ភ្នំពេញ ៖ ជនសង្ស័យម្នាក់ទៀត ដែលជាមេខ្លោងចលនា រណសិរ្សរំដោះជាតិខែ្មរ ត្រូវបានតំណាងអយ្យការអមសាលាដំបូងរាជធានីភ្នំពេញ សម្រេចឃុំខ្លួនហើយកាលពីរសៀលថ្ងៃទី០៣ ខែតុលា ឆ្នាំ២០១៨ ក្រោមបទចោទ រៀបចំចាត់តាំងក្រុមជនប្រដាប់អាវុធ និងគ្រឿងផ្ទុះ ដោយគ្មានការអនុញ្ញាត ព្រមទាំងចូលរួមក្នុងក្រុមជនប្រដាប់អាវុធ តាមក្រមព្រហ្មទណ្ឌកម្ពុជា។
សមត្ថកិច្ចនាយកដ្ឋានប្រឆាំងភាវរកម្ម និងឧក្រិដ្ឋកម្មឆ្លងដែន កាលពីរសៀលថ្ងៃទី០២ ខែតុលា ឆ្នាំ២០១៨ បានចាប់ខ្លួនមេក្លោងម្នាក់ទៀត ពាក់ព័ន្ធទៅនឹងប៉ុនប៉ងប្រព្រឹត្តបទល្មើសផ្សេងៗ បង្កអសន្ដិសុខ និងឈានចង់ផ្តួលរំលំរាជរដ្ឋាភិបាលស្របច្បាប់ ហើយការចាប់ខ្លួននេះ បានធ្វើឡើងនៅក្នុងទឹកដីខេត្តព្រះវិហារ។ មេក្លោងរូបនេះ ត្រូវបានសមត្ថកិច្ចរាយការណ៍ថា ឈ្មោះ ប៊ុន ប្រសើរ អាយុ៤២ឆ្នាំ ឈ្មោះហៅក្រៅ ថង ឌី នៅភូមិកំប្រាក់ ឃុំយាង ស្រុកជាំក្សាន្ត ខេត្តព្រះវិហារ ជាសមាជិកចលនារណសិរ្សរំដោះជាតិខ្មែរ។ ក្នុងប្រតិបត្តិការនោះ កម្លាំងនគរ បាលដកហូតបាន កាំភ្លើង AK ៤៧មួយដើម, អាវុធខ្លីមួយដើម, គ្រាប់បែក៤គ្រាប់, កាមេរ៉ា១គ្រឿង, កុំព្យូទ័រ១គ្រឿង, ម្សៅក្រាមពណ៌ស១គីឡូក្រាម, ម្សៅពណ៌លឿង១គីឡូក្រាម, កាំជ្រូច ដែល អាចកែច្នៃធ្វើគ្រាប់បែក, កែវឆ្លុះ៣គ្រឿង និងលិខិតឆ្លងដែន១ ។ ក្រោយចាប់ខ្លួន ជនសង្ស័យត្រូវបាន នាំទៅកាន់នាយកដ្ឋាននគរបាលប្រឆាំងភារៈកម្ម និងឧក្រិដ្ឋកម្មឆ្លងដែន ក្រសួងមហាផ្ទៃ ដើម្បីបន្តនីតិវិធី មុនពេលបញ្ជូនទៅតុលាការ។
ឈ្មោះប៊ុន ប្រសើរ ហៅ ក្រូច ភេទប្រុស អាយុ៤២ ឆ្នាំ ដែលជាអតីតធ្លាប់បួសជាសង្ឃនៅប្រទេសថៃផងនោះ ត្រូវបានសមត្ថកិច្ចនាយកដ្ឋានប្រឆាំងភាវរកម្ម និងឧក្រិដ្ឋកម្មឆ្លងដែន បញ្ជូនទៅកាន់តុលាការកាលពីវេលាម៉ោង១២ ថ្ងៃត្រង់ ថ្ងៃទី០៣ ខែតុលា ឆ្នាំ២០១៨ ហើយក្រោយពីសាកសួរ តំណាងអយ្យការលោក អ៊ុំ សុភ័ក្តិ បានសម្រេចចោទប្រកាន់ពីបទរៀបចំចាត់តាំងក្រុមជនប្រដាប់អាវុធ សន្និធិអាវុធ និងរឿងផ្ទុះដោយគ្មានការអនុញ្ញាត និងចូលរួមក្រុមជនប្រដាប់អាវុធ តាមមាត្រា៤៨៥ មាត្រា ៤៨៦ និងមាត្រា៤៨៨ នៃក្រមព្រហ្មទណ្ឌកម្ពុជា ហើយបញ្ជូនទៅឲ្យចៅក្រមស៊ើប លោក អ៊ឹម វណ្ណៈ ចាត់ការតាមនីតិវិធី។
