ក្រុមបាល់ទាត់អាស៊ីអឺរ៉ុប សមាជិកពានរង្វាន់លីគកំពូលកម្ពុជា Metfone Cambodian League 2018 មិនបានដណ្តើមបានពានរង្វាន់ណាមួយនៅក្នុងឆ្នាំ២០១៨ នោះទេ តែលោក សុក វាសនា គ្រូបង្វឹករបស់ក្រុមដែលសាកលវិទ្យាល័យនៅពីក្រោយខ្នងមួយនេះ ពេញចិត្តនឹងលទ្ធផលរួមរបស់កូនក្រុម ហើយសន្យាថានឹងបន្តប្រឹងថែមទៀតនៅឆ្នាំ២០១៩ខាងមុខ។
គ្រូបង្វឹកកាន់អាជ្ញាប័ណ្ណ AFC B Licesen រូបនេះបានបញ្ជាក់ថា «សម្រាប់ខ្ញុំផ្ទាល់ខ្លួន ខ្ញុំពេញចិត្ត(អ្វីដែលក្លិបសម្រេចបានឆ្នាំនេះ)។ តែនៅឆ្នាំក្រោយ យើងនឹងបង្កើនសមត្ថភាពដើម្បីយកពិន្ទុឲ្យបានច្រើនជាងនេះ និងចំណាត់ថ្នាក់ប្រសើរជាងនេះទៀត។ រដូវកាលនេះ ការប្រជែងចំណាត់ថ្នាក់លេខ៥មកលេខ៩ មានភាពខ្លាំងក្លា កៀកកិតមែនទែន។ នេះជាការលំបាកមួយរបស់ក្រុម តែវាជាមោទនភាពដែរសម្រាប់ខ្ញុំផ្ទាល់ដែលបានមកដឹកនាំ២រដូវកាលមកនេះ»។
លោកបានបន្តថា «រដូវកាលមុន ទោះបីមិនជោគជ័យ តែយើងរកបានពិន្ទុច្រើនជាងកាលគ្រូមុនៗដឹកនាំ ហើយរដូវកាលនេះ យើងកើនពិន្ទុសឹងតែទ្វេដង។ អីចឹងវាជាមោទនភាព។ តែយើងនៅមានគោលដៅបន្ទាប់ទៀតដែលត្រូវធ្វើ។ ប្រធានក្លិបសប្បាយចិត្តខ្លាំងចំពោះអ្វីដែលយើងសម្រេចបាន។ បើនិយាយពីប្រាក់ខែវិញ ក្លិបអាស៊ីអឺរ៉ុបសឹងតែតិចជាងវេស្ទើនផង តែឆន្ទៈរបស់កីឡាករពិតជាធំធេង។ សង្ឃឹមថាឆ្នាំក្រោយយើងនឹងល្អដូចឆ្នាំនេះដែរ»។
បើនិយាយពីលទ្ធផលក្នុងពានរង្វាន់លីគកំពូលរបស់កម្ពុជា ក្រុមអាស៊ីអឺរ៉ុប បានបញ្ចប់រដូវកាលរបស់ខ្លួនដោយឈរចំណាត់ថ្នាក់លេខ៧ ក្នុងចំណោមសមាជិកទាំង១២ក្រុម គឺជាលទ្ធផលដ៏ល្អរបស់ក្លិបតាំងពីបង្កើតមក។ តាមរយៈកម្មវិធីប្រកួតសន្សំពិន្ទុ២២ប្រកួតក្រុមអាស៊ីអឺរ៉ុប បានយកឈ្នះគូប្រកួតបាន៨លើក ហើយស្មើគ្នាបាន៦លើកនិងចាញ់៨លើក ប៉ុណ្ណោះ។ បើនិយាយពីក្នុងពានរង្វាន់សម្តេចតេជោ ហ៊ុន សែន វិញក្រុមនេះបានធ្លាក់ចេញនៅវគ្គ១៦ក្រុមចុងក្រោយថ្នាក់ជាតិក្រោយចាញ់ក្រុមជើងឯក ក្រសួងការពារជាតិដោយលទ្ធផលទាំង២ជើង ១០ទល់២៕
Source: Kampuchea Thmey Daily
0 Comments