ភ្នំពេញ ៖ សហគមន៍ខ្មែរ-អាមេរិកកាំង ប្រកាសគាំទ្រដំណើរទស្សនកិច្ចជាផ្លូវរដ្ឋរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ទៅកាន់អង្គការសហប្រជាជាតិ នៅបុរីញូវយ៉ក សហរដ្ឋអាមេរិក ពីព្រោះនេះជាមោទនភាពបំផុតសម្រាប់កម្ពុជា នេះបើយោងតាមលិខិត ដែលការិយាល័យកម្ពុជាថ្មីទទួលបានកាលពីព្រឹកថ្ងៃទី២៤ ខែកញ្ញា ឆ្នាំ២០១៨។
តាមលិខិតចុះហត្ថលេខាដោយ អគ្គលេខាធិការ សហគមន៍ខ្មែរ-អាមេរិកកាំង ប្រចាំព្រះរាជាណាចក្រកម្ពុជា លោក តឹក ងូយ បានបញ្ជាក់ថា ក្នុងនាមជាខ្មែរអាមេរិកាំង ដែលបានចងក្រងជាសហគមន៍ខ្មែរ-អាមេរិកាំងរស់នៅកម្ពុជា ដែលមានសមាសភាព ជាពាណិជ្ជករ មន្ត្រី អ្នកស្នាក់នៅ និងអ្នកបម្រើក្នុងអង្គការមិនមែនរដ្ឋាភិបាល បានសំដែងនូវការរីករាយបំផុត និងគាំទ្រនូវទស្សនកិច្ចជាផ្លូវរដ្ឋទៅកាន់អង្គការសហប្រជាជាតិនៅបុរីញូវយ៉ក សហរដ្ឋអាមេរិក ដែលតំណាងឲ្យប្រជាជាតិខ្មែរទាំងមូល។
តាមលោក តឹក ងូយ "នេះជាមោទនភាពបំផុតសម្រាប់កម្ពុជា ក្រោមការដឹកនាំប្រកបដោយប្រសិទ្ធភាពរបស់សម្ដេចតេជោ ដែលបានបញ្ចប់សង្គ្រាមនាំមក មិនត្រឹមតែសន្តិភាព វិបុលភាពនោះទេ គឺឯកភាពជាតិនៅដំណាក់កាលទី១ ជាមួយឧទ្ទាមខ្មែរក្រហម និងដំណាក់កាលទី២ គឺកិច្ចឯកភាពជាតិ ដែលមានប្រជាពលរដ្ឋបានចេញទៅបោះឆ្នោត កាលពីថ្ងៃទី២៩ ខែកក្កដា ឆ្នាំ២០១៨ ជាង៨៣ ភាគរយ។ ជាមួយគ្នានេះដែរ យើងខ្ញុំមានមោទនភាពចំពោះសម្តេចដេជោណាស់ ដែលប្រជាពលរដ្ឋខ្មែរលើសលប់រហូតដល់៧០ភាគរយ បានបោះឆ្នោតគាំទ្រសម្ដេចតេជោជានាយករដ្ឋមន្ត្រីក្នុងអាណត្តិទី៦ថ្មីនេះ។ ឆ្លៀតក្នុងឱកាសនេះដែរ យើងខ្ញុំសូមគោរពអនុញ្ញាត ចូលរួមពីចម្ងាយជាមួយខ្មែរ-អាមេរិកាំង ដែលលោកជាមតិភាគច្រើនរស់នៅសហរដ្ឋអាមេរិក មកទទួលស្វាគមន៍ដំណើរទស្សនកិច្ចផ្លូវការរបស់សម្ដេចតេជោនេះ។ សម្ដេចតេជោនាយករដ្ឋមន្ត្រីជាទីគោរពដ៏ខ្ពង់ខ្ពស់យើងខ្ញុំប្រាកដណាស់ថា ខ្មែរអាមេរិកាំងដែលរស់នៅសហរដ្ឋអាមេរិកភាគច្រើនលើសលប់ ដែលគេមិនសូវបញ្ចេញមតិនយោបាយជាសាធារណៈមែន ក៏ប៉ុន្តែភាគច្រើន គឺមានជំនឿ និងគាំទ្រសម្ដេច តាមរយៈរូបភាពទទួលស្វាគមន៍"។
សាជាថ្មីម្ដងទៀត ក្រៅពីកិច្ចគាំទ្រ និងប្រសិទ្ធិពរជ័យ សហគមន៍ខ្មែរ-អាមេរិកកាំងរំពឹងថា អ្នកនយោបាយសហរដ្ឋអាមេរិក ដែលគេរស់នៅរាប់រយយោជន៍ឆ្ងាយពីកម្ពុជា ប្រាកដជាថ្លឹងថ្លែងពីតំលៃរវាងភាគច្រើន និងភាគតិច រាប់តាំងពីនៅកម្ពុជា រហូតដល់ទឹកដីសហរដ្ឋអាមេរិកហើយគេទទួលស្គាល់ការពិត នៃតម្លៃទំនាក់ទំនងល្អ និងកិច្ចសហប្រតិបត្តិការជិតស្និទ្ធ ដើម្បីជាផលប្រយោជន៍របស់ប្រជាពលរដ្ឋនៃប្រទេសទាំង២។
សូមបញ្ជាក់ថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងអញ្ជើញទៅចូលរួមកិច្ចប្រជុំទូទៅលើកទី៧៣ នៃមហាសន្និបាតអង្គការសហប្រជាជាតិ និងកិច្ចប្រជុំពាក់ព័ន្ធផ្សេងទៀត ចាប់ពីថ្ងៃទី២៧ ដល់ថ្ងៃទី២៣០ ខែកញ្ញា ឆ្នាំ២០១៨ នៅទីក្រុងញូវយ៉ក ហើយសម្តេចនឹងចាកចេញពីកម្ពុជា នៅថ្ងៃទី២៧ ខែកញ្ញា ឆ្នាំ២០១៨ ខាងមុខ ហើយនៅអំឡុងពេលស្នាក់នៅទីក្រុងញូវយ៉ក សម្តេចតេជោនាយករដ្ឋមន្ត្រី នឹងជួបជាមួយសហគមន៍ខ្មែរ ដែលរស់នៅសហរដ្ឋអាមេរិក និងកាណាដា ផងដែរ។
ទាក់ទងការអញ្ជើញទៅចូលរួមកិច្ចប្រជុំទូទៅលើកទី៧៣ នៃមហាសន្និបាតអង្គការសហប្រជាជាតិ របស់សម្តេចតេជោ ហ៊ុន សែន នេះដែរ កាលពីថ្ងៃទី១៧ ខែកញ្ញា មានក្រុមប្រជាពលរដ្ឋខ្មែររស់នៅរដ្ឋវ៉ាស៊ីនតោន, ក្រុងឡូវ៉ែល និងនៅរដ្ឋអ័ររីហ្គេននៃសហរដ្ឋអាមេរិក បានចេញវីដេអូក្លឹបមួយ ប្រកាសចាំទទួលស្វាគមន៍ វត្តមានរបសសម្តេចតេជោ ហ៊ុន សែននាយករដ្ឋមន្ត្រីកម្ពុជា ដែលនឹងអញ្ជើញទៅចូលរួមនៅក្នុងកិច្ចប្រជុំអង្គការសហប្រជាជាតិ នៅទីក្រុងញូវយ៉ក សហរដ្ឋអាមេរិកនោះផងដែរ៕
Source: Kampuchea Thmey Daily
0 Comments