បើតាមឯកសាររបស់អគ្គស្នងការនគរបាលជាតិបានឲ្យដឹងថា ឈ្មោះ រស់ សាម៉ុន ហៅក្រូច គឺជាសមាជិករបស់ចលនាក្បាលខ្លា ដែលមានលោកសោម ឯក ជាមេដឹកនាំ។ ចលនាក្បាលខ្លា បានកសាងកងកម្លាំងប្រដាប់អាវុធនៅក្នុងព្រៃ ដើម្បីប្រឆាំងរាជរដ្ឋាភិបាល ប៉ុន្តែត្រូវបានសមត្ថកិច្ចបង្ក្រាប និងចាប់ខ្លួនឈ្មោះ សោម ឯក ដែលជាមេខ្លោងដាក់ពន្ធនាគាររួចហើយ។ ចលនាក្បាលខ្លារបស់លោក សោម ឯក បានចងសម្ព័ន្ធភាពជាមួយចលនារណសិរ្សរំដោះជាតិ របស់លោក សម សេរី។
កាលពីថ្ងៃទី០១ ខែតុលា ឆ្នាំ២០១០ សាលាដំបូងរាជធានីភ្នំពេញ បានកាត់ទោស សោម ឯក ឲ្យជាប់ពន្ធនាគាររយៈពេល២៨ឆ្នាំ ពាក់ព័ន្ធនៅក្នុងអំពើភេរវកម្មបង្កៃគ្រឿងផ្ទុះចំនួន៣គ្រាប់នៅរាជធានីភ្នំពេញ កាលពីថ្ងៃទី២ ខែមករា ឆ្នាំ២០០៩ និងបានកេណ្ឌក្រុមភេរវជន និងបណ្ដុះបណ្ដាល នៅចន្លោះឆ្នាំ២០០៥ និង២០០៩។ សមាជិករបស់ចលនានេះ ត្រូវបានសមត្ថកិច្ចចាប់ខ្លួនជាបន្តបន្ទាប់ នាពេលកន្លងមក បន្ទាប់ពីពួកគេបានធ្វើសកម្មភាពបង្កចលាចលក្នុងសង្គម ហើយបើតាមរបាយការណ៍របស់សមត្ថកិច្ចបញ្ជាក់ថា ក្រុមនេះបានធ្វើសកម្មភាពទិញអាវុធ និងគ្រាប់យកមកលាក់ទុក ក្នុងគោលបំណងរៀបចំកម្លាំងប្រដាប់អាវុធអនាធិបតេយ្យខុសច្បាប់ ដែលមានអង្គការចាត់តាំង ដើម្បីបះបោរប្រឆាំងរាជរដ្ឋាភិបាលបង្ករអសន្តិសុខ ធ្វើអោយមានមហន្តរាយដល់អាយុជីវិតមនុស្ស និងប៉ះពាល់ដល់សន្តិសុខជាតិ។
ទាក់ទងបញ្ហានេះ នាយឧត្តមសេនីយ៍ ខៀវ សុភ័គ រដ្ឋលេខាធិការ និងជាអ្នកនាំពាក្យក្រសួងមហាផ្ទៃ មិនអាចសុំការបញ្ជាក់បានទេ ដោយទូរស័ព្ទមិនមានអ្នកទទួល តែលោកបានបញ្ជាក់ប្រាប់បណ្តាញព័ត៌មានក្នុងស្រុកថា មេខ្លោងរបស់ក្រុមជួញដូរអាវុធខុសច្បាប់ទាំង៨នាក់ ដែលប៉ុនប៉ងប្រព្រឹត្តបទល្មើស បង្កអសន្ដិសុខ និងឈានទៅផ្តួលរំលំរាជរដ្ឋាភិបាលកម្ពុជាស្របច្បាប់នោះ ត្រូវបានចាប់ខ្លួនកាលពីរសៀលថ្ងៃទី០២ ខែតុលា នៅក្នុងទឹកដីខេត្តព្រះវិហារ ហើយជនសង្ស័យ និងវត្ថុតាងកំពុងត្រូវបានបញ្ជូនពីខេត្តព្រះវិហារ មកកាន់អគ្គស្នងការដ្ឋាននគរបាលជាតិ នៅរាជធានីភ្នំពេញ ដើម្បីចាត់ការតាមនីតិវិធី ហើយនៅរសៀលថ្ងៃទី៣ ខែតុលា ឆ្នាំ២០០១៨ ជនសង្ស័យខាងលើ ត្រូវបានបញ្ជូនទៅកាន់សាលាដំបូងរាជធានីភ្នំពេញដើម្បីឲ្យព្រះរាជអាជ្ញាធ្វើការសាកសួរ និងចោទប្រកាន់។
