ភ្នំពេញ ៖ អង្គការសមាគមសហប្រតិបត្តិការកម្ពុជា-ជប៉ុនគ្រោងនឹងបញ្ជូនកម្មសិក្សាការីខ្មែររាប់រយនាក់ទៅសិក្សានិងធ្វើការនៅប្រទេសជប៉ុនដើម្បីជួយបង្កើនប្រាក់ចំណូលលើកស្ទួយដល់សេដ្ឋកិច្ចគ្រួសារក៏ដូចជាសេដ្ឋកិច្ចជាតិឲ្យកាន់តែប្រសើរឡើងថែមទៀត។
ការបញ្ជូនកម្មសិក្សាការីខ្មែរទៅសិក្សានិងធ្វើការនៅប្រទេសជប៉ុននេះធ្វើឡើងតាមរយៈការចុះអនុស្សរណៈរួមគ្នាមួយរវាងក្រសួងការងារនិងបណ្តុះបណ្តាលវិជ្ជាជីវៈជាមួយអង្គការសមាគមសហប្រតិបត្តិការកម្ពុជា-ជប៉ុនកាលពីព្រឹកថ្ងៃទី០៣ខែតុលាឆ្នាំ២០១៨នៅទីស្តីការក្រសួងដែលចុះហត្ថលេខាដោយលោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈនិងលោក Fumio Yamada ប្រធានអង្គការសមាគមសហប្រតិបត្តិការកម្ពុជា-ជប៉ុន។
ថ្លែងនៅក្រោយពិធីចុះអនុស្សារណៈយោគយល់នាឱកាសនោះដែរ លោក បណ្ឌិត អ៊ិត សំហេងបានមានប្រសាសន៍ថា ការបញ្ជូនកម្លាំងពលកម្មកម្ពុជាទៅសិក្សានិងធ្វើការនៅប្រទេសជប៉ុននេះពិតជាមានសារៈសំខាន់ណាស់ព្រោះថាមិនត្រឹមតែជួយបង្កើនចំនួនពលករទៅធ្វើការនៅទីនោះឲ្យកាន់តែច្រើនថែមទៀតប៉ុណ្ណោះទេថែមទាំងផ្តល់ឱកាសឲ្យកម្មសិក្សាការីខ្មែរទទួលបាននូវចំណេះដឹង បទពិសោធន៍ថ្មីៗពីប្រទេសជប៉ុនដើម្បីយកមកអភិវឌ្ឍន៍នៅប្រទេសរបស់ខ្លួនវិញផងដែរ។
លោករដ្ឋមន្ត្រីបានស្នើឲ្យអង្គការសមាគមសហប្រតិបត្តិការកម្ពុជា-ជប៉ុនជួយបណ្តុះបណ្តាលនិងបញ្ជួនកម្មសិក្សាការីខ្មែរទៅសិក្សានិងធ្វើការនៅប្រទេសជប៉ុនឲ្យបានច្រើនថែមទៀតដើម្បីឲ្យពួកគេទទួលបានប្រាក់ចំណូលខ្ពស់ជួយលើកស្ទួយដល់សេដ្ឋកិច្ចគ្រួសារឲ្យកាន់តែប្រសើរឡើងថែមទៀតខណៈបច្ចុប្បន្ននេះមានកម្មសិក្សាការីខ្មែរកំពុងធ្វើការនៅប្រទេសជប៉ុនចំនួន៨៦០នាក់។
ចំណែកលោក Fumio Yamada ប្រធានអង្គការសមាគមសហប្រតិបត្តិការកម្ពុជា-ជប៉ុន បានមានប្រសាសន៍ថា អនុស្សរណៈនេះ មានរយៈពេល៥ឆ្នាំដោយអង្គការនឹងជួយបណ្តុះបណ្តាលដល់ជនពិការកម្ពុជាឲ្យចេះជំនាញជួសជុលម៉ូតូនិងជំនាញកាតដេរដើម្បីឲ្យពួកគេមានលទ្ធភាពអាចរកស៊ីចិញ្ចឹមជីវិតដោយខ្លួនឯងបាន។
ទន្ទឹមនឹងនេះលោកបានបន្តថា អង្គការក៏នឹងជួយបណ្តុះបណ្តាលដល់កម្មសិក្សាការីខ្មែរនូវជំនាញមួយចំនួនដូចជាជំនាញផ្នែកសេវាថែទាំមនុស្សចាស់ សំណង់ស្ថាបត្យកម្ម ទេសចរណ៍និងផ្នែកធ្វើគ្រឿងបន្លាស់តូចៗជាដើមដើម្បីបញ្ជួនទៅសិក្សានិងធ្វើការនៅប្រទេសជប៉ុនដែលតាមក្នុង១ឆ្នាំត្រូវបញ្ជូនទៅប្រមាណពី១០០ទៅ២០០នាក់ខណៈកន្លងមកអង្គការធ្លាប់បានបញ្ជួនទៅប្រទេសជប៉ុនបានប្រមាណជិត៥០នាក់រួចមកហើយ។
លោកបានបន្តថា ប៉ុន្តែកម្មសិក្សាការីដែលរៀនចប់ត្រឹមថ្នាក់ទី១២ត្រូវមកចុះឈ្មោះរៀនភាសាជប៉ុននិងសិក្សាជំនាញទាំងនេះរយៈ៣ឆ្នាំជាមុនសិន ទើបបញ្ជូនទៅប្រទេសជប៉ុន។
គួរបញ្ជាក់ថា អង្គការសមាគមសហប្រតិបត្តិការកម្ពុជា-ជប៉ុនបានបង្កើតឡើងនៅក្នុងប្រទេសកម្ពុជា២០ឆ្នាំមកហើយ ដោយផ្តោតការយកចិត្តទុកដាក់ទៅលើការបណ្តុះបណ្តាលមុខជំនាញបច្ចេកទេស និងវិជ្ជាជីវៈ ដល់ប្រជាជនក្រីក្រ និងជនពិការដើម្បីឱ្យពួកគេមានឱកាសទទួលបានការងារធ្វើនៅក្នុងស្រុកនិងអាចទៅធ្វើការនៅប្រទេសជប៉ុនផងដែរ៕
Source: Kampuchea Thmey Daily
0 Comments