ភ្នំពេញ ៖ លោក រ៉ុង ឈុន ប្រធានសហភាពសហជីពកម្ពុជា បានថ្លែងនៅក្នុងសន្និសីទសារព័ត៌មានមួយ កាលពីព្រឹកថ្ងៃទី១៨ ខែកញ្ញា ឆ្នាំ២០១៨ ស្តីពីអនាគតការងាររបស់កម្មករថា លោកនឹងដឹកនាំធ្វើបាតុកម្មមួយនៅក្រោយបុណ្យភ្ជុំ ដើម្បីទាមទារឲ្យរដ្ឋាភិបាលទទួលយកសេចក្ដីសម្រេចចិត្តរបស់សភាអឺរ៉ុបមកធ្វើការពិចារណា ឬអនុវត្តតាម ប៉ុន្តែមន្ត្រីជាន់ខ្ពស់រាជរដ្ឋាភិបាលអះអាងថា គំរោងរៀបចំធ្វើបាតុកម្មបង្ខំអោយរាជរដ្ឋាភិបាលធ្វើតាមសេចក្តីសម្រេចចិត្តរបស់ EU គឺជាការបទរំលោភច្បាប់របស់កម្ពុជា ហើយរាជរដ្ឋាភិបាល នឹងចាត់វិធានការតាមផ្លូវច្បាប់ ដើម្បីថែរក្សាអធិបតេយ្យ និងឯកភាពជាតិ។
នៅក្នុងសន្និសីទនោះ លោក រ៉ុង ឈុន បានថ្លែងថា បន្ទាប់ពីមានសេចក្តីសម្រេចរបស់សភាសហគមន៍អឺរ៉ុប កាលពីថ្ងៃទី១៣ ខែកញ្ញា ឆ្នាំ២០១៨ កន្លងទៅថ្មីៗនេះ សហភាពសហជីពកម្ពុជា មើលឃើញចំណុចជាច្រើន ដែលធ្វើឲ្យមានក្តីបារម្ភចំពោះអនាគតការងាររបស់កម្មករ កម្មការិនីកម្ពុជា ដែលសភាសហគមន៍អឺរ៉ុប តម្រូវឲ្យថ្នាក់ដឹកនាំរាជរដ្ឋាភិបាលកម្ពុជា អនុវត្តវិធានការមួយចំនួនដូចជា ការលើកលែងទោសដល់លោក សម រង្ស៊ី ការដោះលែងលោក កឹម សុខា ឲ្យមានសេរីភាពពេញលេញ ការផ្ដល់សិទ្ធិនយោបាយឲ្យបុគ្គលចំនួន១១៨រូប មានសិទ្ធិធ្វើនយោបាយឡើងវិញ ផ្ដល់នីតិសម្បទាឲ្យគណបក្សសង្គ្រោះជាតិ និងការបោះឆ្នោតឡើងវិញជាដើម ហើយប្រសិនបើថ្នាក់ដឹកនាំរាជរដ្ឋាភិបាលកម្ពុជាមិនមានដំណោះស្រាយអ្វីនោះទេ សភាសហភាពអឺរ៉ុបបានព្រមានថា នឹងមានវិធានការមួយចំនួន ដែលមានការដកប្រព័ន្ធអនុគ្រោះពន្ធជាដើម។
តាមលោក រ៉ុង ឈុន ចំណុចទាំងអស់នេះហើយ ធ្វើឲ្យថ្នាក់ដឹកនាំកម្មករ កម្មការិនី មានការព្រួយបារម្ភ។ លោកបញ្ជាក់ថា ប្រសិនបើរាជរដ្ឋាភិបាលមិនទទួលយកសេចក្តីសម្រេចចិត្តរបស់សហភាពអឺរ៉ុបនោះទេ នឹងមានផលប៉ះពាល់មួយចំនួនដល់កម្មករ កម្មការិនី ដែលមានប្រមាណ៨០ ម៉ឺននាក់កំពុងធ្វើការនៅទូទាំងប្រទេស ហើយអ្នកដែលទទួលផលប្រយោជន៍ ក៏ត្រូវបាត់បង់ផលប្រយោជន៍ផងដែរ ដែលក្នុងនោះមានបងប្អូន សាច់ញាតិ និងអ្នកជួលផ្ទះជាដើម។
លោក រ៉ុង ឈុន បញ្ជាក់ទៀតថា ចំពោះបញ្ហានេះ លោកនឹងដឹកនាំធ្វើបាតុកម្មមួយនៅក្រោយបុណ្យភ្ជុំ ដោយមានអ្នកចូលរួមប្រមាណ៤៥០នាក់ ដើម្បីទាមទារឲ្យរដ្ឋាភិបាលទទួលយកសេចក្ដីសម្រេចរបស់សហគមន៍អឺរ៉ុបមកពិចារណា ឬអនុវត្ត ក្នុងបំណងរក្សាស្ថិរភាពការងាររបស់កម្មករ កម្មការនី និងនិយោជិត ហើយបាតុកម្មនៅ នឹងមានការហែរញាត្តិទៅដាក់នៅទីស្តីការគណៈរដ្ឋមន្ត្រី និងស្ថាប័នពាក់ព័ន្ធមួយចំនួនទៀត។
