ភ្នំពេញ ៖ ដើម្បីដោះស្រាយបញ្ហាជន់លិច ដោយទឹកភ្លៀង នៅរដូវវស្សានេះ កាលពីថ្ងៃទី១ ខែតុលា ឆ្នាំ២០១៨ រដ្ឋបាលរាជធានីភ្នំពេញ បានចេញសេចក្តីជូនដំណឹងមួយ ដើម្បីជម្រាបអោយសាធារណជន ក្រុមហ៊ុនអាជីវកម្ម និងប្រជាពលរដ្ឋដែលរស់នៅ តាមបណ្តោយផ្លូវ ដូង ងៀប ចាប់ពីផ្លូវលេខ២០០៤ ដល់ផ្លូវចោមចៅ (វេងស្រេង) ស្ថិតក្នុងខណ្ឌសែនសុខ មេត្តាយោគយល់ ដោយរដ្ឋបាលរាជធានីភ្នំពេញ ត្រូវបើកការដ្ឋានដាក់លូប្រអប់មេ កាត់ទទឹងផ្លូវ ដួង ងៀប ទំហំមុខកាត់២,៥ម៉ែត្រ x ២,៥ម៉ែត្រ ៣ជួរ ភ្ជាប់ទៅប្រឡាយបារាំង ដែលការដ្ឋាននេះ នឹងត្រូវធ្វើឡើងរយៈពេល៣០ថ្ងៃ។
ក្នុងសេចក្តីជូនដំណឹងនេះបានបញ្ជាក់ថា ដើម្បីដោះស្រាយបញ្ហាជន់លិច ដោយទឹកភ្លៀងនៅរដូវវស្សា ដែលតែងតែកើតមានក្នុងភូមិសាស្ត្រនេះ រដ្ឋបាលរាជធានីភ្នំពេញ ចាប់ផ្តើមដាក់លូកាត់ទទឹងផ្លូវ ចាប់ពីថ្ងៃនេះរហូតដល់ការដ្ឋានត្រូវបញ្ចប់ មានរយៈពេល៣០ថ្ងៃ។ រដ្ឋបាលរាជធានីភ្នំពេញ បានសូមសាធារណជន និងប្រជាពលរដ្ឋដែលរស់នៅតាមផ្លូវខាងលើ មេត្តាយោគយល់ និងអធ្យាស្រ័យ ចំពោះការរំខានដល់ការធ្វើចរាចរឆ្លងកាត់ការដ្ឋាន និងផលប៉ះពាល់ផ្សេងៗ។ ក្នុងន័យនេះ អាជ្ញាធរបានស្នើសូមមេត្តាពង្វាងចរាចរ ពីទីតាំងខាងលើដើម្បីឲ្យការអនុវត្តគម្រោង បានតាមផែនការកំណត់៕
Source: Kampuchea Thmey Daily
0 Comments