី​មាតុភូមិ​ទៅ​សិក្សា​នៅ​សហរដ្ឋអាមេរិក​រយៈពេល​២​ឆ្នាំ កាលពី​ខែសីហា កន្លងទៅ​ខណៈ​រូបគេ​បាន​ក្លាយជា​កីឡាការិនី​ប្រចាំ​សាលា​ថ្មី​របស់គេ​នេះ​ផងដែរ​។



​សាលា​ដែល​រូប​បាន​ទទួល​អាហារូបករណ៍​ឈ្មោះថា​សាលា Bryant and Stratton College ដែល​ស្ថិតនៅ​ទីក្រុង​ញូវយ៉ក​។ រូបគេ​ត្រូវ​ចំណាយពេល​នៅ​ទីនោះ ២​ឆ្នាំ​ប៉ុន្តែ​ប្រសិនបើ​នាង​ទទួលបាន​លទ្ធផល​ល្អ​ក្នុងការ​សិក្សា​ភាគី​អាមេរិគ​នឹង​ផ្តល់ឱកាស​អាហារូបករណ៍​គ្រប់ ៤​ឆ្នាំ​តែម្តង​។ ងាក​មក​រឿង​បាល់ទាត់​វិញ​កីឡាការិនី ហួត គឹមហុង បានបង្ហាញ​ខ្លួន​លើកដំបូង​ឱ្យ​ក្រុម​របស់​សាលា​ខ្លួន​កាលពីពេល​ថ្មីៗ ហើយ​ថែមទាំង​រកបាន​គ្រាប់​បាល់​២​គ្រាប់​ម្នាក់ឯង​ផងដែរ ក្នុងចំណោម​ជ័យជម្នះ​២​ទល់​១ លើ​គូប្រកួត​។

ម្ចាស់​គ្រាប់​បាល់​ច្រើន​ជាង​គេ​ឲ្យ​កម្ពុជា ពេល​ប៉ះ​ទី​ម័​រ​ខាងកើត កាល​ពី​ពេល​ថ្មីៗ​រូបនេះ​បញ្ជាក់ថា​ មូលហេតុ​ដែល​ខ្លួន​ទទួលបាន​ឱកាស​នៅក្រៅ​ប្រទេស​នេះ​ដោយសារ​ការ​ជ្រោមជ្រែង​ពី​ជនបរទេស​មួយរូប​ឈ្មោះ Rick Beal ព្រោះតែ​រូប​នាង​គឺជា​គ្រូបង្វឹក​កូនៗ​របស់​គ្រួសារ​អាមេរិក​មួយ​នេះ។ ​កីឡាការិនី ហួត គីម​ហុង ធ្លាប់​បាន​ទទួល​ការ​បណ្តុះបណ្តាល​នៅ​អង្គការ Mighty Girls ក្នុង​ខេត្តបាត់ដំបង ជាទី​ដែល​រូប​នាង​បាន​ផ្លាស់​ប្តូរជីវិត​រហូតមក​ដល់​បច្ចុប្បន្ន​ក្រោយពី​បាន​ចូល​ហ្វឹកហាត់​កីឡាបាល់ទាត់​រួចមក​។



​ដោយ​ការ​ខិតខំ​ព្យាយាម គួបផ្សំ​ជាមួយនឹង​ទេពកោសល្យ​ពី​ធម្មជាតិ​ផង​នោះ គីម​ហុង បាន​វិវត្តន៍​ខ្លួន​រហូត​ក្លាយជា​កីឡាការិនី​អាជីព​មួយរូប​នៅក្នុង​ក្លឹប​ភ្នំពេញ​ក្រោ​ន ព្រមទាំង​ជាប់​ជា​កីឡាការិនី​ក្រុម​នារី​ជម្រើសជាតិ​កម្ពុជា ដោយមាន​តួនាទី​ជា​ប្រធាន​ក្រុម​ក្នុង​ព្រឹត្តិការណ៍ AFF Women’s Championship 2018 និងរក​បាន​៧​គ្រាប់​ នៅក្នុង​ជំនួប​ទីម័រ​ខាង​កើត​៕

Source: Kampuchea Thmey Daily