ទាក់ទងបញ្ហានេះ លោកផៃ ស៊ីផាន អ្នកនាំពាក្យរាជរដ្ឋាភិបាលបានបញ្ជាក់កាលពីរសៀលថ្ងៃទី១៨ ខែកញ្ញា ថា គំរោងធ្វើបាតុកម្មដាក់សម្ពោធឲ្យរាជរដ្ឋាភិបាល ធ្វើអោយសង្គមមានភាពច្របូកច្របល់ ទាំងសណ្ដាប់ធ្នាប់សាធារណៈ និងសន្តិសុខជាតិ ដើម្បីដាក់សម្ពោធបង្ខំឲ្យរាជរដ្ឋាភិបាល ធ្វើតាមបង្គាប់របស់បរទេសនោះ គឺជាការរំលោភច្បាប់ របស់កម្ពុជា ហើយនេះ គឺជាការវាយប្រហារទៅលើឆន្ទៈរបស់ប្រជាពលរដ្ឋខ្មែរ ដែលមានជាង៨០ភាគរយ បានចេញទៅបោះឆ្នោត។
តាមលោកផៃ ស៊ីផាន សម្លេងឆ្នោតជាង៧០ភាគរយ នៃចំនួនសន្លឹកសរុប នៅក្នុងហិបឆ្នោត ក៏បង្ហាញយ៉ាងច្បាស់ណាស់ នៅអធិបតេយ្យជាតិ ឯកភាព និងឯករាជ្យរបស់ខ្មែរ ដែលបុគ្គល រ៉ុង ឈុន ត្រូវតែមានកាតព្វកិច្ចគោរព និងប្រតិបត្តិ។ ការយកលេស និងខ្លឹមសាររបស់សហគមន៍អឺរ៉ុប ដែលមិនទាន់ចេញជាវិធានផ្លូវច្បាប់ណាមួយប្រឆាំងកម្ពុជា នោះគឺជាជនឆ្លៀតឱកាស បង្កើតឲ្យមានអំពើអានាធិបតេយ្យនៅក្នុងសង្គមខ្មែរ និងបម្រើនយោបាយបរទេសតែប៉ុណ្ណោះ ហើយរាជរដ្ឋាភិបាល នឹងចាត់វិធានការតាមផ្លូវច្បាប់ ក្នុងកិច្ចថែរក្សាអធិបតេយ្យ ឯករាជ្យ និងឯកភាពជាតិ។
លោកផៃ ស៊ីផាន លើកឡើងដែរថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានព្យាយាមអស់សមត្ថភាព ទាំងគោលនយោបាយ និងការថែរក្សាលើកស្ទួយ ភាពសុខក្សេមក្សាន្ត និងដោះស្រាយបង្កើនជីវភាពរបស់កម្មករ ដែលពុំធ្លាប់មាន នៅក្នុងប្រវត្តិសាស្ត្រជាក់ស្តែងរបស់កម្ពុជា។ ខុសប្លែកពីអ្នកនយោបាយ ក៏ដូចជាសហជីពមួយចំនួន ដែលជំរុញឲ្យកម្មករជំពប់ និងការបាត់បង់ផលប្រយោជន៍ការងារ ជាប់ពន្ធធនាគារ ព្រាត់ប្រាសគ្រួសារ ស្រុកទេស ដោយសារមហិច្ឆតានយោបាយ នៃផលប្រយោជន៍ផ្ទាល់ខ្លួន និងបក្សពួក។ គេមិនខ្លាចយកឈាមកម្មករ ប្តូរនឹងអំណាចនោះឡើយ។
លោកផៃ ស៊ីផាន បានទាញអារម្មណ៍សាជាថ្មីដល់លោក រ៉ុង ឈុន និងបក្សពួកថា ប្រជាពលរដ្ឋខ្មែរទាំងមូលបានបង្ហាញនូវឯកភាពជាតិជាផ្លូវការ និងសាធារណៈរួចស្រេចហើយ តាមរយៈការបោះឆ្នោត គឺកម្ពុជាជារដ្ឋអធិបតេយ្យមួយពិតប្រាកដ។ សហគមន៍អឺរ៉ុប មិនមែនជាអាណានិគមលើកម្ពុជានោះទេ។ កម្ពុជាមានកិច្ចសហការល្អណាស់ជាមួយគ្នាអស់រយៈច្រើនទសវត្សមកហើយ។ ក្នុងករណីទ្វេភាគី និងពហុភាគី តាមរយៈអាស៊ាន គឺកម្ពុជា និងសហភាពអឺរ៉ុបជាដៃគូពិភាក្សា ដៃគូអភិវឌ្ឍន៍ និងសហការ ហើយនៅសេចក្តីថ្លែងយោបល់របស់សភាសហគមន៍អឺរ៉ុប វាគ្រាន់តែជានិន្នាការនយោបាយរបស់គេប៉ុណ្ណោះ ប៉ុន្តែសារអបអរសាទរ និងជូនពររបស់អធិការបតីអាឡឺម៉ង់ ចំពោះសម្តេចតេជោ ហ៊ុន សែន ក៏ដូចជាបណ្តាមេដឹកនាំប្រទេសជាច្រើនទៀតលើពិភពលោក គឺមានន័យគ្រប់គ្រាន់សម្រាប់លោក រ៉ុង ឈុន និងបក្សពួករបស់គេយកទៅពិចារណាហើយ។
មន្ត្រីជាន់ខ្ពស់រាជរដ្ឋាភិបាលកម្ពុជារូបនោះអះអាងថា កម្ពុជា និងសហភាពអឺរ៉ុប ឋិតនៅជាដៃគូរហូតលើវេទិកា នយោបាយ និងសេដ្ឋកិច្ច ហើយរាជរដ្ឋាភិបាលកម្ពុជា កំពុងតែបន្តពិភាក្សាជាមួយសភាសហភាពអឺរ៉ុប នូវរាល់បញ្ហាប្រឈមទាំងឡាយ ដោយគោរពគ្នាទៅវិញទៅមក៕
Source: Kampuchea Thmey Daily
0 Comments