ទើបប្រឡងជាប់បាក់ឌុបថ្មីៗ ត្រូវរថយន្តដឹកស៊ីម៉ងត៍ឡើងស្ពានមិនរួច រអិលថយកិនស្លាប់យ៉ាងអាណោចអាធ័ម

ភ្នំពេញ ៖ យុវសិស្សដែលទើបប្រឡងជាប់បាក់ឌុកថ្មីៗម្នាក់ ត្រូវបានស្លាប់ភ្លាមៗនៅនឹងកន្លែងកើតហេតុយ៉ាងអាណោចអាធ័ម ដោយសាររថយន្តហ៊ីយ៉ាន់ដាយ៥តោនដឹកស៊ីម៉ងតិ៍ឡើងលើស្ពានលីយ៉ុងផាត់មិនរួចរលត់ម៉ាស៊ីន រអិលថយក្រោយកិនស្លាប់ ខណៈម្តាយនិងនារីរងគ្រោះជិះម៉ូតូស្របទិសគ្នានៅពីក្រោយរថយន្តបង្ក។

ហេតុការណ៍ដ៏រន្ធត់នេះ បានកើតឡើងនៅវេលាម៉ោង២និង១០នាទីនៅលើស្ពានលីយ៉ុងផាត់ផ្នែកខាងកើត ភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ។

នារីរងគ្រោះ ត្រូវបានគេស្គាល់ឈ្មោះ ស៊ុនតាំងហៀង ភេទស្រី អាយុ១៩ឆ្នាំ រស់នៅភូមិអន្លង់ស្លែង ឃុំសំបួរមាស ស្រុកមុខកំពូល ខេត្តកណ្តាល។ រីឯរថយន្តបង្កម៉ាកហ៊ីយ៉ាន់ដាយពណ៌ស ពាក់ស្លាកលេខ ឃ ១៣២២ភព៣ បើកបរដោយបុរសម្នាក់មិនទាន់បានស្គាល់អត្តសញ្ញាណទេ បន្ទាប់ពីកើតហេតុត្រូវបានសមត្ថកិច្ចចាប់បញ្ជូនទៅការិយាល័យចរាចរណ៍ជើងគោករាជធានីភ្នំពេញ។

បើតាមស្ត្រីជាម្តាយរបស់នារីរងគ្រោះបាន ឈ្មោះ រ៉ី អាយុ៤២ឆ្នាំ បានឱ្យដឹងថា កូនស្រីគាត់ទើបនឹងប្រឡងបាក់ឌុបជាប់ថ្មីៗនេះ ហើយមុនពេលកើតហេតុ គាត់បានជិះម៉ូតូម៉ាកសង់ឌុបកូនស្រីរបស់គាត់ធ្វើដំណើរចេញពីផ្ទះតាមផ្លូវលីយ៉ុងផាត់ គោលបំណងទៅលេងផ្ទះបងប្អូននៅសង្កាត់គីឡូម៉ែត្រលេខ៦ ខណៈមកដល់ចំណុចកើតហេតុលើស្ពានលីយ៉ុងផាត់ បានបន្តិច ស្រាប់តែឃើញរថយន្តដឹកស៊ីម៉ងត៍គេចរថយន្តមួយគ្រឿងទៀត ដែលបើកបរស្របទិសគ្នាពីកើតទៅលិច ពេលនោះមិនដឹងយ៉ាងម៉េច ស្រាប់តែរថយន្តបង្ករអិលថយក្រោយរេពេញ ស្ពាន ខណៈគាត់គេចទៅឆ្វេង រថយន្តរេមកឆ្វេង គាត់គេចទៅស្តាំរថយន្តថយរេទៅស្តាំ គាត់ក៏គេចមកឆ្វេងវិញ។

ម្តាយនារីរងគ្រោះបន្តថា ខណៈគាត់គេចមកឆ្វេងវិញស្រាប់តែកូនស្រីរបស់គាត់លោតចុះពីលើម៉ូតូក៏ត្រូវរថយន្តបង្កថយកិនស្លាប់តែម្តង។

បើតាមសាក្សីនៅកន្លែងកើតហេតុបានឱ្យដឹងថា រថយន្តបង្កបន្ទាប់ពីគេចរថយន្តមួយគ្រឿងទៀតក៏រលត់ម៉ាស៊ីន ហើយដោយសារដឹកធ្ងន់ជាន់ហ្វ្រាំងមិនស៊ី ក៏រអិលថយក្រោយកិនអ្នកជិះម៉ូតូស្លាប់តែម្តង។ ភ្លាមៗសមត្ថកិច្ចក៏ទៅអន្តរាគមន៍ឃាត់ខ្លួនអ្នកបើកបរបានផងដែរ។

បច្ចុប្បន្នជនបង្កនិងរថយន្តត្រូវបានបញ្ជូនទៅការិយាល័យចរាចរណ៍ជើងគោកនៃស្នងការក្រុងចាត់ការតាមច្បាប់៕