ប្រទេសបារាំងបានចោទប្រកាន់ក្រសួងស៊ើបការណ៍សម្ងាត់របស់អ៊ីរ៉ង់ថា ស្ថិតនៅពីក្រោយផែនការបំផ្ទុះគ្រាប់បែកលើក្រុមប្រឆាំងដែលនិរទេសខ្លួនមួយនៅខាងក្រៅរដ្ឋធានីនៃប្រទេសបារាំងស្របពេលដែលទំនាក់ទំនងរវាងទីក្រុងប៉ារីសនិងក្រុងតេរ៉ង់មានភាពស្មុគស្មាញរួចទៅហើយ។ ទោះបីជាយ៉ាងណាក៏ដោយ ផែនការនេះត្រូវបានរារាំង។
រដ្ឋាភិបាលបារាំងបានប្រកាសកាលពីថ្ងៃអង្គារថា ខ្លួនបានបង្កកទ្រព្យសម្បត្តិរបស់អ្នកដែលគេសង្ស័យថាជាជនស៊ើបការណ៍សម្ងាត់របស់អ៊ីរ៉ង់ចំនួនពីរនាក់ក៏ដូចជាទ្រព្យសម្បត្តិផ្សេងទៀតដែលជាកម្មសិទ្ធិរបស់ក្រសួងស៊ើបការណ៍សម្ងាត់និងសន្តិសុខអ៊ីរ៉ង់ផងដែរ។
ការសម្រេចរបស់បារាំងក្នុងការចាត់វិធានការសងសឹកនិងចោទប្រកាន់ជាសាធារណៈនេះបានធ្វើឡើងរយៈពេលបីខែបន្ទាប់ពីមានការសង្ស័យអំពីផែនការបំផ្ទុះគ្រាប់បែកនៅឯការជួបជុំមួយរបស់អង្គការ People's Mujahedeen of Iran (MEK) នៅជាយក្រុងប៉ារីស។
រដ្ឋមន្ត្រីក្រសួងមហាផ្ទៃនិងរដ្ឋមន្ត្រីក្រសួងសេដ្ឋកិច្ចបារាំងបាននិយាយនៅក្នុងសេចក្តីថ្លែងការណ៍រួមដ៏កម្រមួយថា “ទង្វើដ៏ធ្ងន់ធ្ងរនៅលើទឹកដីរបស់យើងនេះគឺមិនអាចធ្វើឡើងដោយគ្មានការឆ្លើយតបបានទេ។ ក្នុងការសម្រេចចិត្តនេះ បារាំងបានបង្ហាញនូវការប្តេជ្ញាចិត្តរបស់ខ្លួនក្នុងការប្រយុទ្ធប្រឆាំងនឹងអំពើភេវរកម្មនៅក្នុងទម្រង់ទាំងអស់ជាពិសេសនៅលើទឹកដីរបស់ខ្លួន”។
ប្រភពការទូតរបស់បារាំងមួយបានប្រាប់ AFP ថា កងកម្លាំងសន្តិសុខបានសន្និដ្ឋានថា “ប្រធានប្រតិបត្តិការនៅក្រសួងស៊ើបការណ៍សម្ងាត់របស់អ៊ីរ៉ង់គឺបានបញ្ជាឲ្យធ្វើវា”។
យ៉ាងណាក្តី ប្រទេសអ៊ីរ៉ង់បានបដិសេធភ្លាមៗនូវការពាក់ព័ន្ធណាមួយដូចដែលកាលពីខែកក្កដានៅពេលដែល MEK បានចោទប្រកាន់ថា ខ្លួនជាអ្នកទទួលខុសត្រូវ។
អ្នកនាំពាក្យក្រសួងការបរទេសអ៊ីរ៉ង់លោក Bahram Ghasemi បានប្រាប់ AFP ក្នុងបទសម្ភាសន៍មួយថា ក្រុងតេរ៉ង់សូមច្រានចោលពាក្យបណ្តឹងរបស់បារាំងទាំងស្រុងនិងម៉ឺងម៉ាត់ប៉ុន្តែបាននិយាយថា ទ្វារសម្រាប់កិច្ចពិភាក្សានៅតែបើកចំហ។
ព័ត៌មានអំពីផែនការបំផ្ទុះគ្រាប់បែកនេះបានលេចឡើងពីរថ្ងៃបន្ទាប់ពីក្រុមអ្នកគាំទ្រគណបក្សប្រឆាំងអ៊ីរ៉ង់រាប់ពាន់នាក់បានប្រមូលផ្ដុំគ្នានៅឯមជ្ឈមណ្ឌលតាំងពិព័រណ៍មួយខាងក្រៅទីក្រុងប៉ារីសនៅថ្ងៃទី៣០ខែមិថុនា៕ AFP
Source: Kampuchea Thmey Daily
0 Comments