ប៉ូលិសបាននិយាយថា បុរសម្នាក់ដែលបានគប់គ្រាប់បែកសាំងបន្ទាប់មកចាប់ស្ត្រីម្នាក់ធ្វើជាចំណាប់ខ្មាំងនៅឯស្ថានីយរថភ្លើងធំមួយរបស់ប្រទេសអាល្លឺម៉ង់កាលពីថ្ងៃចន្ទគឺអាចធ្វើសកម្មភាពដោយមានហេតុផល “ភេរវកម្ម”។
ប៉ូលិសបាននិយាយថា ពួកគេបានរកឃើញលិខិតឆ្លងដែនមួយដែលចេញឲ្យបុរសស៊ីរីអាយុ ៥៥ឆ្នាំម្នាក់នៅកន្លែងកើតហេតុហើយជនសង្ស័យបានអះអាងថា ខ្លួនជាសមាជិកនៃក្រុមសកម្មប្រយុទ្ធរដ្ឋឥស្លាម។
លោក Miriam Brauns ស្នងការរងទីក្រុង Cologne បានប្រាប់សន្និសីទសារព័ត៌មានថា “ការស៊ើបអង្កេតកំពុងពិចារណាអំពីលទ្ធភាពទាំងអស់ហើយយើងមិនច្រានចោលអំពើភេរវកម្មទេ”។
កងកម្ម៉ង់ដូប្រដាប់ដោយអាវុធធុនធ្ងន់បានបាញ់បុរសម្នាក់នោះនៅពេលពួកគេសម្រុកចូលកន្លែងកើតហេតុដោយរំដោះបានចំណាប់ខ្មាំងស្រីដែលរងរបួសស្រាល។ មនុស្សពីរនាក់ផ្សេងទៀតបានរងរបួសហើយអ្នកវាយប្រហារបានរងរបួសធ្ងន់ដោយសារគ្រាប់កាំភ្លើងច្រើនគ្រាប់។
បានទទួលដំណឹងនៅវេលាម៉ោង១២និង៤២នាទីនៅស្ថានីយ៍រថភ្លើងទីក្រុង Cologne ដែលជាកន្លែងមមាញឹកបំផុតមួយនៅក្នុងទ្វីបអឺរ៉ុប។ ពួកគេបានជម្លៀសមនុស្សចេញពីកន្លែងកើតហេតុហើយបានបញ្ឈប់រថភ្លើងទាំងអស់នៅក្បែរវិហារសាសនាគ្រិស្តរបស់ទីក្រុងនេះ។
បុរសរូបនោះបានបង្កភាពភ័យស្លន់ស្លោនៅពេលគាត់ចូលក្នុងភោជនីយដ្ឋាន McDonald's នៅខាងក្នុងស្ថានីយ៍ហើយគប់គ្រាប់បែកសាំងដែលបណ្តាលឲ្យក្មេងស្រីអាយុ១៤ឆ្នាំម្នាក់រលាក។
ប៉ូលិសបាននិយាយថា នៅពេលដែលប្រព័ន្ធបាញ់ទឹកបញ្ចេញសកម្មភាពហើយទឹកបានស្រោចចុះនៅក្នុងភោជនីយដ្ឋាននេះ បុរសរូបនោះបានចូលទៅឱសថស្ថានមួយកន្លែងនៅក្បែរនោះហើយចាប់ស្ត្រីម្នាក់ទៀតធ្វើជាចំណាប់ខ្មាំងដែលគាត់ក៏បានគំរាមដុតផងដែរ។
ប៉ូលិសបានចរចាជាមួយគាត់ក្នុងគោលបំណងបន្ធូរបន្ថយស្ថានភាពតានតឹងនិងបញ្ជាក់ពីបំណងប្រាថ្នារបស់គាត់បន្ទាប់មកក៏បានវាយលុកហាងឱសថស្ថាននោះនៅម៉ោង៣រសៀល។
ប៉ូលិសបាននិយាយថា ពួកគេមិនអាចកំណត់អត្តសញ្ញាណជាវិជ្ជមានចំពោះអ្នកចាប់ចំណាប់ខ្មាំងដែលកំពុងទទួលការវះកាត់ម្នាក់នេះទេប៉ុន្តែគេជឿថា គាត់គឺជាជនអន្តោប្រវេសន៍ស៊ីរីអាយុ៥៥ឆ្នាំ៕ AFP
Source: Kampuchea Thmey Daily
0 Comments