តុលាការព្រហ្មទណ្ឌអន្តរជាតិ (ICC) បាននិយាយកាលពីថ្ងៃព្រហស្បតិ៍ថា ខ្លួនមានសិទ្ធិដើម្បីស៊ើបអង្កេតលើការនិរទេសជនមូស្លីមរ៉ូហ៊ីងយ៉ាទាំងបង្ខំដោយយោធាមីយ៉ាន់ម៉ាថាជាឧក្រិដ្ឋកម្មប្រឆាំងនឹងមនុស្សជាតិ។
មនុស្សប្រមាណ៧សែននាក់មកពីជនជាតិភាគតិចឥស្លាមគ្មានរដ្ឋមួយនេះបានភៀសខ្លួនចេញពីរដ្ឋ រ៉ាក់ឃីន ភាគខាងជើងប្រទេសមីយ៉ាន់ម៉ាទៅកាន់ប្រទេសបង់ក្លាដែសដែលនៅជិតខាងចាប់តាំងពីខែសីហាឆ្នាំមុនមកដើម្បីគេចពីការបង្ក្រាបបង្ហូរឈាមរបស់យោធា។
សាលាក្តីដែលមានមូលដ្ឋាននៅទីក្រុងឡាអេមួយនេះបាននិយាយក្នុងសេចក្តីថ្លែងការណ៍មួយថា អង្គជំនុំជម្រះរបស់ ICC បានសម្រេចដោយសំឡេងភាគច្រើនថា តុលាការអាចអនុវត្តយុត្តាធិការលើការនិរទេសជនជាតិរ៉ូហ៊ីងយ៉ាពីប្រទេសមីយ៉ាន់ម៉ាទៅបង់ក្លាដែស។
យោងតាមសេចក្តីថ្លែងការណ៍មួយរបស់លោក Adilur Rahman Khan អនុប្រធានសហព័ន្ធសិទ្ធិមនុស្សអន្តរជាតិបានឲ្យដឹងថា សេចក្តីសម្រេចនេះបានផ្តល់ក្តីសង្ឃឹមថានឹងមានយុត្តិធម៌សម្រាប់ក្រុមជនជាតិរ៉ូហ៊ីងយ៉ាដែលបានបន្តរងគ្រោះនៅប្រទេសបង់ក្លាដែសជាលទ្ធផលនៃឧក្រិដ្ឋកម្មដ៏ធ្ងន់ធ្ងរ។
រដ្ឋាភិបាលមីយ៉ាន់ម៉ាកាលពីថ្ងៃព្រហស្បតិ៍បានបដិសេធធ្វើអត្ថាធិប្បាយស្តីពីសេចក្តីប្រកាសនេះនៅពេលត្រូវបានទាក់ទងដោយ AFP ។
សេចក្តីសម្រេចនេះបានកើតឡើងប៉ុន្មានថ្ងៃបន្ទាប់ពីក្រុមអ្នកស៊ើបអង្កេតរបស់អង្គការសហប្រជាជាតិបានអំពាវនាវឲ្យមានការស៊ើបអង្កេតជាអន្តរជាតិនិងការកាត់ទោសមេបញ្ជាការកងទ័ពមីយ៉ាន់ម៉ានិងមេបញ្ជាការយោធាកំពូលចំនួនប្រាំនាក់ផ្សេងទៀតសម្រាប់អំពើប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិនិងឧក្រិដ្ឋកម្មសង្គ្រាមប្រឆាំងនឹងក្រុមជនជាតិរ៉ូហ៊ីងយ៉ា។
អង្គការគ្រូពេទ្យគ្មានព្រំដែនបាននិយាយថា ជនជាតិរ៉ូហ៊ីងយ៉ាយ៉ាងតិច៦,៧០០នាក់ត្រូវបានសម្លាប់នៅចន្លោះខែសីហាដល់ខែកញ្ញាឆ្នាំមុនក្នុងការបង្ក្រាបរបស់កងទ័ពដែលអង្គការសហប្រជាជាតិហៅថា “ការបោសសម្អាតជនជាតិភាគតិចដែលអាចបង្កទៅជាអំពើប្រល័យពូជសាសន៍”។
គួរបញ្ជាក់ថា សេចក្តីសម្រេចរបស់តុលាការនេះបានធ្វើឡើងបន្ទាប់ពីការដាក់ពន្ធនាគារអ្នកសារព័ត៌មានរ៉យទ័រចំនួនពីរនាក់រយៈពេល៧ឆ្នាំកាលពីថ្ងៃចន្ទពីបទរំលោភច្បាប់សម្ងាត់របស់រដ្ឋមីយ៉ាន់ម៉ាខណៈពេលរាយការណ៍អំពីការសម្លាប់រង្គាលលើជនជាតិរ៉ូហ៊ីងយ៉ា៕ AFP
Source: Kampuchea Thmey Daily
0 Comments