ឆ្លង​ចរន្ត​អគ្គិសនី ឆេះ​ផ្ទះ​អស់​មួយ​ខ្នង​ទាំង​ព្រឹក នៅ​ស្រុក​ស្ទឹងត្រង់

កំពង់ចាម ​៖ ​មាន​ការ​ភ្ញាក់ផ្អើល​ទាំង​ព្រឹក​ ដោយសារ​អគ្គិភ័យ​មួយ​ បាន​កើត​ឡើង​ ហើយ​បាន​លេប​ត្របាក់​លំនៅដ្ឋាន​របស់​ប្រជាពលរដ្ឋ រួម​នឹង​ទ្រព្យសម្បត្តិ​អស់ទាំង​ស្រុង​កាលពី​ថ្ងៃ​ទី​30 ខែតុលា ​ឆ្នាំ​2018​វេលា​ម៉ោង​7.30​នាទី នៅ​ភូមិ​ព្រែក​ស្តី .​ឃុំ​ព្រះ​អណ្តូង​.​ស្រុក​ស្ទឹងត្រង់ ខេត្តកំពង់ចាម​។

លោក ប៉ាក ជាតិ អធិការ​នគរបាល​ស្រុក​ស្ទឹងត្រង់ បានអោយដឹងថា លំនៅដ្ឋាន​ខាងលើនេះ​មាន ទំហំ​6​ម​×12​ម ធ្វើ​ពី​ឈើ ប្រក់​ក្បឿង​ ជា​កម្ម​សិទ្ធិ​របស់​ឈ្មោះ ប៉ូច ច្រា ភេទ​ប្រុស​ អាយុ​58​ឆ្នាំ​ និង​ប្រពន្ធ​ឈ្មោះ​ឃឹម ឡុំ អាយុ​59​ឆ្នាំ ​រស់នៅ​ភូមិ ឃុំ​កើតហេតុ​ខាងលើ​ បាន​ឆេះ​ខូចខាត​ទាំងស្រុង​និង​ខូចខាត​បាត់បង់​សម្ភារៈ​រួមមានៈ​1.​ស្រូវ​ចំនួន​29​បេ ​2.​អង្ក​ចំនួន​02​បេ​=100​គីឡូក្រាម ​3.​ប្រាក់​ដុល្លារ​ចំនួន​200$ 4.​ប្រាក់រៀល​2.520.000​រៀល ​5.​កងដៃ​ប្លាទីន​1​គូ​​ទម្ងន់​04​ជី​ 6.​មាស​ចំនួន​03​ជី​7 .​ទូរទស្សន៍​01.​ធុងបាស​1. តុ​1. ទូ​​1. កង់​02​គ្រឿង​. ថា​ឡេ​ថង​01​គ្រឿង​.​ទុយោ​ទឹក​ចំនួន​80​កង់​.​ក្តារ​ចំនួន​01​គីប​.​ជ្រូក​01​ក្បាល និង​សំលៀកបំពាក់​មួយចំនួន​ធំ​។



លោក អធិការ បានអោយដឹងថា ក្នុង​កិច្ចប្រតិបត្តិការ​ពន្លត់​អគ្គិភ័យ​នេះ​លោក ទុន​.​ណេ​ត អភិបាល​នៃ​គណៈ​អភិបាលស្រុក​ស្ទឹងត្រង់​បាន​ដឹកនាំ​កម្លាំង​ជួយ អន្តរាគមន៍​ដោយ​ប្រើប្រាស់​រថយន្ត​ពន្លត់​អគ្គីភ័យ​របស់​អធិការដ្ឋាន​នគរបាល​ស្រុក​ស្ទឹងត្រង់​ប្រើប្រាស់​ទឹក​អស់​ចំនួន​02​ឡាន។

លោក​ប៉ាក ជាតិ បញ្ជាក់ថា អគ្គិភ័យនេះ​បណ្តាល មកពី ឆ្លង​ចរន្ត​អគ្គិសនី​ក្នុង​បន្ទប់ ទម្រាំ​ម្ចាស់ផ្ទះ​ដឹង​ និង​រថយន្ត​ពន្លត់​អគ្គិភ័យទៅដល់ ភ្លើង​បាន​ឆេះ​ពេញ​អំណាច​ហើយ តែ​ទោះបីខូចខាត​លំនៅដ្ឋាន​អស់​មួយ​ខ្នង​ក៏ដោយ តែ​បាន​ជួយ​ទប់ស្កាត់​មិន​អោយ​ឆេះ​រាលដាល​ដល់​លំនៅដ្ឋាន​ប្រជាពលរដ្ឋ​ជិតខាង​ឡើយ​។

លោក អធិការ​បាន​សំណូមពរ​ដល់​បងប្អូន​ប្រជាពលរដ្ឋ​ត្រូវ​មានការ​ប្រុង​ប្រយ័ត្ន​ខ្ពស់​ក្នុង​ពេលនេះ​គឺ​មាន​ខ្យល់​បក់​បោក​ខ្លាំង​ត្រូវ​បិទ​បារ៉ែត​អគ្គិសនី​និង​ពន្លត់​ភ្លើងចង្ក្រាន​មុននឹង​ចាក់​ចេញពី​លំនៅដ្ឋាន​៕
​

Source: Kampuchea Thmey Daily