អាស៊ី​អឺរ៉ុប ត្រូវ​ចាយ​លុយ​ខ្ទង់សែន​ដុល្លារ​អាមេរិក ដើម្បី​ជួសជុល​កីឡដ្ឋាន​របស់​ខ្លួន​ដែល​កំពុងតែ​រងគ្រោះ​ដោយ​ទឹកជំនន់

កីឡដ្ឋាន​AEU Sport Park របស់​ក្លិប​បាល់ទាត់​អាស៊ី​អឺរ៉ុប​យូ​ណាយ​ធី​ត សមាជិក​ពានរង្វាន់​លី​គ​កំពូល​កម្ពុជា (Metfone Cambodian League 2018) ត្រូវបាន​ទឹក​លិចលង់​ពី​ទឹកទន្លេ​ចតុមុខ កាលពី​ខែសីហា កន្លងទៅ ហើយ​គ្រោះធម្មជាតិ​នេះ​បានធ្វើ​ឲ្យ​ប៉ះពាល់​ខ្លាំង​ដល់​ស្មៅ​លើ​ទីលាន និង របស់របរ​ក្នុង​ការិយាល័យ និង សម្ភារៈ​សំខាន់ៗ​មួយ​ចំនួន​ទៀត​នៅ​ទីតាំង​ដែល​មាន​ទំហំ​ប្រមាណ​៤​ហិច​តា រហូត​មិនអាច​ទទួល​រៀបចំ​ការប្រកួត​នានា​នៅ​ចុងរដូវ​កាល​ឆ្នាំ​២០១៨ កន្លងទៅ​។



លោក ផេង ចាន់ណា អ្នកចាត់ការ​ក្លិប​បាល់ទាត់​អាស៊ី​អឺរ៉ុប​យូ​ណាយ​ធី​ត បាន​ប្រាប់ CNCC ជុំវិញ​ការ​ជួសជុល​កីឡដ្ឋាន​របស់​ក្លិប​ខ្លួន​ឡើងវិញ​ក្រោយ​ទឹក​ស្រ​កថា «​ដំណើរការ​សាងសង់​ជាថ្មី​នេះ​អាច​នឹង​ចាប់ផ្ដើម​នៅ​អំឡុង​ខែធ្នូ ខាងមុខ ដោយ​ចំណាយ​រៀបចំ​ផ្លូវ និង ក្រវាត់​ការពារ​ទំនប់ បូក​រួមទាំង​រចនាសម្ព័ន្ធ​ខាងក្នុង​ទៀត​អស់​ប្រមាណ​ខ្ទង់​២០​ម៉ឺន​ដុល្លារ​អាមេរិក​»​។

ប្រភព​បាន​បន្ត​ថា «​សម្រាប់​ព័ត៌មាន នៃ​ការសាងសង់​ស្តា​ត​ឡើងវិញ​នៅពេល​ទឹក​ទន្លេ​ស្រក​បន្តិច (​ខែធ្នូ​) គ្រោង​នឹង​ធ្វើ​ទំនប់​ចាក់​ក្រវាត់​រត់​ពីរ​ជាន់ និង​រៀប​ឥដ្ឋ​ព័ទ្ធជុំវិញ​ដី ៤​ហិតា​ហ្នឹង ខ្ពស់​ជាង​កម្រិត​នៃ​ការ​លិច​ទឹក​ឆ្នាំ​២០១៨ កន្លះ​ម៉ែត្រ ទៅ​មួយ​ម៉ែត្រ ប្រហាក់ប្រហែល​នឹង​ផ្លូវថ្នល់​ខាងមុខ​ស្តា​ត ហើយ​ការ​ចំណាយ​នេះ​អស់​ប្រហែល ១៥​ម៉ឺន​ដុល្លារ រួម​ទាំង​ជួសជុល​ហេដ្ឋារចនាសម្ព័ន្ធ​ខាងក្នុង ចំណាយ​ប្រហែល ៥​ម៉ឺន​ដុល្លារ​ថែមទៀត ការ​ចំណាយ​នេះ​គិតតែ​លើ​បាល់ទាត់​មួយ​ទេ​»​។



គួរ​បញ្ជាក់​ថា ​កីឡដ្ឋាន AEU Sport Park មាន​ទីតាំងនៅ​ឃុំ​ស្វាយជ្រំ ស្រុក​ខ្សាច់កណ្ដាល ខេត្តកណ្ដាល ដែល​ទើប​បើក​ដំណើរការ​នៅ​រដូវ​កាល​២០១៨​នេះ​។ ថ្នាក់ដឹកនាំ​ធ្លាប់​បាន​បញ្ជាក់​ថា ចំពោះ​ការសាងសង់​ដំបូង​នៅ​កីឡដ្ឋាន​នេះ​បាន​ប្រើប្រាស់​ថវិកា​អស់​ប្រមាណ​ជាង​៣០​ម៉ឺន​ដុល្លារ​អាមេរិក​ផងដែរ​។ យ៉ាងណា​ក្លិប​ក៏​ត្រូវតែ​ជួសជុល​កីឡដ្ឋាន​របស់ខ្លួន​ឡើងវិញ​ឲ្យ​បាន​រួចរាល់​មុន​ពេល​រដូវ​កាល​ថ្មី​ឆ្នាំ​២០១៩ ខាងមុខ​មកដល់​៕

Source: Kampuchea Thmey Daily