កណ្តាល ៖ បុរសក្មេងៗចំនួន៣នាក់ ត្រូវបានសមត្ថកិច្ចនគរបាលស្រុកពញាឮចាប់ខ្លួនជាបន្តបន្ទាប់ ខណៈដែលពួកគេបានទិញថ្នាំញៀនពីម្តុំគល់ស្ពានព្រែកព្នៅ សង្កាត់ស្វាយប៉ាក ក្រុងភ្នំពេញមកជួញដូរនៅស្រុកពញាឮ ខេត្តកណ្តាល កាលពីយប់ថ្ងៃទី២៩ និងថ្ងៃទី៣០ ខែកញ្ញា ឆ្នាំ២០១៨។
ប៉ូលិសបានឲ្យដឹងថា សមាសភាពក្រុមជនសង្ស័យទាំង៣នាក់ខាងលើនោះទី១. ឈ្មោះ សាយ រតនះ អាយុ២២ឆ្នាំ មិនមុខរបរពិតប្រាកដ មានទីលំនៅ ភូមិប្រក់ក្តា ឃុំវិហារលួង ស្រុកពញាឮ ខេត្តកណ្តាល ត្រូវបានចាប់ខ្លួន កាលពីវេលាម៉ោង១នៅចំណុចភូមិប្រក់ក្តា ឃុំវិហារលួង កាលពីថ្ងៃទី២៩ខែកញ្ញាឆ្នាំ២០១៨ ជាមួយវត្ថុតាងថ្នាំញៀនចំនួន១កញ្ចប់ដែលគេបានលាក់ទុកស៊កភ្ជាប់ក្នុងស្លាកយីហោដបទឹកបរិសុទ្ធ ដើម្បីបង្វែងដានសមត្ថកិច្ច។ ទី២.ឈ្មោះ ស្មាន រ៉ហ្វាឌី អាយុ២៦ឆ្នាំជនជាតិចាម មានទីលំនៅ ភូមិទួលងោក ឃុំកំពង់លួង ស្រុកពញាឮ មុខរបរលក់គ្រឿងក្រអូបតាមនៅខេត្ត។ ទី៣.ឈ្មោះ សុក ណាឌី ហៅទ្រក អាយុ ២៤ឆ្នាំ មានទីលំនៅភូមិស្រះពោធិ៍ ឃុំផ្សារដែក ស្រុកពញាឮ ខេត្តកណ្តាល។
ជនទី២និងទី៣ ត្រូវបានចាប់ខ្លួនកាលពីវេលាម៉ោង២០យប់ថ្ងៃទី៣០ ឆ្នាំ២០១៨ នៅមុខមន្ទីរពេទ្យបង្អែកស្រុកពញាឮ ខេត្តកណ្តាល រួមនឹងវត្ថុតាងថ្នាំញៀនប្រភេទតំហ្វេតាមីនចំនួន១កញ្ចប់ និងជញ្ជីង១គ្រឿងសម្រាប់ថ្នាំញៀនលក់ចែកចាយ។
លោកវរសេនីយ៍ឯក ដួង តេង អធិការនៃអធិការដ្ឋាននគរបាល ស្រុកពញាឮ បានមានប្រសាសន៍ថា ក្រុមជនសង្ស័យទី១ ធ្លាប់ជាប់ពន្ធនាគារចំនួន១៥ ខែនៅខេត្តកំពង់ស្ពឺ ពីបទជួញដូរសារធាតុញៀននេះដែរ។ លោក អធិការ មានប្រសាសន៍បញ្ជាក់ថា តាមចម្លើយសារភាព របស់ជនទាំង២ក្រុមនេះ បានប្រាប់ថា ថ្នាំញៀនទាំងនេះពួកគេបានទិញយកមកពីម្តុំគល់ស្ពានព្រែកព្នៅ សង្កាត់ស្វាយប៉ាក ខណ្ឌឫស្សីកែវ(ជាប់ព្រំប្រទល់ខណ្ឌព្រែកព្នៅ) យកមកលក់នៅស្រុកពញាឮ ប៉ុន្តែត្រូវបាន សមត្ថកិច្ចស្រុកពញាឮបង្ក្រាបបានតែម្តង។
ក្រុមជនល្មើសទាំង៣នាក់ ត្រូវបានសមត្ថកិច្ចស្រុកពញាឮ ចាប់ឃុំខ្លួន និងបញ្ជូនទៅស្នងការដ្ឋាននគរបាលខេត្តកណ្តាល ដើម្បីចាត់ការតាមផ្លូវច្បាប់៕
Source: Kampuchea Thmey Daily
0 Comments