សៀមរាប ៖ ប្រភពបានទម្លាយថា បុគ្គលិកអគ្គិសនី២នាក់ បានទារលុយ៨ពាន់ដុល្លារពីអតិថិជនករណីសុំតភ្លើងនៅម្តុំផ្សារក្រឡាញ់ តែត្រូវគេរត់ការបិទរឿង។ ចំណែកបុគ្គលិកម្នាក់ទៀតទៅតភ្លើងឲ្យអតិថិជនដែលបានយកលុយ១៥០ដុល្លារ ដើម្បីរត់ច្បាប់ បែរជាដកចេញពីក្របខណ្ឌយ៉ាងតក់ក្រហល់។
យោងតាមលិខិតស្នើសុំរកភាពយុត្តិធម៌របស់ សែម រតនៈ អតីតមន្ត្រីអគ្គិសនីបានផ្តល់មកអ្នកកាសែតឲ្យដឹងថ្ងៃទី២៩ខែកញ្ញា ឆ្នាំ២០១៨ ថា នៅថ្ងៃទី១៦ ខែសីហាឆ្នាំ២០១៨នេះ លោកត្រូវបានអង្គភាពលុបឈ្មោះចេញពីក្របខ័ណ្ឌអគ្គិសនីកម្ពុជា ដែលមានចំណារឯកភាពចុះហត្ថលេខា ដោយផ្ទាល់ពីលោក កែវ រតនៈ ទទួលបន្ទុកអគ្គិសនីកម្ពុជា ដោយគេចោទប្រកាន់មកលើរូបលោកថា យករថយន្តរបស់អង្គភាពទៅជិះដើរលេងផឹកស៊ីសាធារណៈ ខណៈពេលនោះរូបលោក ក៏បានទទួលកំហុស និងព្រមធ្វើកិច្ចសន្យា ជាមួយអង្គភាពរួចរាល់អស់ហើយដែរ។
លិខិតនោះបានរៀបរាប់បន្តថា ក្រោយមកមានករណីអតិថិជនបានប្តឹងចោទខ្ញុំថា យកលុយពីគេចំនួន១៥០ដុល្លារ ដើម្បីដាក់ពាក្យតភ្លើងថ្មីឲ្យគាត់ ដែលមានកម្លាំង ២Px២០A ខណៈពេលនោះខ្ញុំបាទបានរៀបចំដាក់ជូនគាត់រួចរាល់ផងដែរ។ ហើយទឹកប្រាក់ដែលនៅសល់ចំនួន៥០ដុល្លារប៉ុណ្ណោះ ចំពោះករណីនេះមិនមែនរូបខ្ញុំបាទ ទៅជំរិតទារប្រាក់ពីគាត់នោះទេ គឺគាត់ប្រើឲ្យបងប្អូនគាត់មកពឹងពាក់រូបខ្ញុំឲ្យជួយទេ ចុងក្រោយបែរជាខ្ញុំមានទោស ជំរិតទារលុយគេទៅវិញ។
ពីព្រោះបុគ្គល ដូចរូបខ្ញុំនេះ នៅក្នុងខេត្តសៀមរាប ទាំងមូល ភាគច្រើនឲ្យតែមានបញ្ហារឿងអគ្គិសនី គឺគេតែងតែមករករូបខ្ញុំ ព្រោះខ្ញុំនៅជិតមេស្រាប់។ លិខិតបានបញ្ជាក់ទៀតថា ក្នុងពេលថ្មីៗនេះ បុគ្គលិកអគ្គិសនីសៀមរាប ចំនួន២រូប បានទៅជំរិតទារលុយពីអតិថិជនដែលមានម្ចាស់ផ្ទះឈ្មោះ តាំង ប៊ុន ហៃ ដែលមានទីលំនៅភូមិត្រពាំងសេះ សង្កាត់គោកចក ក្រុងសៀមរាប ហើយមានទីតាំងប្រើប្រាស់អគ្គិសនីលេខកូដ ១៩៣០២២០A ដោយទាមទារតម្លៃតភ្លើង ចំនួន ៨០០០ដុល្លារគត់។
ក្រោយមកម្ចាស់សុំចរចាបាននៅសល់ត្រឹមតែ៣៥០០ដុល្លារគត់ ហើយក៏ឯកភាពគ្នាចាប់ផ្តើមចូលតភ្លើងភ្លាម។ បន្ទាប់មកម្ចាស់ផ្ទះក៏បានឯកភាព ដើម្បីតខ្នែងខ្សែមេ ABC (មានន័យថា ខ្សែធំខ្មៅ) ចូលទៅក្នុងផ្ទះល្វែង របស់គាត់ចំនួន៤ល្វែង ដែលមានចម្ងាយពីផ្ទះប្រហែល១៥០ម៉ែត្រប៉ុណ្ណោះ។ តើអ្នកដែលជំរិតទារលុយពីអតិថិជននេះខុសឬត្រូវ? បើតាមគោលការណ៍របស់អគ្គិសនីកម្ពុជា ដែរឬទេ? ព្រោះកន្លងមកមិនដែលមានទេ នៅក្នុងអង្គភាពអគ្គិសនី ទើបតែបុគ្គលិកថ្មី២នាក់នេះទេ ដែលធ្វើឲ្យមានប្រតិកម្មកើតឡើងផ្អើលពេញអង្គភាពបែបនេះ ហើយគ្មានមេណាដកចេញទៀត នេះបានចំជាខ្សែធំមែន។ បើតាមប្រភពចេញពីក្នុងអង្គភាពដែលគេស្រឡាញ់រាប់អានខ្ញុំ លួចខ្សឹប ប្រាប់ថា លោកប្រធានកំពុងដុតដៃដុតជើង ដើម្បីជួយអន្តរាគមន៍ដល់ពួកគេទាំង២នាក់ កុំឲ្យថ្នាក់លើដកចេញពីក្របខ័ណ្ឌអគ្គិសនីកម្ពុជា ដូចរូបខ្ញុំ ដោយយកលេសថា បុគ្គលិកទាំង២នាក់នោះគឺជាសកម្មជនជួយការងារ។
ពាក់ព័ន្ធនឹងករណីនេះដែរលោក គង់ ពុទ្ធី អតីតប្រធានអគ្គិសនីខេត្តសៀមរាប បានពន្យល់ឲ្យដឹងនៅព្រឹកថ្ងៃទី០១ខែតុលានេះ តាមទូរស័ព្ទ ករណីនេះអ្នកកាសែតមិនបាច់ខ្វល់រឿងខាងEDC នោះទេ។ ហើយបុគ្គលិកEDCណាដែលធ្វើខុសគឺនឹងត្រូវដកចេញពីក្របខណ្ឌចឹងហើយ។ ចំណែកលោក គង់ ផល្លា ប្រធានអគ្គិសនីខេត្តសៀមរាប ទើបឡើងថ្មី ក៏មិនអាចសុំការពន្យល់បានទេនៅសៀលថ្ងៃទី០១នេះ៕
Source: Kampuchea Thmey Daily
0 Comments