ក្រុមមន្ត្រីបាននិយាយនៅថ្ងៃសុក្រថា ប្រធានាធិបតីចិនលោក ស៊ី ជីនភីង នឹងចូលរួមកិច្ចប្រជុំកំពូលប្រចាំតំបន់មួយក្នុងប្រទេសរុស្ស៊ីនៅសប្តាហ៍ក្រោយដែលជាការជួបជុំគ្នាមួយដែលក៏អាចរួមមានទាំងមេដឹកនាំកូរ៉េខាងជើងលោក គីម ជុងអ៊ុន និងប្រមុខនៃប្រទេសជប៉ុននិងកូរ៉េខាងត្បូងផងដែរ។
ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានអញ្ជើញលោក គីម ឲ្យចូលរួមក្នុងវេទិកាសេដ្ឋកិច្ចខាងកើតចាប់ពីថ្ងៃទី១១ដល់ថ្ងៃទី១៣ខែកញ្ញានៅក្នុងទីក្រុង វ្ល៉ាឌីវ៉ូស្តុក។
ទោះបីជាយ៉ាងណាក៏ដោយ លោកគីមមិនបានបញ្ជាក់ពីវត្តមានរបស់លោកទេប៉ុន្តែការចូលរួមរបស់លោកនឹងកត់សម្គាល់នូវជំហានដ៏សំខាន់មួយទៀតនៅក្នុងកិច្ចខិតខំប្រឹងប្រែងដើម្បីនាំទីក្រុងព្យុងយ៉ាងចាកចេញពីការឃ្លាតឆ្ងាយពីអន្តរជាតិដោយសារកម្មវិធីនុយក្លេអ៊ែររបស់ខ្លួន។
នៅឯសន្និសីទសារព័ត៌មានមួយដើម្បីប្រកាសអំពីដំណើរទស្សនកិច្ចរបស់លោក ស៊ី, ក្រុមមន្ត្រីចិនមិនបានធ្វើអត្ថាធិប្បាយទេអំពីថាតើលោកស៊ីគ្រោងនឹងជួបជាមួយមេដឹកនាំដទៃទៀតដែរឬអត់នៅក្នុងកិច្ចប្រជុំកំពូលនោះ។
លោកស៊ីនិងលោកគីមបានជួបគ្នាបីដងនៅប្រទេសចិនក្នុងឆ្នាំនេះខណៈពេលដែលប្រទេសទាំងពីរព្យាយាមធ្វើឲ្យទំនាក់ទំនងប្រសើឡើងវិញបន្ទាប់ពីរង្គោះរង្គើដោយសារតែសកម្មភាពនុយក្លេអ៊ែររបស់កូរ៉េខាងជើងនិងការគាំទ្ររបស់រដ្ឋាភិបាលក្រុងប៉េកាំងចំពោះការដាក់ទណ្ឌកម្មរបស់អង្គការសហប្រជាជាតិប្រឆាំងនឹងសម្ព័ន្ធមិត្តសម័យសង្គ្រាមត្រជាក់របស់ខ្លួនមួយនេះ។
លោកប្រមុខ ស៊ី បានបញ្ជូនមេដឹកនាំសភាចិនលោក Li Zhanshu ទៅកាន់ទីក្រុងព្យុងយ៉ាងនៅចុងសប្ដាហ៍នេះដើម្បីចូលរួមពិធីខួបលើកទី៧០របស់កូរ៉េខាងជើងដែលជាហេតុបញ្ចប់ការសន្និដ្ឋានថា ប្រធានាធិបតីចិននឹងប្រើប្រាស់ឱកាសនេះដើម្បីធ្វើដំណើរជាផ្លូវការលើកដំបូងរបស់លោកទៅកាន់ប្រទេសជិតខាង។
លោកស៊ីនឹងទៅដល់ទីក្រុង វ្ល៉ាឌីវ៉ូស្តុក នៅថ្ងៃអង្គារនិងថ្ងៃពុធ។ វានឹងក្លាយជាលើកទី១ដែលមេដឹកនាំចិនមួយរូបបានចូលរួមវេទិកាសេដ្ឋកិច្ចប្រចាំឆ្នាំដែលរៀបចំឡើងដោយប្រទេសរុស្ស៊ី។
នាយករដ្ឋមន្ត្រីជប៉ុនលោក ស៊ីនហ្សូ អាបេ ក៏បានបញ្ជាក់ពីវត្តមានរបស់លោកផងដែរ៕ AFP
Source: Kampuchea Thmey Daily
0 Comments