ភ្នំពេញ ៖ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានអះអាងថា គណៈប្រតិភូកម្ពុជា ដឹកនាំដោយសម្តេចតេជោ ហ៊ុន សែន នាយករដ្ឋមន្ត្រីនៃរាជរដ្ឋាភិបាលកម្ពុជា អញ្ជើញទៅចូលរួមកិច្ចប្រជុំទូទៅលើកទី៧៣ នៃមហាសន្និបាតអង្គការសហប្រជាជាតិ និងកិច្ចប្រជុំពាក់ព័ន្ធផ្សេងទៀតរយៈពេល៣ថ្ងៃ នៅទីបុរីញូវយ៉ក សហរដ្ឋអាមេរិក គឺជាតំណាងស្របច្បាប់របស់ប្រជាជនកម្ពុជាទូទាំងប្រទេស ដូច្នេះជោគជ័យរបស់គណៈប្រតិភូកម្ពុជានៅ អសប គឺជាជោគជ័យរបស់ជាតិខ្មែរទាំងមូល។
លោក សុខ ឥសាន លើកឡើងបែបនេះ តាមរយៈសាអេឡិកត្រូនិកតេឡេក្រាម កាលពីល្ងាចថ្ងៃទី០២ ខែតុលា។ លោកអះអាងថា តាមរយៈការបោះឆ្នោត ដែលមានប្រជាជនទូទាំងប្រទេសជាង៨៣ ភាគរយ បានចេញទៅសម្តែងឆន្ទៈ ហើយគណបក្សប្រជាជនកម្ពុជា បានទទួលសម្លេងឆ្នោត៧៧,៧៨ ភាគរយ ដែលអាចបង្កើតរាជរដ្ឋាភិបាលកម្ពុជាមួយដោយឯកឯងដែលមានសម្តេចតេជោជានាយករដ្ឋមន្ត្រី។ ដូច្នេះរារដ្ឋាភិបាលកម្ពុជានេះ គឺជាតំណាងស្របច្បាប់របស់ប្រជាជនកម្ពុជាទាំងមូល។
តាមលោក សុខ ឥសាន “ការដែលគណប្រតិភូរាជរដ្ឋាភិបាលដឹកនាំដោយសម្តេចតេជោហ៊ុន សែនទៅប្រជុំមហាសន្និបាទលើកទី៧៣នៃ អសប នៅទីក្រុងញូវយ៉កកាលពីសប្តាហ៏មុន ហើយទទួលបានជ័យជំនះដ័ត្រចះត្រចង់ធំធេងនោះ ជ័យជំនះនោះ ក៏ជាជ័យជំនះរបស់ប្រជាជាតិខ្មែរទាំងមូលដែរ មិនមែនគ្រាន់តែជាជ័យជំនះរបស់គណប្រតិភូរបស់គណបក្សប្រជានកម្ពុជាប៉ុណ្ណោះទេ ពីព្រោះគណប្រតិភូជាតំណាងប្រជាជាតិខ្មែរទូទាំងប្រទេស។ ដូច្នេះការដែលមានជនអគតិមួយចនួននិយាយថា ជ័យជំនះនេះ ជាជ័យជំនះត្រឹមតែជារបស់គណបក្សប្រជាជនកម្ពុជាម្នាក់ឯងនោះ វាគ្រាន់តែជាគំនិតទុទិដ្ឋិនិយម រំលោភការពិតព្រមទាំងប្រឆាំងច្បាប់តែប៉ុណ្ណោះ គ្មានតម្លៃអ្វីទាល់តែសោះ”។
