ក្រុមបាល់ទាត់ភ្នំពេញក្រោន ម្ចាស់ជើងឯក៦សម័យកាលប្រចាំពានរង្វាន់លីគកំពូលកម្ពុជា (Metfone CambodianLeague) បានបញ្ជូនក្រុមកីឡាករយុវជនថ្នាលរបស់ខ្លួនគឺអាយុក្រោម១៤ឆ្នាំ (U14) ទៅប្រកួតក្នុងពានរង្វាន់អន្តរជាតិមួយនៅប្រទេសថៃ ខណៈ២ប្រកួតបើកឆាកមកនេះនៅមិនទាន់រកបានជ័យជម្នះនៅឡើយនោះទេ។
ពានរង្វាន់ដែលក្រុមកីឡាករអាយុក្រោម១៤ឆ្នាំរបស់ភ្នំពេញ ចូលរួមប្រកួតនេះមានឈ្មោះថា CP-Meiji Cup U-14 International Champions 2018 ដែលជាការផ្តួចផ្តើមគំនិតឡើងពីក្លិបយក្ស Buriram United របស់ថៃ។ ការប្រកួតនឹងចាប់ផ្តើមជាផ្លូវការនាថ្ងៃទី៣០ ខែតុលា ដល់ថ្ងៃទី៣ ខែវិច្ឆិកា ឆ្នាំ២០១៨ នៅកីឡដ្ឋាន Chang Arena។
ក្រុមទាំងអស់បានបែងចែកជា៤ពូល ដោយពូល A ក្រុម Chonburi FC របស់ថៃ ក្រុម Fagiano Okayama របស់ជប៉ុននិងក្រុម Suphanburi FC របស់ថៃ ហើយពូល B មានក្រុម Jubilo Iwata របស់ជប៉ុន ក្រុម Kitchee SC របស់ហុងកុង និងក្រុម Bangkok Utd របស់ថៃពូល C មាន Buriram United របស់ថៃ ភ្នំពេញក្រោន របស់កម្ពុជា និង Nongbua Pitchaya FCរបស់ថៃ និងពូល NFDP Malaysia របស់ម៉ាឡេស៊ី ASPIRE Academy របស់កាតា Muangthong United របស់ថៃ។
កាលពីប្រកួតបើកឆាកក្រុមភ្នំពេញក្រោន ចាញ់ក្រុមU14 Burriram United ៤ទល់០ នៅយប់ថ្ងៃអង្គារ ទី៣០ ខែតុលា ឆ្នាំ២០១៨ ខណៈនៅរសៀលថ្ងៃពុធ ទី៣១ ខែតុលា ឆ្នាំ២០១៨ បានបន្តប្រកួតចាញ់ក្រុមNongbua Pitchaya FC ដោយលទ្ធផល៧ទល់០ ក្នុងវគ្គជម្រុះតាមពូលដូចគ្នា។ ដូច្នេះក្រុមរបស់កម្ពុជា មួយនេះធ្លាក់ត្រឹមវគ្គចែកពូល។ យ៉ាងក្តីរង់ចាំការចាប់គូប្រកួតជាមួយក្រុមដែលធ្លាក់ត្រឹមវគ្គចែកពូលផ្សេងទៀតដើម្បីប្រកួតយកចំណាត់ថ្នាក់ប្រចាំឆ្នាំ។
នេះជាលើកទី៣ហើយដែលក្លិបភ្នំពេញក្រោន បញ្ជូនកីឡាករទៅចូលរួមប្រកួតក្នុងពានរង្វាន់នេះ ខណៈកាលពីឆ្នាំដំបូង២០១៦ គឺប្រកួតមិនបានចប់ចុងចប់ដើមនោះទេ ដោយការប្រកួតត្រូវរំសាយបន្ទាប់ព្រះបាទBhumibol Adulyadej ព្រះមហាក្សត្រនៃព្រះរាជាណាចក្រថៃ បានសោយទិវង្គតនៅពេលនោះ។ ចូលឆ្នាំទី២ គឺនៅឆ្នាំ ២០១៧ ក្រុមរបស់ភ្នំពេញក្រោន បានប្រកួតចាញ់គ្រប់ការប្រកួតដោយឈរនៅបាតតារាងប្រចាំក្រុមទាំង៨ដែលចូលរួម ប៉ុន្តែក្រុមនេះទទួលបានពានរង្វាន់ Fiar Play ប្រចាំព្រឹត្តិការណ៍ទៀតផង។
គណៈកម្មការបានកំណត់ថា ក្រុមទាំងអស់ត្រូវដាក់កីឡាករឲ្យលេងម្ខាង១១នាក់ហើយធ្វើឡើងចំនួនពីរតង់ដោយមួយតង់មានរយៈពេល៣០នាទី។ គោលបំណងរបស់អ្នករៀបចំកម្មវិធីនេះគឺដើម្បីអភិវឌ្ឍន៍បាល់ទាត់យុវជន និងការប្រកួតបាល់ទាត់អន្តរជាតិជាមួយនឹងក្រុមខ្លាំងក្នុងតំបន់។ ពួកគេគ្រោងនឹងពង្រីកការប្រកួតនៅថ្ងៃអនាគត៕
Source: Kampuchea Thmey Daily
0 Comments