មន្ត្រីបាននិយាយកាលពីថ្ងៃអង្គារថា សំបុត្រដែលផ្ញើទៅលោកប្រធានាធិបតី Donald Trump និងមន្ទីរបញ្ចកោណត្រូវបានគេសង្ស័យថាមានផ្ទុកសារធាតុពុលដ៏សាហាវឈ្មោះ Ricin។
យោងតាមអ្នកនាំពាក្យក្រសួងការពារជាតិបានឲ្យដឹងថា ភ្នាក់ងារសម្ងាត់អាមេរិកបាននិយាយថា ខ្លួនបានទទួល “ស្រោមសំបុត្រគួរឲ្យសង្ស័យ” មួយដែលផ្ញើទៅកាន់លោក Trump កាលពីថ្ងៃចន្ទដែលជាថ្ងៃដូចគ្នាដែលកញ្ចប់សង្ស័យយ៉ាងហោចណាស់ពីរត្រូវបានស្ទាក់ចាប់នៅមណ្ឌលត្រួតពិនិត្យសំបុត្រមន្ទីរបញ្ចកោណ។
សេវាសម្ងាត់បាននិយាយថា “ស្រោមសំបុត្រមិនត្រូវបានទទួលនៅឯសេតវិមានទេហើយក៏មិន បានចូលសេតវិមានដែរ។ យើងអាចបញ្ជាក់បានថា យើងកំពុងធ្វើការរួមគ្នាជាមួយដៃគូអនុវត្តច្បាប់របស់យើងដើម្បីស៊ើបអង្កេតយ៉ាងពេញលេញអំពីបញ្ហានេះ”។
អ្នកនាំពាក្យមន្ទីរបញ្ចកោណលោក Chris Sherwood បាននិយាយថា អាជ្ញាធរនៅកន្លែងត្រួតពិនិត្យរបស់ខ្លួនបានទទួលស្គាល់កញ្ចប់មួយចំនួនគួរឲ្យសង្ស័យដោយបានកត់សម្គាល់ថា “ពួកគេត្រូវបានសង្ស័យថាជាសារធាតុ Ricin”។
មន្ដ្រីការពារជាតិម្នាក់បានប្រាប់ AFP ថា កញ្ចប់ទាំងនេះត្រូវបានគេផ្ញើទៅឲ្យរដ្ឋមន្ត្រីក្រសួងការពារជាតិលោក Jim Mattis និងឧត្តមនាវីឯកលោក John Richardson ។
បុគ្គលិកបានពាក់ឈុតការពារពណ៌សដើម្បីពិនិត្យមើលសំបុត្រដែលគេសង្ស័យថាមានសារធាតុ Ricin ដែលធ្លាប់ត្រូវបានគេប្រើនៅក្នុងផែនការភេរវកម្ម។
ដោយផលិតពីការកែច្នៃគ្រាប់ល្ហុងខ្វង, Ricin អាចសម្លាប់មនុស្សក្នុងរយៈពេលត្រឹមតែប៉ុន្មាននាទីប៉ុណ្ណោះបើសិនជាលេប ស្រូបឬចាក់ចូល។ វាខ្លាំងជាងសារធាតុ cyanide រហូតដល់ទៅ៦,០០០ដងហើយគេមិនស្គាល់ថ្នាំបន្សាបទេ។
ដោយសារមានជាតិពុលខ្ពស់ វាអាចបណ្តាលឲ្យចង្អោរ ក្អួត ហូរឈាមក្នុងសារពាង្គកាយនិងពិបាកដកដង្ហើមហើយឈានដល់ការស្លាប់ដោយសារសរីរាង្គលែងដំណើរការឬខូចខាតប្រព័ន្ធឈាមរត់៕ AFP
Source: Kampuchea Thmey Daily
0 Comments