លោក សុខ ឥសាន លើកឡើងដែរថា លទ្ធផលនៅ អសប នោះ ក៏ធ្វើឲ្យក្រុមប្រឆាំងទទួលបរាជ័យយ៉ាងអាម៉ាស់បំផុតផងដែរ ពីព្រោះគេមិនចង់ឲ្យសម្តេចតេជោ ទៅជាន់ដីអាមេរិក តែសម្តេចបានដិកនាំគណប្រតិភូរាជរដ្ឋាភិបាលកម្ពុជា ទៅដល់អាមេរិកដោយជោគជ៏យ ហើយអាសន:កម្ពុជា នៅ អសប ត្រូវបានរារដ្ឋាភិនបាលកម្ពុជា កាន់កាប់ដដែល គ្មានការារាំង ឬដកហូតដូចពួកគេទាមទារនោះឡើយ ហើយបាតុកម្មរបស់គេមិនអាចរំខានបេសសកកម្មរបស់គណប្រតិភូកម្ពុជាបានទាល់តែសោះ។ ជាមួយគ្នានោះ ក៏មានបងប្អូនខ្មែរដែលស្រឡាញ់យុត្តិធម៌ និងគាំទ្រគណបក្សប្រជាជនកម្ពុជារាប់ពាន់នាក់ បានមកស្វាគមន៏គណប្រតិភូរាជរដ្ឋាភិបាលកម្ពុជា យ៉ាងមហោឡារឹក។
អ្នកនាំពាក្យរូបនោះ បានអះអាងថា នៅបុរីញ៉ូវយ៉ក ទណ្ឌិត សម រង្សី ដែលបានប្រកាសក្តែងៗ ថា នឹងដឹកនាំបាតុកម្មប្រឆាំងនោះ ក៏បានគេចមុខបាត់ មិនហ៊ានប្រឈមនឹងទង្វើរបស់ខ្លួន ហើយប្រព័ន្ធផ្សព្វផ្សាយបរទេស ដែលបានជួយបន្ទរពួកជនប្រឆាំង ទោះបីបានខិតខំបំភ្លៃការពិតយ៉ាងណាក៏មិនអាចទទួលបានការជឿពីមហាជ និងសាធារណជនដែរ។ លោកបញ្ជាក់ថា នៅក្នុងមហាសន្និបាត គ្មានប្រទេសណាលើកយកបញ្ហាកម្ពុជា មកពិភាក្សាដូចការចង់បានរបស់ប្រែតអា ដាំ និងរ៉ូណា ស្មីត ឡើយ។
សូមបញ្ជាក់ថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចាកចេញពីកម្ពុជា កាលពីព្រឹកថ្ងៃទី២៧ ខែកញ្ញា ដើម្បីទៅចូលរួមកិច្ចប្រជុំទូទៅលើកទី៧៣ នៃមហាសន្និបាតអង្គការសហប្រជាជាតិ និងកិច្ចប្រជុំពាក់ព័ន្ធផ្សេងទៀតរយៈពេល៣ ថ្ងៃចាប់ពីថ្ងៃទី២៧ ដល់៣០ ខែកញ្ញា នៅទីបុរីញូវយ៉ក។ ជាមួយដំណើរទស្សនកិច្ចនេះ ក៏មានប្រជាពលរដ្ឋជាច្រើន ដែលរស់នៅតាមបណ្តារដ្ឋមួយចំនួន នាសហរដ្ឋអាមេរិក បានជិះយន្តហោះមករង់ចាំទទួល និងអបអរសាទរវត្តមានសម្តេចតេជោផងដែរ។ តែទន្ទឹមនឹងការអបអរសាទរចំពោះវត្តមានសម្តេចនេះ ក៏មានជនជ្រុលនិយមមួយចំនួនមានគំរោងធ្វើបាតុកម្មប្រឆាំងផងដែរ តែគំរោងនេះមិនអាចទៅរួចឡើយ ដោយមានមនុស្ស១០ទៅ២០នាក់ ប៉ុណ្ណោះបានចូលរួម។ ពីព្រោះមានមនុស្សចំនួន២នាក់ ដែលជាមេដឹកនាំដ៏សកម្ម ក្នុងការធ្វើបាតុកម្មបានប្រកាសមិនចូលរួម គឺលោក សម រង្ស៊ី និងកញ្ញា កឹម មនោវិទ្យា៕
Source: Kampuchea Thmey Daily
0 Comments