គួររំលឹកថា មនុស្សចំនួន៨នាក់ ក្នុងនោះមានស្រីម្នាក់ ត្រូវបានឃាត់ខ្លួនជាបន្តបន្ទាប់ ពាក់ព័ន្ធករណីជួញដូរអាវុធខុសច្បាប់ ប្រឆាំងរាជរដ្ឋាភិបាលកម្ពុជា ហើយជនសង្ស័យទាំងនោះ ត្រូវបានប៉ូលិសចាប់ខ្លួននៅខេត្តកំពង់ស្ពឺ កំពត និងពោធិ៍សាត់ កាលពីចុងខែកញ្ញា ឆ្នាំ២០១៨ ហើយត្រូវបានសមត្ថកិច្ចបញ្ជូនទៅសាលាដំបូងរាជធានីភ្នំពេញ កាលពីថ្ងៃទី៣០ ខែកញ្ញា ឆ្នាំ២០១៨។ អាវុធដែលដកហូត គឺអាកាស្វាយបត់ចំនួន២៨ដើម ដោយជនសង្ស័យកប់លាក់ទុកនៅក្នុងដី ស្ថិតនៅសង្កាត់ពន្សាំង ខណ្ឌព្រែកព្នៅ រាជធានីភ្នំពេញ ចំនួន២៥ដើម ហើយនៅភូមិតេជោក្បាលដំរី ឃុំតេជោអភិវឌ្ឍន៍ស្រុកឈូក ខេត្តកំពត រកឃើញកាំភ្លើងចំនួនពីរដើម និងនៅភូមិបឹងស្មុគ ឃុំស្វាយស ស្រុកក្រគរ ខេត្តពោធិសាត់ រកឃើញកាំភ្លើងចំនួនមួយដើម។ ក្រៅពីកាំភ្លើងមាន បង់ចំនួនពីរ គ្រាប់អាកាចំនួន១៧គ្រាប់ និង M16 ចំនួន២០គ្រាប់។
មនុស្សប្រុសស្រីទាំង៨នាក់នោះរួមមានឈ្មោះ ទី១, សៀង វណ្ណឌឿន ទី២, វ៉ន ឡេង ទី៣, វ៉ន សាវណ្ណ ទី៤, ថត សាម៉េត ទី៥, ហេង ហៃ ទី៦, ណុប វ៉ុន ទី៧, សាន សៅរី ទី៨, ប៉ែន ប៊ុនធឿន ហើយតាមចម្លើយរបស់ជនសង្ស័យបានសារភាពថា ក្រុមខ្លួនចង់ងើបបះបោរប្រឆាំងរាជរដ្ឋាភិបាល និងស្វះស្វែងប្រភពហិរញ្ញវត្ថុ។
ប្រតិបត្តិការបង្ក្រាបជនសង្ស័យទាំង៨នាក់នេះ ត្រូវបានសមត្ថកិច្ចបញ្ជាក់ថា បានធ្វើឡើងតាំងពីថ្ងៃទី២៦ ខែកញ្ញា ឆ្នាំ២០១៨ ដោយចាប់ផ្ដើមដំបូងចុះបង្ក្រាបនៅសង្កាត់ពន្សាំង ខណ្ឌព្រែកព្នៅ របស់កម្លាំងនគរបាលប្រឆាំងភេរវកម្ម និងឧក្រិដ្ឋកម្មឆ្លងដែន សហការជាមួយប៉ុស្ដិ៍នគរបាល ដោយមានការឃាត់ខ្លួនជនសង្ស័យមួយចំនួន និងអាវុធប្រភេទ AK ស្វាយបត់ ចំនួន២៥ដើម។
លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញបានអះអាងថា មនុស្សប្រុសស្រីចំនួន៨នាក់ ដែលត្រូវបានឃាត់ខ្លួន ត្រូវបានតុលាការចោទប្រកាន់ផ្លូវការហើយ ពីបទរៀបចំចាត់តាំងក្រុមជនប្រដាប់អាវុធ និងរឿងផ្ទុះដោយគ្មានការអនុញ្ញាត ព្រមទាំងចូលរួមក្នុងក្រុមជនប្រដាប់អាវុធ តាមក្រមព្រហ្មទណ្ឌកម្ពុជា។ លោកបញ្ជាក់យ៉ាងនេះថា អយ្យការបានសម្រេចចោទប្រកាន់ និងបញ្ជូនទៅចៅក្រមស៊ើបសួរ ដើម្បីចាត់ការបន្តតាមនីតិវិធីពីបទ ទី១, រៀបចំចាត់តាំងក្រុមជនប្រដាប់អាវុធ សន្និធិអាវុធ និងរឿងផ្ទុះដោយគ្មានការអនុញ្ញាត និងទី២, ចូលរួមក្នុងក្រុមជនប្រដាប់អាវុធ តាមមាត្រា៤៨៥ មាត្រា ៤៨៦ និងមាត្រា៤៨៨ នៃក្រមព្រហ្មទណ្ឌកម្ពុជា។
ពាក់ព័ន្ធនឹងការបង្ក្រាបបទល្មើសក្រុមចលនាប៉ះបោខាងលើនេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោត បានផ្តល់ថវិកា៥ម៉ឺនដុល្លារសហរដ្ឋអាមេរិក ដល់កងកម្លាំងនគរបាល ដើម្បីជាការលើកទឹកចិត្តផងដែរ៕
Source: Kampuchea Thmey Daily
0 Comments