អ្នកប្រដាល់ជើងចាស់របស់កម្ពុជា គឺចាន់ ប៊ុនលាភ ក្លិបនិរោធមានជ័យ នឹងត្រូវជួបប្រកួតជាអ្នកប្រដាល់ថៃ ក្នុងព្រឹត្តិការណ៍ប្រដាល់ជើងឯកTV5 Knock Out Series by K.Cem ent នៅលើសង្វៀនTV5 ព្រែកកំពឹស នាយប់ថ្ងៃសៅរ៍ទី២២ ខែកញ្ញា ឆ្នាំ២០១៨នេះ។
អ្នកប្រដាល់ជើងចាស់ ចាន់ ប៊ុនលាភ ក្លិបនិរោធមានជ័យ ត្រូវគេផ្តល់ឪកាសអោយជួបជម្រះបញ្ជីជាមួយអ្នកប្រដាល់ថៃឈ្មោះChhuok Chhai ដោយជួបប្រកួតក្នុងទម្ងន់ ៦៥ គីឡូក្រាម ។ អ្នកប្រដាល់ថៃនេះ ធ្លាប់មកប្រកួតនៅស្រុកខ្មែរច្រើនលើកហើយកន្លងមក ។
Chhuok Chhai ធ្លាប់វាយឈ្នះអ្នកប្រដាល់ជើងខ្លាំងរបស់កម្ពុជាច្រើននាក់ ដែលក្នុងនោះគេវាយឈ្នះចាន់ ប៊ុនលាភចំនួន២លើក ដែលលើកទី១គេឈ្នះប៊ុនលាភក្នុងទឹកទី៣ កាលពីថ្ងៃទី ០៥ វិច្ឆិកា ២០១៧និងលើកទី២ ឈ្នះប៊ុនលាភ ក្នុងទឹកទី៤ នាថ្ងៃទី១០មិថុនា២០១៨ ។ ប៉ុន្តែយ៉ាងណា Chhuok Chhai គេក៏ធ្លាប់ចាញ់អ្នកប្រដាល់ខ្មែរច្រើននាក់ដែរ ក្នុងការមកប្រកួតប៉ុន្មានប្រកួតចុងក្រោយនេះ ។
អ្នកប្រដាល់ថៃរូបនេះ មានប្រវត្តិប្រកួតចំនួន៨៤លើក ក្នុងនោះវាយឈ្នះ៦៥លើក ចាញ់១៦នេះ និង ស្មើ០៣លើក ហេតុនេះមិនធម្មតានោះឡើយ ។
ចាន់ ប៊ុនលាភ គេមានផ្លែល្អ ពិសេសគឺផ្លែកែង និងជង្គង់ ប៉ុន្តែអ្វីដែលគេបារម្ភជំនួសប៊ុនលាភនោះ គឺខ្លាចតែចាញ់កម្លាំងស៊ុហ្វ និងចាញ់កម្ពស់ Chhuok Chhai តែប៉ុណ្ណោះ ។ចាន់ ប៊ុនលាភ មានប្រវត្តិប្រកួតមិនតិចក្រោម១០០លើកនោះទេ ប្រកួតជាមួយថៃលើកចុងក្រោយនេះ វាយចាញ់Phich Nam Ekដោយពិន្ទុ កាលពីថ្ងៃទី២៦សីហា២០១៨ ។
ជាលើកទី២៨របស់ចាន់ ប៊ុនលាភ ដែលឡើងប្រកួតជាមួយថៃ ។ គេមិនហ៊ានអះអាងមុនថា ប៊ុនលាភឈ្នះក្នុងការប្រកួតនេះទេ ។ ចាំមើល តើប៊ុនលាភ អាចសងសឹកយកឈ្នះ Chhuok Chhai បានសម្រេចឬអត់ ?សម្រាប់ការជួបគ្នាលើកទី៣នេះ ។
ចំពោះ ការប្រកួតរវាងអ្នកប្រដាល់រួមជាតិវិញ សូត្រ ខេវិន អ្នកប្រដាល់ក្លិបបក្សីស្លាបដែក ត្រូវគេផ្តល់ឪកាសម្តងទៀត អោយជួបប្រកួតសងសឹកជាមួយអ្នកប្រដាល់ផាន រះ ក្លិបតាព្រហ្មមានជ័យ ។ ពួកគេជួបប្រកួតគ្នា ក្នុងប្រភេទទម្ងន់៦០គីឡូក្រាម ។
សូត្រ ខេវិន បានវាយចាញ់ផាន រះ ដោយពិន្ទុចំនួន២លើកហើយ ។ តែយ៉ាងណាខេវិន គេនៅតែមិនអស់ចិត្តចំពោះការចាញ់នេះ ។និយាយរួម ខេវិនចាញ់ដោយសារតែកម្លាំងកាយសម្បទាខ្សោយជាងផាន រះ ប៉ុណ្ណោះ ឯទិចនិចនិងស្នៀតប្រដាល់គេមិនចាញ់នោះឡើយ ។ ដូច្នេះចាំមើល ការជួបសងសឹកលើកទី២នេះ សូត្រ ខេវិន គេសងសឹកផាន រះ បានសម្រេចឬអត់ ? ។
ពុទ្ធ ម៉ាណូយ អ្នកប្រដាល់ក្លិបពុទ្ធសេរីវង្សកីឡា ត្រូវគេផ្គូឲ្យជួបប្រកួតជាមួយតាំង តាក់ អ្នកប្រដាល់ក្លិបរស្មីភូមិគាបខេត្តបន្ទាយមានជ័យ ។ អ្នកប្រដាល់ទាំងពីរនាក់នេះ ប្រកួតគ្នាក្នុងទម្ងន់៦០គីឡូក្រាមដែរ ។
តាំង តាក់ មិនធ្លាប់ដែលប៉ះជាមួយពុទ្ធ ម៉ាណូយទេកន្លងមក ។អ្នកប្រដាល់មកពីខេត្តបន្ទាយមានជ័យរូបនេះ វាយខ្លាំង ទម្ងន់ដៃខ្លាំង ទាត់ក៏ខ្លាំងដែរ ។តែតាំង តាក់ អន់ខ្សោយខាងល្បិចកល ដោយប្រើតែកម្លាំងពេក ធ្វើអោយឆាប់ចុះខ្សោយកម្លាំងនៅពេលប្រកួតចុងទឹក ។ ចាំមើល រវាងតាំង តាក់ និងពុទ្ធ ម៉ាណូយ តើអ្នកណាឈ្នះ? ។
ផង់ សាម៉ាឡេ អ្នកប្រដាល់ក្លិបនាគរាជមាជ័យ នឹងត្រូវជួបប្រកួតជាមួយ លី តឿន អ្នកប្រដាល់ក្លិបមកុដរាជសីហ៍ ដោយប្រកួតក្នុងទម្ងន់៦០គីឡូក្រាមដែរ។ពីរនាក់នេះ ពុំធ្លាប់ជួបគ្នាទេពីមុនមក ។ ពីរនាក់នេះ សុទ្ធតែវាយខ្លាំងដូចគ្នា ហេតុនេះមិនដឹងថានរណាជាអ្នកឈ្នះនោះទេ សម្រាប់ការជួបគ្នាលើកដំបូងនេះ ?៕
Source: Kampuchea Thmey Daily
0 Comments