លោក​រដ្ឋមន្ត្រី​កសិកម្ម កម្ពុជា ស្នើ​ឲ្យ​អង្គការ FAO ជួយ ឲ្យ​អស់​លទ្ធភាព​ធ្វើយ៉ាងណា​ពង្រឹង​វិស័យ​កៅស៊ូ​ឡើងវិញ​ប្រកបដោយ​ចីរភាព

ភ្នំពេញ ​៖ លោក​រដ្ឋមន្ត្រី វេ​ង សាខុន រដ្ឋមន្ត្រី​កសិកម្ម រុ​ក្ឋា​ប្រ​ម៉ាញ់​និង​នេសាទ​បានស្នើ​ឲ្យ លោក​បណ្ឌិត Pierre-Marie Bosc មន្ត្រីជាន់ខ្ពស់​នៃ​អង្គការ​ស្បៀងអាហារ​និង​កសិកម្ម FAO សហការ​ជិតស្និទ្ធ​ជាមួយ​មន្ត្រី​ជំនាញ​នៃ​ក្រសួង ព្យាយាម​ឲ្យ​អស់​លទ្ធភាព​ធ្វើ​យ៉ាង​ណា​ពង្រឹង​វិស័យ​កៅស៊ូ​ឡើងវិញ​ប្រកបដោយ​ចីរភាព​។



ការ​ស្នើ​សុំ​របស់ លោក​រដ្ឋមន្ត្រី វេ​ង សាខុន បាន​ធ្វើឡើង​ក្នុងជំនួប​ចូល​ជួប​សម្តែង​ការគួរសម និង​ពិភាក្សា​ការងារ​ស្តីពី​ការរៀបចំ​បង្កើត​គម្រោង​ថ្នាក់​តំបន់​ដែល​ពាក់ព័ន្ធ​នឹង​ប្រទេស​ចំនួន​បី​គឺ ព្រះរាជាណាចក្រ​កម្ពុជា ព្រះរាជាណាចក្រ​ថៃ និង​ប្រទេស​មី​យ៉ាន់​ម៉ា​លើ​វិស័យ​កៅស៊ូ នា​រសៀល​ថ្ងៃ​ពុធ ១០​កើត ខែភទ្របទ ឆ្នាំច សំរឹទ្ធិស័ក ព​.​ស ២៥៦២ ត្រូវ​នឹង​ថ្ងៃទី​១៩ ខែកញ្ញា ឆ្នាំ​២០១៨ ជាមួយ លោក​បណ្ឌិត Pierre-Marie Bosc មន្ត្រីជាន់ខ្ពស់​នៃ​អង្គការ​ស្បៀងអាហារ​និង​កសិកម្ម FAO នៅ​ទីស្តីការ​ក្រសួងកសិកម្ម​។



ជា​កិច្ច​ចាប់ផ្តើម លោក​បណ្ឌិត Bosc បានធ្វើការ​កោតសរសើ​រ និង​វាយតម្លៃ​ខ្ពស់​ចំពោះ​កិច្ចអភិវឌ្ឍន៍​នៃ​សេដ្ឋកិច្ចកម្ពុជា​នាពេល​បច្ចុប្បន្ន​ក្រោម​ការដឹកនាំ​របស់​រាជ​រដ្ឋាភិបាល​។ ចំពោះ​ជំនួប​នា​ថ្ងៃនេះ លោក​បណ្ឌិត​បានបញ្ជាក់​ជូន​លោក​រដ្ឋមន្ត្រី​ជ្រាប​ថា ដោ​យស​ង្កេ​ត​ឃើញ​កសិករ​កៅស៊ូ​គ្រួសារ​មាន​បញ្ហា​ប្រឈម​ជា​ខ្លាំង​គួរ​ឲ្យ​ព្រួយបារម្ភ ជាពិសេស​លើ​បញ្ហា​តម្លៃ​កៅស៊ូ​ធម្មជាតិ​កំពុង​ធ្លាក់​ថ្លៃ ការប្រែប្រួល​អាកាសធាតុ និង​ទិន្នផល​ក៏បាន​ថយចុះ អង្គការ FAO រួមជាមួយ​អង្គការ CIRAD បាន​ឯកភាព​រៀបចំ​បង្កើត​គំរោង​ថ្នាក់​តំបន់​ត្រីភាគី​រវាង​ប្រទេស​កម្ពុជា ប្រទេស​ថៃ និង​ប្រទេស​មី​យ៉ាន់​ម៉ា ដែល​គម្រោង​នេះ​ផ្តោត​ជាសំខាន់​ទៅលើ​ប្រព័ន្ធ​សង្កេត​ការ សិក្សា​ស្រាវជ្រាវ និង​វិភាគ​ជា​លំ​អិតនៃ​លទ្ធផល​ដែល​ទទួលបាន​នៃ​ប្រទេស​នីមួយៗ ដើម្បី​ធ្វើការ​ប្រៀបធៀប និង​វាយតម្លៃ​អំពី​ស្ថានភាព ក៏ដូចជា​ប្រសិទ្ធភាព​នៃ​ការអនុវត្ត​ដាំ​ដុះ ការប្រមូល​ផល​ជ័រកៅស៊ូ និង​ធ្វើការ​កែសម្រួល​។



នា​ឱកាស​នេះ លោក​រដ្ឋមន្ត្រី​បាន​ថ្លែងអំណរគុណ​ដល់​អង្គកា​រ FAO ដែល​បាននឹងកំពុង​គាំទ្រ​ដល់​រាជរដ្ឋាភិបាល​កម្ពុជា​ក្នុងការ​អភិវឌ្ឍ​លើ​គ្រប់​វិស័យ ជាពិសេស​វិស័យ​កសិកម្ម​។ លោក​រដ្ឋមន្ត្រី​ក៏បាន​សម្តែង​នូវ​ភាព​គាំទ្រ និង​វាយតម្លៃ​ខ្ពស់​ចំពោះ​គម្រោង​ដែល​បាន​លើក​ឡើង ដោយ​លោក​រដ្ឋមន្ត្រី​បាន​បញ្ជាក់​ជូន​ភ្ញៀវ​ថា ការ​បង្កើន​សមត្ថភាព​មន្ត្រី​ជំនាញ​និង​កសិករ​ដាំ​កៅស៊ូ ការកាត់បន្ថយ​ថ្លៃដើម​និង​ពលកម្ម ការបង្កើន​ទិន្នផល ការធ្វើ​ឲ្យ​ប្រសើរ​ឡើង​នៃ​គុណភាព​ជ័រកៅស៊ូ ការ​ធានា​បាន​នូវ​និរន្តរភាព​នៃ​ដើម​កៅស៊ូ និង​ជាពិសេស​ការ​បង្កើន​ប្រាក់ចំណូល​គ្រួសារ គឺជា​គន្លឹះ​ដ៏​សំខាន់ និង​គោលដៅ​របស់​ក្រសួង​។ ទន្ទឹមនឹង​នេះ ដើម្បី​អនុវត្ត​គម្រោង​នេះ​ទទួល​បាន​ភាព​ជោគជ័យ លោក​រដ្ឋមន្ត្រី​បានស្នើ​ឲ្យ​អង្គការ FAO សហការ​ជិតស្និទ្ធ​ជាមួយ​មន្ត្រី​ជំនាញ​នៃ​ក្រសួង ព្យាយាម​ឲ្យ​អស់​លទ្ធភាព​ធ្វើយ៉ាងណា​ពង្រឹង​វិស័យ​កៅស៊ូ​ឡើងវិញ​ប្រកបដោយ​ចីរភាព៕

Source: Kampuchea Thmey Daily