នាវា​មួយគ្រឿង ដែល​ផ្ទុក​អ្នកដំណើរ​ជាង​២​ពាន់​នាក់ ចូល​ចត​កំពង់ផែ​ព្រះសីហនុ

ភ្នំពេញ ​៖ នាវា​ទេសចរណ៍​មួយ​គ្រឿង ឈ្មោះ Norwegian Jewel ដែល​បាន​ផ្ទុក​អ្នកដំណើរ​ចំនួន ២៣១៣​នាក់ និង​ជានា​វាទី​២៤ មកពី​កំពង់ផែ Phu My ប្រទេស​វៀតណាម បាន​ចូល​ចត នៅ​កំពង់ផែ​ស្វយ័ត​ក្រុងព្រះសីហនុ កាលពី​ព្រឹក​ថ្ងៃទី​១៧ ខែតុលា ឆ្នាំ​២០១៨ នេះ​បើ​តាម​ការបញ្ជាក់​ពី​កំពង់ផែ​ស្វយ័ត​ក្រុងព្រះសីហនុ​។



តាម​គេហ​ទំព័រ​ហ្វេ​ស​ប៊ុ​ក​របស់​កំពង់ផែ​ស្វយ័ត​ក្រុងព្រះសីហនុ បាន​ឲ្យ​ដឹង​ថា នៅ​ថ្ងៃ​ពុធ ៨​កើត ខែអស្សុជ ឆ្នាំច សំ​រិ​ទ្ធិ​ស័ក ព​.​ស ២៥៦២ ត្រូវ​នឹង​ថ្ងៃទី​១៧ ខែតុលា ឆ្នាំ​២០១៨ វេលា​ម៉ោង​៦ ព្រឹក នាវា​ទេសចរណ៍​ចំនួន​០១ គ្រឿង ឈ្មោះ Norwegian Jewel ដែល​ជានា​វាទី​២៤ មកពី​កំពង់ផែ Phu My ប្រទេស​វៀតណាម ចូល​ចត​នៅ​កំពង់ផែ​ស្វយ័ត​ក្រុងព្រះសីហនុ។ នាវា​ទេសចរណ៍​នេះ​មាន​ផ្ទុក​អ្នកដំណើរ​ចំនួន ២,៣១៣ នាក់ (​ស្រី ១២៨៤ នាក់​) និង​នាវិក​ចំនួន ១០៦៤ នាក់ (​ស្រី​២៥៨ នាក់​) ហើយ​នាវា​ទេសចរណ៍​នេះ នឹង​ចាក​ចេញពី​កំពង់ផែ​ស្វយ័ត​ក្រុងព្រះសីហនុ​នៅ​ម៉ោង​១៧​ល្ងាច នៅ​ថ្ងៃ​ដដែល ដោយ​ឆ្ពោះ​ទៅ​កាន់​កំពង់ផែ Laem Chabang ប្រទេស​ថៃ​។



​សូម​បញ្ជាក់​ថា កាលពី​ថ្ងៃទី​២៤ ខែកញ្ញា ឆ្នាំ​២០១៨ មាន​នាវា​ទេសចរណ៍​ចំនួន​០១ គ្រឿង ឈ្មោះ Viking Ocean ដែល​ជានា​វាទី​២៣ មកពី​កំពង់ផែ Laem Chabang ប្រទេស​ថៃ បាន​ចូល​ចត​នៅ​កំពង់ផែ​ស្វយ័ត​ក្រុងព្រះសីហនុ​។ នាវា​ទេសចរណ៍​នេះ មាន​ផ្ទុក​អ្នកដំណើរ​ចំនួន ៨៤៣ នាក់ (​ស្រី ៤៤៤ នាក់​) និង​នាវិក​ចំនួន​៤៦៨ នាក់ (​ស្រី​១១១ នាក់​) ហើយ​នាវា​ទេសចរណ៍​នេះ នឹង​ចាក​ចេញពី​កំពង់ផែ​ស្វយ័ត​ក្រុងព្រះសីហនុ នៅ​វេលា​ម៉ោង​២០ ថ្ងៃទី​២៦ ខែកញ្ញា ឆ្នាំ​២០១៨ ឆ្ពោះ​ទៅ​កាន់​កំពង់ផែ Hochiminh ប្រទេស​វៀតណាម​៕

Source: Kampuchea Thmey Daily