ភ្នំពេញ ៖ ក្រុមមន្ត្រីសមាគមអាដហុក៤នាក់ និង អតីតមន្ត្រីគ.ជ.ប លោកនី ចរិយា នៅពេញមួយថ្ងៃទី ១៨កញ្ញា ឆ្នាំ២០១៨នេះ បានបង្ហាញខ្លួននៅក្នុងសវនាការជាសាធារណៈមួយដែលជាប់ពាក់ព័ន្ធនិងបទល្មើសសូកប៉ាន់សាក្សី ដែលទាក់ទងក្នុងរឿងរ៉ាវស្នេហាក្រៅតម្រារវាងលោកកឹម សុខ និងនារីកាត់សក់ឈ្មោះ ខុម ច័ន្ទតារាទី ហៅស្រីមុំ កាលពីឆ្នាំ២០១៦កន្លងទៅ។
សវនាការនេះ ដឹកនាំដោយលោកចៅក្រមឌុច សុខសារិន អនុប្រធានសាលាដំបូងរាជធានីភ្នំពេញ និងលោកសេង លៀង ជាតំណាងអយ្យការ។
តុលាការបានចោទប្រកាន់លោក នី ចរិយា លោកនី សុខា លោក យី សុខសាន លោក ណៃ រ៉ង់ដា និងលោកស្រី លឹម មុនី ពីបទ សូកប៉ាន់សាក្សី និងបទសមគំនិតសូកប៉ាន់សាក្សីប្រព្រឹត្តកាលពីឆ្នាំ២០១៦ក្នុងក្រុងភ្នំពេញនិងខេត្តកំពង់ចាម។
នៅក្នុងសវនាការក្រុមមន្ត្រីអាដហុក៤នាក់ បានឆ្លើយបំភ្លឺស្រដៀងគ្នាថា ពួកគេបានស្គាល់នាងខុម ច័ន្ទតារាទី ហៅស្រីមុំនៅថ្ងៃទី ០៩មីនា ឆ្នាំ២០១៦ នៅពេលដែលម្ដាយនិងបងប្អូនរបស់នាងបានមកដល់ស្នាក់ការសមាគមអាដហុកដើម្បីដាក់ពាក្យបណ្ដឹងឲ្យអាដហុកជួយរកយុត្តិធម៌ និងភាពស្អាតស្អំរបស់កូនស្រីឈ្មោះស្រីមុំ ក្រោយពីបែកធ្លាយខ្សែអាត់សម្លេងរវាងលោកកឹម សុខា និងស្រីមុំ។
បន្ទាប់មកលោកណៃ រ៉ង់ដា និងលោកយី សុខសាន បានបើករថយន្តទៅទទួលស្រីមុំនៅម្ដុំរោងចក្រដំបូលខៀវក្បែរកាណាឌីយ៉ា ផ្លូវវេងស្រេង។ ពេលនាំមកដល់ស្នាក់ការអាដហុកពួកគេក៏បានធ្វើកំណត់ហេតុធ្វើបទសម្ភាសស្រីមុំនិងថតវីដេអូទុកជាឯកសារ ហើយបន្ទាប់មកស្រីមុំបានផ្ដល់បទសម្ភាសន៍ដល់អ្នកកាសែតជាសិទ្ធិរបស់នាង។
ក្រុមជនជាប់ចោទបានឆ្លើយទៀតថា នៅមុនដំបូងស្រីមុំមានអារម្មណ៍ភ័យខ្លាចមិនហ៊ានចូលមកក្រសួងមហាផ្ទៃតាមការកោះហៅរបស់នាយកដ្ឋានប្រឆាំងភេរវកម្ម និង ឧក្រិដ្ឋកម្មឆ្លងដែននៅថ្ងៃទី០៧ ខែមីនាទេ បន្ទាប់ពីនាង ធី សុវណ្ណថា បានប្ដឹងមកក្រសួងមហាផ្ទៃ ទើបនៅថ្ងៃទី០៩ មីនាម្ដាយនិងបងប្អូននាងមកប្ដឹងនៅអាដហុក។
ក្រោយពីបានមកដល់អាដហុកហើយ សមាគមបានពិគ្រោះយោបល់គ្នាក្នុងការផ្ដល់សេវាមេធាវីឲ្យស្រីមុំដើម្បីនាងបានទទួលជំនួយស្មារតីផ្លូវច្បាប់ ហើយសមាគមក៏បានផ្ដល់ឲ្យនាងនូវថវិកាឧបត្ថម្ភអាហារក្នុងមួយថ្ងៃ៧ដុល្លារ និងការស្នាក់នៅ១ថ្ងៃ៧ដុល្លារ រហូតដល់ថ្ងៃនាងត្រូវចូលមកឆ្លើយបំភ្លឺនៅអយ្យការអមសាលាដំបូងរាជធានីភ្នំពេញនៅថ្ងៃទី១៩ ខែមេសា ឆ្នាំ២០១៦ ដែលសរុបជាទឹកប្រាក់អស់ចំនួន២០៤ដុល្លារ។
សវនាការនេះ ត្រូវបន្តនៅរសៀលថ្ងៃដដែល ដោយតុលាការនឹងសាក្សីលោកនី ចរិយា សួរសាក្សី និងមន្ត្រីអេស៊ីយូ ដែលជាម្ចាស់ករណី៕
Source: Kampuchea Thmey Daily
0 Comments