អង្គ​រថា​យ​ហ្គឺ​រ បើក​សាលា​បង្ហាត់​បាល់ទាត់​គិត​ប្រាក់ ចាប់ពី​ដើមខែ​វិច្ឆិកា នេះ​តទៅ

ក្រុមបាល់ទាត់​ខេ​ម​បូ​ឌា​ន​ថា​យ​ហ្គឺ​រ (Cambodian Tiger FC) សមាជិក​ក្នុង​ពានរង្វាន់​ជម្រើស​ជើងឯក​ជាតិ (Metfone Cambodian League 2018) ដែលមាន​មូលដ្ឋាន​នៅ​ខេត្តសៀមរាប បានសម្រេច​បង្កើត​សាលា​បាល់ទាត់​កម្រិត​យុវជន​គិត​ប្រាក់ ចាប់ពី​ដើមខែ​វិច្ឆិកា តទៅ​ដោយ​បែងចែក និង​កំណត់​ចំនួន​សិស្ស​ដែល​បាន​ចុះឈ្មោះ​។

​យោងតាម​សេចក្តី​ជូនដំណឹង​របស់​ក្លិប​ដែលមាន​ក្បាលម៉ាស៊ីន ជា​ជនជាតិ​ជប៉ុន​មួយ​នេះ​បាន​បញ្ជាក់​ថា ​សាលា​បាល់ទាត់​របស់​ខ្លួន​នឹង​ចាប់​ផ្តើម​ពីថ្ងៃ​ទី​៧ ខែវិច្ឆិកា ឆ្នាំ​២០១៨ តទៅ​ដែល​មាន​លោកគ្រូ​បង្វឹក ចាន់ រិទ្ធី និង គ្រូបង្វឹក Jordi Aluja ជនជាតិ​អេ​ស្ប៉ា​ញ សហការគ្នា​បង្ហាត់​។



ការ​ហ្វឹកហាត់​នេះ​នឹង​ធ្វើ​ឡើង​នៅលើ​ទីលាន Lion Futsal ក្នុង​ខេត្ត​សៀមរាប ខណៈ​កំណត់​យក​អ្នក​ចុះឈ្មោះ​បាន​មុនគេ​ចំនួន​៣០​នាក់​ប៉ុណ្ណោះ​។

​ប្រភព​បញ្ជាក់​ថា ​ការ​បង្ហាត់​ធ្វើឡើង​នៅ​ថ្ងៃ​ព្រហស្បតិ៍ រៀងរាល់​សប្ដាហ៍​។ សម្រាប់​កុមារា​អាយុ​ចាប់ពី​៩​ឆ្នាំ​ដល់​១៥ ឆ្នាំ​នឹង​បង្ហាត់​ចាប់ពី​ម៉ោង​៥និង៣០​នាទី​ដល់​ម៉ោង​៦និង៣០​នាទី​ល្ងាច ក្នុង​តម្លៃ​៨​ដុល្លារ ក្នុង​១​ខែ​។ ចំណែក​យុវជន​អាយុ​ចាប់ពី​១៥​ឆ្នាំ​ឡើង គឺ​ហ្វឹកហាត់​ចាប់ពី​ម៉ោង​៦និង៣០នាទី​ដល់​ម៉ោង​៨​យប់ ក្នុង​តម្លៃ​១០​ដុល្លារ​ក្នុង​១​ខែ​។ សម្រាប់​អ្នក​ចាប់អារម្មណ៍​សូម​ទាក់ទង​តាម​លេខ​086 691 947 ឬ​089 767 897​។

ក្រុម​អង្គ​រថា​យ​ហ្គឺ​រ បាន​ប្តូរ​ឈ្មោះ​មកពី​ក្រុម​ត្រាយ​អាស៊ី​ភ្នំពេញ កាលពី​ចុង​រដូវ​កាល​២០១៤ ហើយ​នៅ​រដូវ​កាល​២០១៥ គឺជា​កំណត់ត្រា​ល្អ​របស់​ក្លិប​ពោល​គឺ អាច​ឡើង​ដល់​វគ្គ​៤​ក្រុម​ចុងក្រោយ​ទាំង​ពានរង្វាន់​សម្តេច ហ៊ុន សែន និង​ពានរង្វាន់​មិត្ត​ហ្វូ​ន​ខេ​ម​បូ​ឌា​ន​លី​ក ក្រោយ​ឈរ​ចំណាត់ថ្នាក់​លេខ​៣​ដូចគ្នា​។ ក្រុម​នេះ ទទួល​បាន​សិទ្ធិ​ប្រើប្រាស់​កីឡដ្ឋាន​ខេត្តសៀមរាប ពី​ក្រសួង​អប់រំ​យុវជន​និង​កីឡា កាលពី​រដូវ​កាល​ឆ្នាំ​២០១៧ កន្លង​ធ្វើជា​ទឹកដី​របស់​ខ្លួន​រាល់​ការប្រកួត​នានា៕

Source: Kampuchea Thmey Daily